سیدنا حماد بن سلمہ رحمہ اللہ نے مذکورہ بالا سند سے اس کے ہم معنی بیان کیا۔ اور اس روایت کے شروع میں ہے کہ آپ صلی اللہ علیہ وسلم نے تکبیر کہی اور آخر میں ہے کہ جب نماز پوری کی تو فرمایا ”میں محض انسان ہوں اور میں جنابت سے تھا۔“ امام ابوداؤد رحمہ اللہ کہتے ہیں کہ اسے زہری رحمہ اللہ سے ابوسلمہ رحمہ اللہ نے، انہوں نے سیدنا ابوہریرہ رضی اللہ عنہ سے روایت کیا تو کہا: جب آپ صلی اللہ علیہ وسلم اپنے مصلے پر کھڑے ہو گئے اور ہمیں انتظار ہوا کہ آپ صلی اللہ علیہ وسلم تکبیر کہیں تو آپ صلی اللہ علیہ وسلم وہاں سے چل دیے اور فرمایا ”جیسے ہو (ویسے ہی ٹھہرے رہو!)۔“ اور اسے ایوب رحمہ اللہ اور ابن عون رحمہ اللہ اور ہشام رحمہ اللہ (تینوں) نے محمد یعنی ابن سیرین رحمہ اللہ سے (مرسل طور پر) نبی کریم صلی اللہ علیہ وسلم سے روایت کیا ہے کہ آپ صلی اللہ علیہ وسلم نے تکبیر کہی، پھر اپنے ہاتھ سے لوگوں کی طرف اشارہ فرمایا ”بیٹھ جاؤ۔“ اور خود چلے گئے اور غسل کیا۔ اور اسی طرح مالک رحمہ اللہ نے اسماعیل بن ابی حکیم رحمہ اللہ سے، انہوں نے عطاء بن یسار رحمہ اللہ سے روایت کیا اور یہ کہا کہ رسول اللہ صلی اللہ علیہ وسلم نے ایک نماز میں تکبیر کہی۔ امام ابوداؤد رحمہ اللہ کہتے ہیں اور ایسے ہی مسلم بن ابراہیم رحمہ اللہ نے ہمیں اپنی سند سے بیان کیا کہ ہم سے ابان رحمہ اللہ نے بیان کیا، وہ یحییٰ رحمہ اللہ سے روایت کرتے ہیں، وہ ربیع بن محمد رحمہ اللہ سے، وہ نبی کریم صلی اللہ علیہ وسلم سے کہ آپ صلی اللہ علیہ وسلم نے تکبیر کہی۔ [سنن ابي داود/كتاب الطهارة/حدیث: 234]

سیدنا ابوبکر رضی اللہ عنہ بیان کرتے ہیں کہ ”(ایک دن) رسول اللہ صلی اللہ علیہ وسلم فجر کی نماز میں داخل ہوئے، پھر اپنے ہاتھ سے اشارہ کیا کہ اپنی اپنی جگہوں پر ٹھہرے رہو۔ پھر تشریف لائے تو (اس حال میں تھے کہ) آپ صلی اللہ علیہ وسلم کے سر سے پانی کے قطرات ٹپک رہے تھے اور آپ صلی اللہ علیہ وسلم نے انہیں نماز پڑھائی۔“ [سنن ابي داود/كتاب الطهارة/حدیث: 233]

سیدنا ابوہریرہ رضی اللہ عنہ بیان کرتے ہیں کہ نماز کے لیے اقامت کہی گئی اور لوگوں نے صفیں بنا لیں تو رسول اللہ صلی اللہ علیہ وسلم تشریف لائے، حتیٰ کہ جب اپنی جگہ پر کھڑے ہو گئے تو آپ صلی اللہ علیہ وسلم کو یاد آیا کہ آپ نے غسل نہیں کیا ہے تو لوگوں سے فرمایا: ”اپنی اپنی جگہ پر ٹھہرے رہو۔“ پھر آپ صلی اللہ علیہ وسلم اپنے گھر گئے، پھر ہمارے پاس واپس آئے تو آپ صلی اللہ علیہ وسلم کے سر سے پانی کے قطرات ٹپک رہے تھے اور آپ صلی اللہ علیہ وسلم نے غسل کیا تھا۔ (اور اس اثنا میں) ہم صفوں میں کھڑے رہے۔ یہ ابن حرب کے لفظ ہیں، جبکہ عیاش کے لفظ ہیں: ”ہم برابر کھڑے رہے، آپ کا انتظار کرتے رہے حتیٰ کہ آپ تشریف لائے اور غسل کر کے آئے۔“ [سنن ابي داود/كتاب الطهارة/حدیث: 235]