حضرت عبداللہ بن عمر رضی اللہ عنہ سے روایت ہے، رسول اللہ صلی اللہ علیہ وسلم نے لوگوں سے مشورہ کیا کیوں کہ نماز (باجماعت) کے لیے (آنے میں) انہیں مشکل پیش آتی تھی۔ (کیوں کہ بیک وقت جمع نہیں ہو پاتے تھے۔) حاضرین نے نرسنگے کا ذکر کیا لیکن آپ صلی اللہ علیہ وسلم نے یہودیوں (سے موافقت) کی وجہ سے اسے ناپسند فرمایا۔ پھر انہوں نے ناقوس کا ذکر کیا تو آپ صلی اللہ علیہ وسلم نے نصاریٰ کی وجہ سے اسے ناپسند فرمایا۔ اسی رات ایک انصاری صحابی حضرت عبداللہ بن زید رضی اللہ عنہ کو اور حضرت عمر بن خطاب رضی اللہ عنہ کو (خواب میں) اذان دکھائی گئی۔ انصاری صحابی رسول اللہ صلی اللہ علیہ وسلم کے پاس رات کو آئے (اور اپنا خواب سنایا) چنانچہ رسول اللہ صلی اللہ علیہ وسلم نے حضرت بلال رضی اللہ عنہ کو حکم دیا اور انہوں نے اذان کہی۔ ایک روایت میں ہے کہ حضرت بلال رضی اللہ عنہ نے صبح کی اذان میں ان الفاظ کا اضافہ فرمایا: «اَلصَّلَاةُ خَيْرٌ مِّنَ النَّوْمِ» ”نماز نیند سے بہتر ہے۔“ رسول اللہ صلی اللہ علیہ وسلم نے اسے قائم رکھا۔ حضرت عمر رضی اللہ عنہ نے فرمایا: ”اے اللہ کے رسول! مجھے بھی اس جیسا خواب آیا تھا لیکن وہ مجھ سے سبقت لے گئے۔“ [سنن ابن ماجه/كتاب الأذان والسنة فيه/حدیث: 707]

حضرت ابو ہریرہ رضی اللہ عنہ سے روایت ہے کہ ”نبی صلی اللہ علیہ وسلم نیند کی وجہ سے فجر کی سنتیں نہ پڑھ سکے تو آپ نے سورج طلوع ہونے کے بعد ان کی قضا دی۔“ [سنن ابن ماجه/كتاب الأذان والسنة فيه/حدیث: 1155]