حضرت جابر بن عبداللہ رضی اللہ عنہما سے روایت ہے، انہوں نے فرمایا کہ خانہ کعبہ کی تعمیر شروع کی گئی تو نبی کریم صلی اللہ علیہ وسلم اور حضرت عباس رضی اللہ عنہ پتھر اٹھا کر لا رہے تھے۔ حضرت عباس رضی اللہ عنہ نے نبی کریم صلی اللہ علیہ وسلم سے کہا کہ آپ اپنا تہبند اتار کر کندھے پر رکھ لیں۔ جب آپ نے ایسا کیا تو بے ہوش ہو کر زمین پر گر پڑے اور آپ کی نگاہیں آسمان کی طرف اٹھ گئیں۔ آپ صلی اللہ علیہ وسلم نے فرمایا: ”میرا تہبند مجھے دے دو۔“ اس کے بعد آپ صلی اللہ علیہ وسلم نے اپنا تہبند اپنے اوپر باندھ لیا۔ [صحيح البخاري/كتاب الحج/حدیث: 1582]

حضرت جابر بن عبداللہ رضی اللہ عنہما سے روایت ہے، وہ بیان کرتے ہیں کہ رسول اللہ صلی اللہ علیہ وسلم قریش کے ہمراہ تعمیرِ کعبہ کے لیے پتھر اٹھاتے تھے۔ آپ صلی اللہ علیہ وسلم نے صرف تہ بند باندھا ہوا تھا۔ آپ صلی اللہ علیہ وسلم کے چچا حضرت عباس رضی اللہ عنہ نے کہا: اے میرے بھتیجے! اگر تم اپنا تہ بند اتار کر اسے اپنے کندھوں پر پتھر کے نیچے رکھ لو (تو تمہارے لیے آسانی ہو گی)۔ حضرت جابر رضی اللہ عنہما کہتے ہیں کہ آپ صلی اللہ علیہ وسلم نے اپنا تہ بند اتار کر اپنے کندھوں پر رکھ لیا، چنانچہ آپ صلی اللہ علیہ وسلم اسی وقت بے ہوش ہو کر گر پڑے۔ اس کے بعد آپ صلی اللہ علیہ وسلم کبھی برہنہ نہیں دیکھے گئے۔ [صحيح البخاري/كتاب الحج/حدیث: 364]

حضرت جابر بن عبداللہ رضی اللہ عنہ سے روایت ہے، انہوں نے فرمایا: ”جب کعبہ کی تعمیر ہو رہی تھی تو نبی صلی اللہ علیہ وسلم اور حضرت عباس رضی اللہ عنہ پتھر اٹھا کر لا رہے تھے۔ حضرت عباس رضی اللہ عنہ نے نبی صلی اللہ علیہ وسلم سے کہا: ”آپ اپنا تہبند اتار کر کندھے پر رکھ لیں جو آپ کو پتھروں کی رگڑ سے محفوظ رکھے گا۔“ چنانچہ (جب آپ صلی اللہ علیہ وسلم نے ایسا کیا) تو زمین پر گر پڑے اور آپ کی آنکھیں آسمان کی طرف لگ گئیں۔ پھر جب ہوش آیا تو (اپنے چچا عباس سے) فرمایا: ”میرا تہبند دو، میرا تہبند دو“ چنانچہ انہوں نے وہ تہبند آپ صلی اللہ علیہ وسلم کو مضبوطی سے باندھ دیا۔“ [صحيح البخاري/كتاب الحج/حدیث: 3829]

حضرت اسود رحمہ اللہ سے روایت ہے، انہوں نے کہا: مجھ سے حضرت عبداللہ بن زبیر رضی اللہ عنہ نے فرمایا: حضرت عائشہ رضی اللہ عنہا تجھ سے بہت راز کی باتیں فرمایا کرتی تھیں، تو کعبے کے متعلق انہوں نے تجھ سے کیا حدیث بیان کی ہے؟ میں نے کہا: مجھ سے انہوں نے یہ کہا تھا کہ نبی صلی اللہ علیہ وسلم نے فرمایا: ”اے عائشہ! اگر تیری قوم کے لوگوں کا زمانہ قریب نہ ہوتا (ابن زبیر رضی اللہ عنہ نے کہا: یعنی کفر (جاہلیت) کے قریب نہ ہوتا (نئے نئے اسلام میں داخل نہ ہوئے ہوتے)) تو میں کعبے کی اس تعمیر کو منہدم کر دیتا اور اس کے دو دروازے بنا دیتا: ایک سے لوگ داخل ہوتے اور دوسرے دروازے سے نکل جاتے۔“ چنانچہ حضرت عبداللہ بن زبیر رضی اللہ عنہ نے (اپنے دورِ حکومت میں) ایسا ہی کر دیا۔ [صحيح البخاري/كتاب الحج/حدیث: 126]