سیدنا ابوسعید خدری رضی اللہ عنہ بیان کرتے ہیں کہ میں انصار کی ایک مجلس میں بیٹھا ہوا تھا کہ سیدنا ابوموسیٰ اشعری رضی اللہ عنہ گھبرائے گھبرائے سے آئے۔ ہم نے ان سے پوچھا: ”آپ گھبرائے ہوئے کیوں ہیں؟“ تو انہوں نے بتایا کہ ”مجھے سیدنا عمر رضی اللہ عنہ نے بلوایا تھا کہ ان کے پاس جاؤں۔ میں ان کے ہاں گیا اور تین بار اجازت طلب کی مگر مجھے اجازت نہیں دی گئی، تو میں واپس ہونے لگا۔“ تو انہوں نے کہا: ”کیا وجہ تھی کہ تم میرے پاس نہیں آئے؟“ میں نے ان سے کہا کہ ”میں آیا تھا اور تین بار اجازت مانگی مگر نہیں دی گئی۔ اور نبی کریم صلی اللہ علیہ وسلم نے فرمایا ہے: ”تم میں سے جب کوئی تین بار اجازت مانگے اور اسے اجازت نہ دی جائے تو چاہیے کہ وہ لوٹ آئے۔“”تو انہوں نے (سیدنا عمر رضی اللہ عنہ نے) کہا ہے: ”تمہیں اپنے اس بیان پر گواہ پیش کرنا پڑے گا۔“ تو سیدنا ابوسعید رضی اللہ عنہ نے کہا: ”تمہارے ساتھ قوم کا کوئی چھوٹا بچہ بھی جا سکتا ہے۔ (وہ اس حدیث کے صحیح ہونے کی گواہی دے سکتا ہے)“ چنانچہ سیدنا ابوسعید رضی اللہ عنہ ان کے ساتھ گئے اور سیدنا ابوموسیٰ رضی اللہ عنہ کے حق میں گواہی دی۔ [سنن ابي داود/أبواب النوم /حدیث: 5180]

جناب ابوبردہ سے روایت ہے کہ سیدنا ابوموسیٰ اشعری رضی اللہ عنہ، سیدنا عمر رضی اللہ عنہ کے ہاں گئے اور تین بار اجازت مانگی اور کہا: ”ابوموسیٰ اجازت چاہتا ہے۔“ ”اشعری اجازت چاہتا ہے۔“ ”عبداللہ بن قیس (ابوموسیٰ اشعری) اجازت چاہتا ہے۔“ مگر اجازت نہ ملی تو یہ واپس ہو لیے۔ چنانچہ سیدنا عمر رضی اللہ عنہ نے ان کو پیچھے سے بلوایا کہ ”واپس کیوں جا رہے ہو؟“ تو انہوں نے کہا کہ رسول اللہ صلی اللہ علیہ وسلم نے فرمایا ہے: ”اجازت تین بار مانگو، اگر مل جائے تو بہتر ورنہ واپس ہو جاؤ۔“ سیدنا عمر رضی اللہ عنہ نے کہا: ”اپنے بیان پر مجھے گواہ پیش کرو (کہ فی الواقع یہ رسول اللہ صلی اللہ علیہ وسلم کا فرمان ہے)“ تو وہ گئے اور واپس آئے اور کہا: ”یہ ابی رضی اللہ عنہ آ گئے ہیں۔“ تو سیدنا ابی رضی اللہ عنہ نے کہا: ”اے عمر! رسول اللہ صلی اللہ علیہ وسلم کے صحابہ کے لیے عذاب نہ بنیں۔“ تو سیدنا عمر رضی اللہ عنہ نے کہا: ”میں رسول اللہ صلی اللہ علیہ وسلم کے صحابہ کے لیے عذاب نہیں ہوں۔“ [سنن ابي داود/أبواب النوم /حدیث: 5181]

جناب عبید بن عمیر سے روایت ہے کہ سیدنا ابوموسیٰ رضی اللہ عنہ نے سیدنا عمر رضی اللہ عنہ سے اجازت طلب کی اور مذکورہ قصہ بیان کیا، اور اس میں ہے کہ وہ سیدنا ابوسعید رضی اللہ عنہ کو ساتھ لے کر گئے تو انہوں نے ان کے حق میں گواہی دی، تو سیدنا عمر رضی اللہ عنہ نے کہا: ”کیا رسول اللہ صلی اللہ علیہ وسلم کا یہ فرمان مجھ سے مخفی رہا ہے؟ مجھے بازار کے تجارتی مشاغل نے مشغول رکھا۔ اور تم جب چاہو سلام کہہ کے آ جایا کرو اور اجازت نہ مانگا کرو۔“ [سنن ابي داود/أبواب النوم /حدیث: 5182]

جناب ابوبردہ نے اپنے والد سیدنا ابوموسیٰ رضی اللہ عنہ سے مذکورہ قصہ روایت کیا۔ اس میں ہے کہ پھر سیدنا عمر رضی اللہ عنہ نے سیدنا ابوموسیٰ رضی اللہ عنہ سے کہا: ”بلاشبہ میں تم پر کسی طرح کی تہمت نہیں لگا رہا (کہ تم جھوٹ کہہ رہے ہو) لیکن رسول اللہ صلی اللہ علیہ وسلم سے حدیث نقل کرنے کا معاملہ بڑا سخت (اور اہم) ہے۔“ [سنن ابي داود/أبواب النوم /حدیث: 5183]