سیدنا ابوہریرہ رضی اللہ عنہ سے منقول ہے کہ بلاشبہ نبی کریم صلی اللہ علیہ وسلم نے فرمایا: ”بیوہ کا نکاح نہ کیا جائے حتیٰ کہ اس سے مشورہ کر لیا جائے۔ اور کنواری کا نکاح نہ کیا جائے مگر اس کی اجازت سے۔“ صحابہ رضی اللہ عنہم کہنے لگے: ”اے اللہ کے رسول! اس کی اجازت کیا ہے؟“ آپ صلی اللہ علیہ وسلم نے فرمایا: ”یہی کہ خاموشی رہے۔“ [سنن ابي داود/كتاب النكاح /حدیث: 2092]

سیدنا ابوہریرہ رضی اللہ عنہ نے بیان کیا کہ رسول اللہ صلی اللہ علیہ وسلم نے فرمایا: ”یتیم لڑکی سے (نکاح کے سلسلے میں) اس کی اپنی ذات کے بارے میں مشورہ کیا جائے۔ اگر وہ خاموش رہے تو یہ اس کی اجازت ہے اور اگر انکار کر دے تو اس پر جبر جائز نہیں۔“ یزید بن زریع کی سند میں «أَخْبَرَنَا» کا صیغہ استعمال ہوا ہے۔ امام ابوداؤد رحمہ اللہ فرماتے ہیں کہ ابوخالد سلیمان بن حیان اور معاذ بن معاذ نے محمد بن عمرو سے ایسے ہی روایت کیا ہے۔ [سنن ابي داود/كتاب النكاح /حدیث: 2093]

محمد بن عمرو نے یہ حدیث اپنی سند سے روایت کی اور اس نے کہا «فَإِنْ بَكَتْ أَوْ سَكَتَتْ» ”اگر وہ رو پڑے یا خاموش رہے۔“ اس نے «بَكَتْ» کے لفظ کا اضافہ کیا (رو پڑے۔) امام ابوداؤد رحمہ اللہ فرماتے ہیں کہ یہ لفظ «بَكَتْ» محفوظ نہیں، وہم ہے جو ابن ادریس سے ہوا ہے یا محمد بن علاء سے۔ امام ابوداؤد رحمہ اللہ فرماتے ہیں کہ اس حدیث کو ابوعمرو ذکوان نے سیدہ عائشہ رضی اللہ عنہا سے روایت کیا، وہ کہتی ہیں کہ (میں نے کہا) ”اے اللہ کے رسول صلی اللہ علیہ وسلم ! کنواری لڑکی تو بات کرنے سے حیا کرتی ہے۔“ آپ صلی اللہ علیہ وسلم نے فرمایا: ”اس کا خاموش رہنا ہی اس کا اقرار ہے۔“ [سنن ابي داود/كتاب النكاح /حدیث: 2094]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: ”بیوہ اپنی ذات کے بارے میں اپنے ولی کی بہ نسبت زیادہ حقدار ہے، اور کنواری سے بھی اس کے اپنے بارے میں مشورہ کیا جائے، اس کی اجازت اس کی خاموشی ہے۔“ اور یہ لفظ قعنبی (عبداللہ بن مسلمہ) کے ہیں۔ [سنن ابي داود/كتاب النكاح /حدیث: 2098]

عبداللہ بن فضل نے اپنی سند سے اور مذکورہ بالا حدیث کے ہم معنی روایت کیا اور کہا: ”بیوہ اپنے ولی کی بہ نسبت اپنے بارے میں زیادہ حقدار ہے، اور کنواری سے اس کا باپ مشورہ کرے۔“ امام ابوداؤد رحمہ اللہ فرماتے ہیں: «أَبُوهَا» ”اس کا باپ“ کا لفظ محفوظ نہیں ہے۔ [سنن ابي داود/كتاب النكاح /حدیث: 2099]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم نے فرمایا: ”ولی کو بیوہ کے معاملے میں کوئی دخل حاصل نہیں ہے، اور یتیم لڑکی سے مشورہ کیا جائے اور اس کی خاموشی اس کا اقرار ہے۔“ [سنن ابي داود/كتاب النكاح /حدیث: 2100]