سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم سے گری پڑی چیز (لقطہ) کے بارے میں سوال کیا گیا تو آپ صلی اللہ علیہ وسلم نے فرمایا: ”لقطہ (اپنے لیے) حلال نہیں ہے، جو شخص کوئی گری پڑی چیز اٹھائے وہ اس کا اعلان کرے، پھر اگر اس کا مالک آ جائے تو وہ چیز اسے لوٹا دے، اور اگر نہ آئے تو اسے صدقہ کر دے، پھر جب مالک آ جائے تو اسے اختیار دے دے کہ وہ (صدقے کے) اجر پر راضی رہے یا اپنی چیز (کا بدل) لے لے۔“
امام طبرانی رحمہ اللہ فرماتے ہیں: ”زیاد بن سعد سے اس حدیث کو سمتی کے سوا کسی نے روایت نہیں کیا، اور سمی سے اسے زیاد بن سعد کے سوا کسی نے روایت نہیں کیا۔“ [المعجم الأوسط/بَابُ الْأَلِفِ/حدیث: 2208]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس چیز کو آگ نے بدل دیا ہو (یعنی آگ پر پکی ہوئی چیز) اس کے کھانے سے وضو کرو۔“
امام طبرانی رحمہ اللہ فرماتے ہیں: ”ہارون سے اس حدیث کو ابو قتیبہ کے سوا کسی نے روایت نہیں کیا، اور ہارون نے یحییٰ سے اس حدیث کے سوا کوئی حدیث مسنداً روایت نہیں کی۔“ [المعجم الأوسط/بَابُ الْأَلِفِ/حدیث: 2209]

سیدنا ابو سعید خدری رضی اللہ عنہ بیان کرتے ہیں: ”جب ہم تبوک سے واپس لوٹے تو ایک آدمی نے رسول اللہ صلی اللہ علیہ وسلم سے پوچھا: قیامت کب آئے گی؟“ تو آپ صلی اللہ علیہ وسلم نے فرمایا: ”لوگوں پر سو سال نہیں گزریں گے کہ آج روئے زمین پر جو جان موجود ہے (وہ باقی رہے)۔“
امام طبرانی رحمہ اللہ فرماتے ہیں: ”داود سے، انہوں نے ابو عثمان سے اس حدیث کو ابن ابی زائدہ کے سوا کسی نے روایت نہیں کیا۔“ [المعجم الأوسط/بَابُ الْأَلِفِ/حدیث: 2210]

سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص اس حال میں مرا کہ وہ اللہ کے ساتھ کسی کو شریک ٹھہراتا تھا، اللہ اسے جہنم میں داخل کرے گا۔“ اور سیدنا عبداللہ رضی اللہ عنہ نے فرمایا: ”ایک اور بات ہے جو میں نے رسول اللہ صلی اللہ علیہ وسلم سے نہیں سنی، مجھے امید ہے کہ وہ برحق ہو گی: جو بندہ اس حال میں مرے کہ وہ اللہ کے ساتھ کسی کو شریک نہ ٹھہراتا ہو، اللہ اسے ضرور جنت میں داخل فرمائے گا۔“
امام طبرانی رحمہ اللہ فرماتے ہیں: ”ابو ایوب افریقی رحمہ اللہ سے اس حدیث کو ابن ابی زائدہ رحمہ اللہ کے سوا کسی نے روایت نہیں کیا۔“ [المعجم الأوسط/بَابُ الْأَلِفِ/حدیث: 2211]

امام حسن بصری رحمہ اللہ سے روایت ہے کہ سیدنا محمد بن مسلمہ انصاری رضی اللہ عنہ نے رسول اللہ صلی اللہ علیہ وسلم سے ایک تلوار مانگی تو آپ صلی اللہ علیہ وسلم نے انہیں عطا فرما دی، اور تلوار ابھی آپ صلی اللہ علیہ وسلم کے ہاتھ میں تھی اور ان کے سپرد نہیں کی تھی کہ آپ صلی اللہ علیہ وسلم نے ان پر ایک شرط عائد فرمائی، چنانچہ فرمایا: ”اے محمد! یہ لو، جب تک مشرکین سے جنگ ہوتی رہے اس تلوار سے ان کے خلاف لڑنا، اور جب تم دیکھو کہ مسلمان آپس میں لڑنے لگے ہیں تو اس تلوار کو لے کر احد پہاڑ کے پاس جانا اور اسے (پتھر پر مار کر) توڑ دینا۔“
امام طبرانی رحمہ اللہ فرماتے ہیں: ”محمد بن جحادہ سے اس حدیث کو ان کے بیٹے (اسماعیل) کے سوا کسی نے روایت نہیں کیا۔“ [المعجم الأوسط/بَابُ الْأَلِفِ/حدیث: 2212]

سیدنا جابر رضی اللہ عنہما سے روایت ہے کہ ایک دیہاتی رسول اللہ صلی اللہ علیہ وسلم کی خدمت میں حاضر ہوا اور اس نے عرض کیا: ”اے اللہ کے رسول! کیا جنت میں ہمارے کپڑے ہوں گے جنہیں ہم اپنے ہاتھوں سے بُنیں گے؟“ راوی کہتے ہیں کہ اس پر لوگ ہنس پڑے، تو رسول اللہ صلی اللہ علیہ وسلم نے فرمایا: ”تم کس بات پر ہنستے ہو؟ کیا اس بات پر کہ ایک ناواقف شخص ایک جاننے والے سے سوال کر رہا ہے؟ نہیں اے دیہاتی! بلکہ جنت کے پھل پھٹیں گے تو ان سے (لباس) نکلیں گے۔“
امام طبرانی رحمہ اللہ فرماتے ہیں: ”اس حدیث کو شعبی رحمہ اللہ سے مجالد کے سوا کسی نے روایت نہیں کیا، اور مجالد سے ان کے بیٹے کے سوا کسی نے روایت نہیں کیا، اور سیدنا جابر رضی اللہ عنہما سے یہ حدیث صرف اسی سند سے مروی ہے۔“ [المعجم الأوسط/بَابُ الْأَلِفِ/حدیث: 2213]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جب نماز کی اقامت کہہ دی جائے تو فرض نماز کے سوا کوئی نماز نہیں۔“
امام طبرانی رحمہ اللہ فرماتے ہیں: ”عمرو بن دینار اور عطاء کے درمیان زہری کے واسطے کا اضافہ محمد بن عبداللہ بن عبید بن عمیر کے سوا کسی نے نہیں کیا۔“ [المعجم الأوسط/بَابُ الْأَلِفِ/حدیث: 2214]

سیدنا نبیط بن شریط رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے اللہ کے لیے مسجد بنائی، اللہ اس کے لیے جنت میں گھر بنائے گا۔“
امام طبرانی رحمہ اللہ فرماتے ہیں: ”یہ حدیث نبیط رضی اللہ عنہ سے صرف اسی سند سے مروی ہے، اسے بیان کرنے میں ان کے بیٹے منفرد ہیں۔“ [المعجم الأوسط/بَابُ الْأَلِفِ/حدیث: 2215]

ام المومنین سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے فرمایا: ”جنگ دھوکے اور چال کا نام ہے۔“
امام طبرانی رحمہ اللہ فرماتے ہیں: ”اس حدیث کو ہشام بن عروہ سے علی بن غراب کے سوا کسی نے روایت نہیں کیا۔“ [المعجم الأوسط/بَابُ الْأَلِفِ/حدیث: 2216]

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس شخص نے کسی تنگ دست کو اس کی خوشحالی تک مہلت دی، اللہ عزوجل اس کے گناہ پر اسے اس کی توبہ تک مہلت دے گا۔“
امام طبرانی رحمہ اللہ فرماتے ہیں: ”یہ حدیث سیدنا ابن عباس رضی اللہ عنہما سے صرف اسی سند سے مروی ہے، اور اس میں صدائی منفرد ہیں۔“ [المعجم الأوسط/بَابُ الْأَلِفِ/حدیث: 2217]