حضرت انس رضی اللہ عنہ سے روایت ہے کہ قبیلہ عکل اور عرینہ کے کچھ لوگ مدینہ منورہ آئے اور انہیں یہاں کی آب و ہوا موافق نہ آئی تو نبی صلی اللہ علیہ وسلم نے انہیں دودھ والی اونٹنیوں میں جانے کا حکم دیا کہ وہاں جا کر ان کا ”دودھ اور پیشاب استعمال کریں“، چنانچہ وہ لوگ چلے گئے۔ اور جب وہ صحت مند ہو گئے تو انھوں نے نبی صلی اللہ علیہ وسلم کے چرواہے کو قتل کر ڈالا اور جانور ہانک کر لے گئے۔ صبح کے وقت (رسول اللہ صلی اللہ علیہ وسلم کو جب) یہ خبر پہنچی تو آپ نے ان کے تعاقب میں چند آدمی روانہ کیے، چنانچہ سورج بلند ہوتے ہی ان سب کو گرفتار کر لیا گیا۔ پھر آپ کے حکم سے ان کے ہاتھ پاؤں کاٹے گئے اور ان کی آنکھوں میں گرم سلائیاں پھیری گئیں، اس کے بعد گرم سنگلاخ جگہ پر انہیں ڈال دیا گیا۔ وہ پانی مانگتے تھے لیکن انہیں پانی نہیں دیا جاتا تھا۔ ابو قلابہ رحمہ اللہ نے فرمایا: ان لوگوں نے چوری کی، خون ناحق کیا، ایمان کے بعد مرتد ہوئے اور اللہ اور اس کے رسول کے ساتھ انھوں نے اعلانِ جنگ کیا (اس لیے یہ سزا تجویز کی گئی)۔ [صحيح البخاري/كتاب الوضوء/حدیث: 233]

حضرت انس رضی اللہ عنہ سے روایت ہے کہ قبیلہ عرینہ کے چند لوگ مدینہ طیبہ آئے تو اس کی آب و ہوا ان کے موافق نہ آئی۔ رسول اللہ صلی اللہ علیہ وسلم نے انہیں اجازت دی کہ وہ صدقے کے اونٹوں میں جا کر ان کا دودھ اور پیشاب نوش کریں۔ انہوں نے چرواہے کو قتل کر دیا اور اونٹ لے کر بھاگ نکلے۔ رسول اللہ صلی اللہ علیہ وسلم نے ان کے پیچھے آدمی روانہ کیے، چنانچہ انہیں گرفتار کر کے لایا گیا تو آپ صلی اللہ علیہ وسلم نے ان کے ہاتھ پاؤں کاٹ دینے کا حکم دیا، نیز ان کی آنکھوں میں گرم سلائیاں پھیرنے کو کہا، پھر انہیں گرم پتھریلی زمین پر پھینک دیا، چنانچہ وہ پیاس کے مارے پتھروں کو چباتے تھے۔ ابوقلابہ، حمید اور ثابت رحمہم اللہ نے حضرت انس رضی اللہ عنہ سے روایت کرنے میں قتادہ رحمہ اللہ کی متابعت کی ہے۔ [صحيح البخاري/كتاب الوضوء/حدیث: 1501]

حضرت انس رضی اللہ عنہ سے روایت ہے کہ قبیلہ عکل کے آٹھ آدمیوں کی ایک جماعت نبی کریم صلی اللہ علیہ وسلم کے پاس آئی اور انھیں مدینہ طیبہ کی آب و ہوا موافق نہ آئی تو وہ آپ صلی اللہ علیہ وسلم سے کہنے لگے: ”اللہ کے رسول صلی اللہ علیہ وسلم ! ہمارے لیے اونٹنیوں کے دودھ کا بندوبست کر دیں۔“ آپ صلی اللہ علیہ وسلم نے فرمایا: ”میرے پاس تمہارے لیے اس کے سوا کوئی صورت نہیں کہ تم اونٹنیوں کے پڑاؤ میں قیام کرو۔“ چنانچہ وہ چلے گئے اور وہاں اونٹنیوں کا دودھ اور پیشاب پیا تو تندرست ہو کر پہلے سے بھی زیادہ موٹے ہو گئے۔ پھر انہوں نے چرواہے کو قتل کر دیا اور سب اونٹ ہانک کر لے گئے اور مسلمان ہونے کے بعد ارتداد کا راستہ اختیار کر لیا۔ نبی کریم صلی اللہ علیہ وسلم کو ایک پکارنے والے کے ذریعے سے ان کی خبر ملی تو آپ صلی اللہ علیہ وسلم نے تلاش کنندہ ان کے تعاقب میں روانہ فرمائے۔ ابھی سورج طلوع نہیں ہوا تھا کہ انھیں پکڑ کر آپ صلی اللہ علیہ وسلم کے حضور پیش کر دیا گیا۔ آپ صلی اللہ علیہ وسلم نے ان کے ہاتھ اور پاؤں کاٹنے کا حکم دیا۔ پھر لوہے کی سلاخیں گرم کی گئیں اور انھیں ان کی آنکھوں میں پھیرا گیا اور انھیں پتھریلی زمین پر پھینک دیا گیا۔ وہ پانی مانگتے تھے تو ان کو پانی بھی نہیں پلایا گیا حتیٰ کہ وہ مر گئے۔ (راوی حدیث) ابوقلابہ رحمہ اللہ کہتے ہیں کہ انہوں نے قتل کیا، پھر چوری کی، اس کے بعد انہوں نے اللہ اور اس کے رسول صلی اللہ علیہ وسلم کے خلاف جنگ کی اور اللہ کی زمین میں ڈاکا زنی سے فساد برپا کیا۔ [صحيح البخاري/كتاب الوضوء/حدیث: 3018]

حضرت انس رضی اللہ عنہ سے روایت ہے، انہوں نے کہا کہ قبیلہ عکل اور عرینہ کے چند لوگ مدینہ طیبہ میں نبی صلی اللہ علیہ وسلم کی خدمت میں حاضر ہوئے اور کلمہ توحید پڑھ کر اظہار اسلام کیا اور عرض کرنے لگے: ”اللہ کے نبی! ہم لوگ مویشی رکھتے ہیں، زرعی زمینوں والے نہیں ہیں۔“ انہیں مدینہ طیبہ کی آب و ہوا موافق نہ آئی تو رسول اللہ صلی اللہ علیہ وسلم نے کچھ اونٹ اور ایک چرواہا ان کے ساتھ کر دیا اور حکم دیا کہ شہر سے باہر کھلی فضا میں نکل جائیں اور ان اونٹوں کا دودھ اور پیشاب نوش کریں۔ وہ روانہ ہوئے لیکن حرہ کے کنارے پہنچتے ہی وہ اسلام سے برگشتہ ہو گئے اور نبی صلی اللہ علیہ وسلم کے چرواہے کو قتل کر کے اونٹوں کو ہانک کر لے گئے۔ نبی صلی اللہ علیہ وسلم کو جب ان کی خبر ملی تو آپ نے چند صحابہ کو ان کے تعاقب میں بھیجا (جب وہ انہیں پکڑ کر لائے تو) آپ نے انہیں سزا دینے کا حکم دیا، چنانچہ ان کی آنکھوں میں گرم آہنی سلائیاں پھیری گئیں۔ ان کے ہاتھ کاٹ دیے گئے اور انہیں گرم پتھریلی زمین میں ڈال دیا گیا۔ آخر وہ اسی حالت میں مر گئے۔ قتادہ رحمہ اللہ نے کہا: ”ہمیں یہ خبر پہنچی ہے کہ نبی صلی اللہ علیہ وسلم اس کے بعد صحابہ کرام رضی اللہ عنہم کو صدقہ کرنے کی ترغیب دلایا کرتے اور مثلہ کرنے سے منع کرتے تھے۔“ شعبہ، ابان اور حماد نے قتادہ رحمہ اللہ سے بیان کیا کہ یہ لوگ قبیلہ عرینہ کے تھے۔ یحییٰ بن ابو کثیر اور ایوب نے ابو قلابہ کے ذریعے سے حضرت انس رضی اللہ عنہ سے روایت کی کہ قبیلہ عکل کے چند لوگ آئے۔ [صحيح البخاري/كتاب الوضوء/حدیث: 4192]

حضرت عمر بن عبدالعزیز رحمہ اللہ سے روایت ہے، انہوں نے ایک دن لوگوں سے مشورہ لیا اور فرمایا: ”تم اس قسامہ کے متعلق کیا کہتے ہو؟“ لوگوں نے کہا: ”یہ حق ہے، رسول اللہ صلی اللہ علیہ وسلم نے اس کے مطابق فیصلہ فرمایا اور آپ سے پہلے خلفائے راشدین رضی اللہ عنہم نے بھی اس کے مطابق فیصلہ کیا۔“ ابو رجاء بیان کرتے ہیں کہ اس وقت ابوقلابہ رحمہ اللہ حضرت عمر بن عبدالعزیز کے تخت کے پیچھے (کھڑے) تھے، اتنے میں عنبسہ بن سعید نے کہا: ”پھر قبیلہ عرینہ کے لوگوں کے متعلق حضرت انس رضی اللہ عنہ سے مروی حدیث کہاں گئی؟“ اس پر ابوقلابہ رحمہ اللہ نے کہا کہ حضرت انس رضی اللہ عنہ نے خود مجھ سے بیان کی تھی۔ عبدالعزیز بن صہیب نے حضرت انس رضی اللہ عنہ کے حوالے سے صرف قبیلہ عکل کا ذکر کیا ہے، پھر مذکورہ واقعہ تفصیل سے بیان کیا۔ [صحيح البخاري/كتاب الوضوء/حدیث: 4193]

حضرت ابوقلابہ رحمہ اللہ سے روایت ہے کہ وہ حضرت عمر بن عبدالعزیز رحمہ اللہ کے پیچھے بیٹھے ہوئے تھے تو مجلس میں قسامت کا ذکر آ گیا۔ لوگوں نے کہا: ”قسامت میں قصاص ہوتا ہے۔ آپ سے پہلے خلفاء نے بھی اس میں قصاص لیا ہے۔“ تب حضرت عمر بن عبدالعزیز رحمہ اللہ ابوقلابہ کی طرف متوجہ ہوئے جبکہ وہ ان کے پیچھے بیٹھے ہوئے تھے۔ انہوں نے پوچھا: ”عبداللہ بن زید! تمہاری اس کے متعلق کیا رائے ہے؟“ یا یوں کہا: ”اے ابوقلابہ! آپ اس کے متعلق کیا کہتے ہیں؟“ میں نے عرض کی: ”مجھے تو کوئی ایسی صورت معلوم نہیں کہ اسلام میں کسی کا قتل جائز ہو، سوائے اس شخص کے جو شادی شدہ ہونے کے با وجود زنا کرے یا کسی کو ناحق قتل کرے یا اللہ اور اس کے رسول صلی اللہ علیہ وسلم کی مخالفت کرتے ہوئے مرتد ہو جائے۔“ اس پر حضرت عنبسہ رحمہ اللہ نے کہا: ”ہم سے تو حضرت انس رضی اللہ عنہ نے ایسی ایسی حدیث بیان کی تھی۔“ میں نے کہا: ”مجھ سے بھی انہوں نے یہ حدیث بیان کی تھی کہ کچھ لوگ نبی صلی اللہ علیہ وسلم کی خدمت میں حاضر ہوئے اور اسلام پر بیعت کرنے کے بعد انہوں نے آپ صلی اللہ علیہ وسلم سے عرض کی: ہمیں اس شہر (مدینہ طیبہ) کی آب و ہوا موافق نہیں آئی۔ آپ صلی اللہ علیہ وسلم نے فرمایا: ”ہمارے یہ اونٹ چرنے کے لیے باہر جا رہے ہیں تم بھی ان کے ساتھ وہاں چلے جاؤ۔ ان کا دودھ اور پیشاب پیو۔“ چنانچہ وہ لوگ اونٹوں کے ساتھ چلے گئے، وہاں ان کا دودھ اور پیشاب پیا تو وہ تندرست ہو گئے۔ اس کے بعد انہوں نے چرواہے پر حملہ کیا، اسے قتل کر کے اونٹوں کو ہانک کر لے گئے۔ اب ایسے لوگوں سے قصاص لینے میں کیا تامل ہو سکتا تھا؟ انہوں نے ایک شخص کو قتل کیا، اللہ اور اس کے رسول کے خلاف بغاوت کی، پھر رسول اللہ صلی اللہ علیہ وسلم کو خوفزدہ کرنے کی کوشش کی۔“ حضرت عنبسہ رحمہ اللہ نے اس پر «سُبْحَانَ اللّٰهِ» ”اللہ پاک ہے“ کہا۔ میں نے کہا: ”کیا تم مجھے جھٹلانا چاہتے ہو؟“ انہوں نے کہا: ”ایسا نہیں ہے۔ یہی حدیث حضرت انس رضی اللہ عنہ نے مجھ سے بھی بیان کی تھی (لیکن میں نے اس لیے تعجب کا اظہار کیا کہ تمہیں حدیث یاد رہتی ہے)۔“ راوی نے کہا کہ حضرت عنبسہ رحمہ اللہ نے فرمایا: ”اے اہل شام! جب تک تمہارے ہاں ابوقلابہ یا اس جیسے عالم موجود رہیں گے تم ہمیشہ اچھے رہو گے۔“ [صحيح البخاري/كتاب الوضوء/حدیث: 4610]

حضرت انس رضی اللہ عنہ سے روایت ہے کہ کچھ لوگ بیمار تھے، انہوں نے عرض کی: ”اللہ کے رسول! ہمیں قیام کے لیے جگہ دے دیں اور ہمارے کھانے کا بندوبست فرما دیں۔“ پھر جب وہ تندرست ہو گئے تو انہوں نے کہا کہ مدینہ طیبہ کی آب و ہوا خراب ہے جو ہمارے موافق نہیں، تو آپ صلی اللہ علیہ وسلم نے مقام حرہ میں اونٹوں کے ساتھ ان کے قیام کا بندوبست کر دیا اور فرمایا: ”اونٹنیوں کا دودھ پیو۔“ جب وہ تندرست ہو گئے تو انہوں نے نبی صلی اللہ علیہ وسلم کے چرواہے کو قتل کر دیا اور آپ صلی اللہ علیہ وسلم کے اونٹ ہانک کر لے گئے۔ آپ صلی اللہ علیہ وسلم نے ان کے پیچھے آدمی بھیجے تو وہ انہیں پکڑ لائے، آپ صلی اللہ علیہ وسلم نے ان کے ہاتھ اور پاؤں کاٹ ڈالے اور ان کی آنکھوں میں گرم سلائیاں پھیریں۔ میں نے ان میں سے ایک آدمی کو دیکھا، وہ اپنی زبان سے زمین چاٹتا تھا اور وہ اسی حالت میں مر گیا۔ (راوی حدیث) اسلام نے کہا: ”مجھے یہ خبر پہنچی ہے کہ حجاج نے حضرت انس رضی اللہ عنہ سے کہا: تم مجھ سے سخت ترین سزا بیان کرو جو نبی صلی اللہ علیہ وسلم نے کسی کو دی ہو، تو انہوں نے یہی واقعہ بیان کیا۔“ یہ بات امام حسن بصری رحمہ اللہ کو پہنچی تو انہوں نے کہا: ”کاش! وہ یہ حدیث اس (حجاج) سے بیان نہ کرتے۔“ [صحيح البخاري/كتاب الوضوء/حدیث: 5685]

حضرت انس رضی اللہ عنہ سے روایت ہے کہ مدینہ میں چند لوگوں نے (مدینہ طیبہ کی) آب و ہوا کو ناموافق پایا تو نبی کریم صلی اللہ علیہ وسلم نے ان سے فرمایا: ”وہ آپ کے چرواہے کے پاس چلے جائیں۔“ یعنی اونٹنیوں کے باڑے میں قیام رکھیں، وہاں ان کا دودھ نوش کریں اور ان کا پیشاب بھی پئیں، چنانچہ وہ لوگ آپ صلی اللہ علیہ وسلم کے چرواہے کے پاس چلے گئے اور انہوں نے وہاں اونٹوں کا دودھ اور پیشاب پیا۔ جب ان کے جسم صحت مند ہو گئے تو انہوں نے چرواہے کو قتل کر دیا اور اونٹ ہانک کر لے گئے۔ نبی کریم صلی اللہ علیہ وسلم کو اس کی اطلاع ہوئی تو آپ صلی اللہ علیہ وسلم نے ان کے تعاقب میں آدمی بھیجے، جب انہیں پکڑ کر لایا گیا تو آپ صلی اللہ علیہ وسلم کے حکم سے ان کے ہاتھ اور پاؤں کاٹ دیے گئے اور ان کی آنکھوں میں گرم سلائیاں پھیری گئیں۔ قتادہ رحمہ اللہ نے کہا: مجھ سے محمد بن سیرین رحمہ اللہ نے بیان کیا: ”یہ حدود کے نازل ہونے سے پہلے کا واقعہ ہے۔“ [صحيح البخاري/كتاب الوضوء/حدیث: 5686]

حضرت انس رضی اللہ عنہ سے روایت ہے کہ قبیلہ عکل اور عرینہ سے چند لوگ رسول اللہ صلی اللہ علیہ وسلم کی خدمت میں حاضر ہوئے اور انہوں نے اسلام کے متعلق گفتگو کی، پھر انہوں نے کہا: ”اللہ کے رسول! ہم مویشی پالنے والے ہیں اور زراعت پیشہ یا کھجوروں والے نہیں ہیں“، مدینہ طیبہ کی آب و ہوا انہیں موافق نہیں آتی تھی۔ رسول اللہ صلی اللہ علیہ وسلم نے ان کے لیے چند اونٹوں اور ایک چرواہے کا حکم دیا اور فرمایا کہ: ”وہ ان اونٹوں کے ساتھ مدینہ سے باہر چلے جائیں، وہاں ان کا دودھ اور پیشاب نوش کریں“، چنانچہ وہ لوگ باہر چلے گئے لیکن حرہ کے نزدیک پہنچ کر وہ اسلام سے مرتد ہو گئے، انہوں نے رسول اللہ صلی اللہ علیہ وسلم کے چرواہے کو قتل کر دیا اور اونٹ لے کر بھاگ نکلے، جب رسول اللہ صلی اللہ علیہ وسلم کو یہ خبر ملی تو آپ صلی اللہ علیہ وسلم نے ان کے تعاقب میں چند آدمی روانہ کیے، پھر آپ صلی اللہ علیہ وسلم نے ان کے متعلق حکم دیا اور ان کی آنکھوں میں گرم سلاخیں پھیری گئیں اور ان کے ہاتھ پاؤں کاٹ ڈالے گئے، پھر حرہ کے کنارے انہیں چھوڑ دیا گیا حتیٰ کہ وہ اسی حالت میں مر گئے۔ [صحيح البخاري/كتاب الوضوء/حدیث: 5727]

حضرت انس رضی اللہ عنہ سے روایت ہے انہوں نے کہا کہ نبی صلی اللہ علیہ وسلم کے پاس قبیلہ عکل کے چند آدمی آئے اور اسلام قبول کیا لیکن مدینہ طیبہ کی آب و ہوا ان کو موافق نہ آئی تو آپ صلی اللہ علیہ وسلم نے ان سے فرمایا: ”تم صدقے کے اونٹوں کے پاس رہائش رکھو اور ان کا پیشاب اور دودھ نوش کرو۔“ انہوں نے (ایسا) کیا تو صحت یاب ہو گئے، لیکن اس کے بعد وہ دین سے برگشتہ ہو گئے اور اونٹوں کے چرواہوں کو قتل کر کے اونٹوں کو ہانک کر لے گئے۔ آپ صلی اللہ علیہ وسلم نے ان کی تلاش میں سوار بھیجے تو وہ انہیں گرفتار کر کے لے آئے۔ آپ صلی اللہ علیہ وسلم نے ان کے ہاتھ اور پاؤں (مخالف سمت سے) کاٹنے کا حکم دیا، نیز ان کی آنکھیں بھی پھوڑ دی گئیں، پھر آپ صلی اللہ علیہ وسلم نے ان کے زخموں پر داغ نہ دیا حتیٰ کہ وہ سسک سسک کر مر گئے۔ [صحيح البخاري/كتاب الوضوء/حدیث: 6802]

حضرت انس رضی اللہ عنہ سے روایت ہے کہ نبی صلی اللہ علیہ وسلم نے ”اہلِ عرینہ کے ہاتھ پاؤں (مخالف سمت سے) کاٹنے کا حکم دیا لیکن انہیں داغ نہیں دیا حتیٰ کہ وہ مر گئے۔“ [صحيح البخاري/كتاب الوضوء/حدیث: 6803]

حضرت انس رضی اللہ عنہ سے روایت ہے، انہوں نے کہا: ”قبیلہ عکل کے چند لوگ نبی صلی اللہ علیہ وسلم کے پاس آئے اور انہوں نے صفہ میں رہائش رکھی لیکن مدینہ طیبہ کی آب و ہوا انہیں موافق نہ آئی تو انہوں نے کہا: ”اللہ کے رسول! ہمارے لیے کہیں سے دودھ کا بندوبست کر دیں“، آپ صلی اللہ علیہ وسلم نے فرمایا: ”ہمارے لیے یہ انتظام تو مشکل ہے البتہ تم رسول اللہ صلی اللہ علیہ وسلم کے اونٹوں کے پاس جا کر رہو“، چنانچہ وہ اونٹوں کے پاس آئے اور وہاں ان کا دودھ اور پیشاب پینے لگے، پھر صحت مند ہو کر خوب موٹے تازے ہو گئے آخر کار انہوں نے چرواہے کو قتل کر دیا اور اونٹ ہانک کر لے گئے، اس دوران میں نبی صلی اللہ علیہ وسلم کے پاس ان کی خبر دینے والا آیا تو آپ نے ان کی تلاش میں چند سواروں کو روانہ کیا۔ ابھی دھوپ زیادہ نہیں پھیلی تھی کہ انہیں گرفتار کر کے آپ کی خدمت میں پیش کر دیا گیا۔ آپ صلی اللہ علیہ وسلم کے حکم سے لوہے کی سلائیاں گرم کی گئیں جنہیں آپ نے ان کی آنکھوں میں پھیر دیں، نیز ان کے ہاتھ اور پاؤں بھی کاٹ دیے اور انہیں داغ بھی نہ دیا، پھر انہیں گرم پتھریلی زمین پر پھینک دیا گیا۔ وہ پانی مانگتے تھے لیکن انہیں پانی نہیں دیا گیا حتیٰ کہ وہ مر گئے۔“ (راویِ حدیث) ابو قلابہ رحمہ اللہ نے کہا: ”(ان کے ساتھ یہ برتاؤ اس لیے کیا گیا کہ) انہوں نے چوری کی، چرواہے کو قتل کیا اور اللہ اور اس کے رسول کے خلاف مسلح واردات کی۔“ [صحيح البخاري/كتاب الوضوء/حدیث: 6804]

حضرت انس رضی اللہ عنہ سے روایت ہے کہ قبیلہ عکل کے چند آدمی مدینہ طیبہ آئے تو نبی صلی اللہ علیہ وسلم نے ان کے لیے دودھ دینے والی اونٹنیوں کا بندوبست کر دیا اور فرمایا: ”وہ اونٹوں کے گلے میں جائیں اور ان کا پیشاب اور دودھ نوش کریں“، چنانچہ انہوں نے ایسا ہی کیا۔ جب وہ تندرست ہو گئے تو انہوں نے چرواہے کو قتل کر دیا اور اونٹوں کو ہانک کر لے گئے۔ نبی صلی اللہ علیہ وسلم کے پاس یہ خبر صبح کے وقت پہنچی تو آپ نے ان کے تعاقب میں سوار دوڑائے، ابھی دھوپ زیادہ نہیں پھیلی تھی کہ انہیں گرفتار کر کے لایا گیا۔ آپ صلی اللہ علیہ وسلم نے ان کے ہاتھ اور پاؤں کاٹ دینے کا حکم دیا اور ان کی آنکھوں میں لوہے کی گرم سلائیاں پھیری گئیں، پھر انہیں پتھریلے گرم میدان میں پھینک دیا گیا، وہ پانی مانگتے تھے لیکن انہیں پانی نہ پلایا گیا۔ ابو قلابہ رحمہ اللہ نے کہا: ”وہ لوگ تھے جنہوں نے چوری کی، قتل کیا، ایمان کے بعد کفر اختیار کیا تھا، نیز انہوں نے اللہ اور اس کے رسول کے خلاف باغیانہ کارروائی کی تھی۔“ [صحيح البخاري/كتاب الوضوء/حدیث: 6805]

حضرت ابو قلابہ رحمہ اللہ سے روایت ہے کہ حضرت عمر بن عبدالعزیز رحمہ اللہ نے ایک دن دربارِ عام منعقد کیا اور سب لوگوں کو شامل ہونے کی اجازت دی۔ جب لوگ آئے تو انہوں نے پوچھا: ”قسامت کے متعلق تمہارا کیا خیال ہے؟“ لوگوں نے کہا: ”قسامت کے ذریعے سے قصاص لیا گیا ہے۔“ ابو قلابہ رحمہ اللہ کہتے ہیں کہ انہوں نے مجھ سے کہا: ”اے قلابہ! تمہاری کیا رائے ہے؟“ مجھے انہوں نے عوام کے سامنے لا کھڑا کیا۔ میں نے کہا: ”اے امیر المومنین! آپ کے پاس عرب کے بڑے بڑے لوگ اور سردار موجود ہیں، آپ ہی بتائیں اگر ان میں سے پچاس آدمی دمشق میں رہنے والے کسی شادی شدہ شخص کے متعلق گواہی دیں کہ اس نے زنا کیا ہے جبکہ ان لوگوں نے اسے دیکھا ہی نہیں تو کیا ان کی گواہی پر آپ اس شخص کو سنگسار کر دیں گے؟“ امیر المومنین نے فرمایا: ”نہیں۔“ میں نے کہا: ”آپ ہی بتائیں اگر ان میں سے پچاس آدمی حمص میں رہنے والے کسی شخص کے متعلق گواہی دیں کہ اس نے چوری کی ہے، حالانکہ انہوں نے اسے چوری کرتے ہوئے نہیں دیکھا تو کیا آپ اس کا ہاتھ کاٹ دیں گے؟“ حضرت عمر بن عبدالعزیز رحمہ اللہ نے کہا: ”نہیں (ایسا تو نہیں ہوسکتا)۔“ پھر میں نے کہا: ”اللہ کی قسم! رسول اللہ صلی اللہ علیہ وسلم نے کبھی کسی کو تین حالتوں کے علاوہ قتل نہیں کیا: ایک وہ شخص جس نے کسی دوسرے کو ناحق قتل کیا ہو تو اسے قصاص میں قتل کیا جائے گا، دوسرا وہ جس نے شادی شدہ ہونے کے بعد زنا کیا ہو، تیسرا وہ جس نے اللہ اور اس کے رسول سے جنگ کی اور دین اسلام سے برگشتہ ہو گیا (انہیں قتل کر دیا جائے گا)۔“ یہ بات سن کر لوگوں نے کہا: ”کیا حضرت انس رضی اللہ عنہ نے یہ حدیث بیان نہیں کی کہ رسول اللہ صلی اللہ علیہ وسلم نے چوری کے معاملے میں ہاتھ پاؤں کاٹ دیے تھے اور مجرموں کی آنکھوں میں گرم سلائیاں پھیر کر انہیں دھوپ میں ڈال دیا تھا؟“ حضرت ابو قلابہ رحمہ اللہ نے کہا: ”میں تمہیں حضرت انس رضی اللہ عنہ سے مروی حدیث سناتا ہوں: مجھ سے حضرت انس رضی اللہ عنہ نے بیان کیا کہ قبیلہ عکل کے آٹھ افراد رسول اللہ صلی اللہ علیہ وسلم کی خدمت میں حاضر ہوئے اور آپ صلی اللہ علیہ وسلم سے اسلام پر بیعت کی۔ انہیں مدینہ طیبہ کی آب و ہوا موافق نہ آئی اور وہ بیمار ہو گئے تو انہوں نے رسول اللہ صلی اللہ علیہ وسلم سے اس کی شکایت کی۔ آپ صلی اللہ علیہ وسلم نے ان سے فرمایا: ”کیا تم ہمارے چرواہے کے ساتھ اونٹوں کے باڑے میں نہیں چلے جاتے پھر تم وہاں ان کا دودھ اور پیشاب پیتے؟“ انہوں نے کہا: ”کیوں نہیں؟“ چنانچہ وہ گئے اور اونٹوں کا دودھ اور پیشاب پیا تو صحت یاب ہو گئے۔ اس کے بعد انہوں نے چرواہے کو قتل کر دیا اور اونٹ ہانک کر لے گئے۔ رسول اللہ صلی اللہ علیہ وسلم کو اس کی اطلاع پہنچی تو آپ صلی اللہ علیہ وسلم نے ان کی تلاش میں آدمی بھیجے، چنانچہ انہیں گرفتار کر کے آپ صلی اللہ علیہ وسلم کی خدمت میں پیش کر دیا گیا۔ آپ صلی اللہ علیہ وسلم نے ان کے ہاتھ، پاؤں کاٹنے کا حکم دیا اور ان کی آنکھوں میں گرم سلائیاں پھروا دیں، پھر انہیں دھوپ میں پھینک دیا حتیٰ کہ وہ مرگئے۔“ میں نے کہا: ”ان کے عمل سے بڑھ کر اور کیا جرم ہو سکتا ہے؟ وہ اسلام سے پھر گئے، انہوں نے قتل کیا اور چوری کے مرتکب ہوئے۔“ حضرت عنبسہ بن سعید رحمہ اللہ نے کہا: ”اللہ کی قسم! میں نے آج جیسی بات کبھی نہیں سنی تھی۔“ میں نے کہا: ”اے عنبسہ! کیا تو میری بیان کردہ حدیث مسترد کرتا ہے؟“ اس نے کہا: ”نہیں، بلکہ تم نے یہ حدیث حقیقتِ حال کے مطابق بیان کی ہے۔ اللہ کی قسم! یہ لشکر اس وقت تک خیر و عافیت سے رہے گا جب تک یہ شیخ ان میں موجود رہیں گے۔“ میں نے کہا: ”قسامت کے متعلق رسول اللہ صلی اللہ علیہ وسلم کی سنت یہ ہے کہ آپ صلی اللہ علیہ وسلم کے پاس انصار کے کچھ لوگ آئے اور آپ صلی اللہ علیہ وسلم سے باتیں کرتے رہے، پھر ان کے سامنے سے ان کا ایک شخص باہر نکلا اور وہاں قتل کر دیا گیا۔ اس کے بعد دوسرے لوگ باہر نکلے تو کیا دیکھتے ہیں کہ ان کا ساتھی خون میں تڑپ رہا ہے۔ ان لوگوں نے واپس آ کر رسول اللہ صلی اللہ علیہ وسلم کو اس واقعے کی خبر دی اور کہا: ”اے اللہ کے رسول! ہمارا ساتھی ابھی ابھی ہمارے ساتھ گفتگو کر رہا تھا، وہ ہمارے سامنے (مقتول پڑا) ہے۔“ رسول اللہ صلی اللہ علیہ وسلم باہر تشریف لائے اور پوچھا: ”تمہیں کس پر شبہ ہے؟“ انہوں نے عرض کیا: ”ہمارے خیال کے مطابق اسے یہودیوں نے قتل کیا ہے۔“ آپ صلی اللہ علیہ وسلم نے فرمایا: ”کیا تم اس بات پر راضی ہو کہ یہودیوں میں سے پچاس آدمی قسم کھائیں کہ انہوں نے قتل نہیں کیا؟“ انہوں نے کہا: ”وہ تو اس کی بھی پروا نہیں کرتے کہ ہم سب کو قتل کر دیں، پھر قسمیں کھا جائیں۔“ آپ صلی اللہ علیہ وسلم نے فرمایا: ”تم میں سے پچاس آدمی قسم اٹھائیں اور خون بہا کے مستحق ہو جائیں۔“ انہوں نے کہا: ”ہم بھی قسم اٹھانے کے لیے تیار نہیں ہیں۔“ چنانچہ آپ صلی اللہ علیہ وسلم نے اپنی طرف سے اس کی دیت ادا کر دی۔“ (ابو قلابہ رحمہ اللہ کہتے ہیں:) میں نے کہا: ”زمانہ جاہلیت میں قبیلہ ہذیل کے لوگوں نے اپنے ایک آدمی کو قبیلے سے نکال دیا تھا، پھر وہ رات کے وقت وادی بطحاء میں ایک یمنی کے گھر آیا، اس دوران ان میں سے ایک شخص بیدار ہوا اور اس نے تلوار سے وار کر دیا (جس سے وہ مر گیا)، پھر قبیلہ ہذیل کے لوگ آئے اور قاتل یمنی کو گرفتار کر کے حج کے موقع پر حضرت عمر رضی اللہ عنہ کے ہاں پیش کر دیا اور کہا: ”اس نے ہمارے آدمی کو قتل کر دیا ہے۔“ یمنی نے کہا: ”انہوں نے اسے اپنی برادری سے نکال دیا تھا۔“ حضرت عمر رضی اللہ عنہ نے فرمایا: ”اب قبیلہ ہذیل کے پچاس آدمی قسم اٹھائیں کہ اسے انہوں نے نہیں نکالا تھا۔“ چنانچہ ان میں سے انچاس آدمیوں نے قسمیں کھائیں، پھر اس قبیلے کا ایک شخص شام سے آیا تو انہوں نے اس سے بھی قسم لینے کا مطالبہ کیا لیکن اس نے اپنی قسم کے عوض ایک ہزار درہم ادا کر کے قسم سے اپنا پیچھا چھڑا لیا۔ قبیلہ ہذیل کے لوگوں نے اس کی جگہ ایک دوسرے آدمی کو تیار کر لیا، پھر انہوں نے قاتل کو مقتول کے بھائی کے حوالے کر دیا اور اس کا ہاتھ اس کے ہاتھ کے ساتھ باندھ دیا گیا۔“ انہوں نے بیان کیا: ”پھر ہم اور وہ پچاس آدمی جنہوں نے قسم اٹھائی تھی روانہ ہوئے۔ جب مقام نخلہ پر پہنچے تو وہاں انہیں بارش نے آ لیا۔ چنانچہ سب لوگ پہاڑ کی ایک غار میں گھس گئے، غار ان پچاس آدمیوں کے اوپر گر پڑی جنہوں نے قسمیں اٹھائی تھیں اور وہ سب کے سب مر گئے، البتہ جن دو آدمیوں نے ہاتھ باندھے تھے وہ بچ گئے۔ ان کے پیچھے بھی ایک پتھر لڑھک کر گرا اور اس نے مقتول کے بھائی کا ٹخنا توڑ دیا۔ اس کے بعد وہ ایک سال زندہ رہا، پھر مر گیا۔“ میں نے کہا: ”حضرت عبدالملک بن مروان رحمہ اللہ نے ایک آدمی سے قسامت کی بنیاد پر قصاص لیا تھا، پھر انہیں اپنے کیے پر ندامت ہوئی تو انہوں نے ان پچاس آدمیوں کے متعلق جنہوں نے قسم اٹھائی تھی حکم دیا کہ ان کے نام رجسٹر سے کاٹ دیے جائیں، پھر انہیں شام کی طرف جلاوطن کر دیا۔“ [صحيح البخاري/كتاب الوضوء/حدیث: 6899]