سیدہ ام ہانی بنت ابی طالب رضی اللہ عنہا بیان کرتی ہیں: ”فتحِ مکہ کے دن رسول اللہ صلی اللہ علیہ وسلم میرے پاس تشریف لائے اور میں روزے سے تھی، آپ صلی اللہ علیہ وسلم نے فرمایا: ”پی لو۔“ میں نے عرض کیا: ”میں روزے سے ہوں۔“ آپ صلی اللہ علیہ وسلم نے فرمایا: ”کیا یہ قضا کا روزہ ہے؟“ میں نے کہا: ”نہیں۔“ آپ صلی اللہ علیہ وسلم نے فرمایا: ”تو پھر پی لو۔“ چنانچہ میں نے پی لیا۔“
امام طبرانی رحمہ اللہ فرماتے ہیں: ”ان دونوں حدیثوں کو ابن سماک بن حرب (ان کا نام سعید ہے) سے عبدالملک بن عبد ربہ طائی کے سوا کسی نے روایت نہیں کیا۔“ [المعجم الأوسط/باب الميم/حدیث: 7691]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جو شخص امام سے پہلے سجدہ کرتا ہے اور امام سے پہلے سر اٹھاتا ہے، اس کی پیشانی کے بال تو شیطان کے ہاتھ میں ہوتے ہیں۔“ [المعجم الأوسط/باب الميم/حدیث: 7692]

سیدنا عبداللہ بن عمر رضی اللہ عنہما سے روایت ہے کہ نبی کریم صلی اللہ علیہ وسلم نے فرمایا: ”جماعت کے ساتھ نماز کی فضیلت تنہا نماز پر ستائیس درجے زیادہ ہے۔“
امام طبرانی رحمہ اللہ فرماتے ہیں: ”ان دونوں حدیثوں کو محمد بن عجلان سے ابو سعد محمد بن سعد اشہلی کے سوا کسی نے روایت نہیں کیا۔“ [المعجم الأوسط/باب الميم/حدیث: 7693]

سیدہ ام ہانی بنت ابی طالب رضی اللہ عنہا سے روایت ہے کہ انہوں نے نبی کریم صلی اللہ علیہ وسلم سے عرض کیا: ”میں بوڑھی اور کمزور ہو چکی ہوں، لہٰذا مجھے کوئی ایسا عمل بتا دیجیے جو میں بیٹھے بیٹھے کر سکوں۔“ تو آپ صلی اللہ علیہ وسلم نے فرمایا: ”اگر تم سو مرتبہ اللہ کی بڑائی بیان کرو (اللہ اکبر کہو) تو یہ تمہارے لیے جھول پہنائے ہوئے، مقبول سو اونٹوں (کی قربانی) سے بہتر ہے، اور اگر سو مرتبہ تسبیح (سبحان اللہ) کہو تو یہ تمہارے لیے سو غلام آزاد کرنے سے بہتر ہے، اور اگر سو مرتبہ اللہ کی حمد (الحمد للہ) کہو تو یہ تمہارے لیے زین اور لگام سے آراستہ سو گھوڑوں سے بہتر ہے جن پر تم اللہ کی راہ میں سوار کراؤ، اور اگر سو مرتبہ تہلیل (لا الٰہ الا اللہ) کہو تو کوئی عمل اس سے آگے نہیں بڑھ سکتا اور اس کے ہوتے ہوئے کوئی گناہ باقی نہیں رہتا۔“
امام طبرانی رحمہ اللہ فرماتے ہیں: ”اس حدیث کو محمد بن عجلان سے حاتم کے سوا کسی نے روایت نہیں کیا۔“ [المعجم الأوسط/باب الميم/حدیث: 7694]

سیدنا عبداللہ بن مسعود رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”قیامت سے پہلے سود، زنا اور شراب (کی کثرت) ظاہر ہو جائے گی۔“
امام طبرانی رحمہ اللہ فرماتے ہیں: ”اس حدیث کو بشیر ابو اسماعیل سے حاتم بن اسماعیل کے سوا کسی نے روایت نہیں کیا۔“ [المعجم الأوسط/باب الميم/حدیث: 7695]

سیدنا عبداللہ بن عمرو رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”شعر بھی کلام ہی کے درجے میں ہے، لہٰذا اس کی اچھی بات اچھے کلام کی طرح (اچھی) ہے اور اس کی بری بات برے کلام کی طرح (بری) ہے۔“
امام طبرانی رحمہ اللہ فرماتے ہیں: ”یہ حدیث رسول اللہ صلی اللہ علیہ وسلم سے اسی سند کے ساتھ ہی روایت کی جاتی ہے، اس میں عبدالرحمن بن زیاد منفرد ہیں۔“ [المعجم الأوسط/باب الميم/حدیث: 7696]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”تم میں مجھے سب سے زیادہ محبوب وہ لوگ ہیں جو اخلاق میں سب سے اچھے ہیں، جو نرم خو اور خوش مزاج ہیں، جو دوسروں سے الفت رکھتے ہیں اور دوسرے ان سے الفت رکھتے ہیں۔ اور اللہ کے نزدیک تم میں سب سے ناپسندیدہ وہ لوگ ہیں جو چغلی کھاتے پھرتے ہیں، دوستوں اور پیاروں کے درمیان جدائی ڈالتے ہیں اور بے گناہ لوگوں کے لیے مشقت اور عیب تلاش کرتے ہیں۔“
امام طبرانی رحمہ اللہ فرماتے ہیں: ”اس حدیث کو جریری سے صالح المری کے سوا کسی نے روایت نہیں کیا۔“ [المعجم الأوسط/باب الميم/حدیث: 7697]

ام المومنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ وسلم نے فرمایا: ”حبشی (سیاہ فام) جب بھوکا ہوتا ہے تو چوری کرتا ہے اور جب سیر ہوتا ہے تو زنا کرتا ہے، اور ان میں دو بہترین خصلتیں بھی ہیں: سخاوت اور بہادری۔“
امام طبرانی رحمہ اللہ فرماتے ہیں: ”اس حدیث کو محمد بن اسحاق سے، انہوں نے ہشام بن عروہ سے، یحییٰ بن سعید اموی کے سوا کسی نے روایت نہیں کیا۔“ [المعجم الأوسط/باب الميم/حدیث: 7698]

سیدنا جابر رضی اللہ عنہما سے روایت ہے کہ نبی کریم صلی اللہ علیہ وسلم نے قبر پر کچھ لکھنے سے منع فرمایا۔
امام طبرانی رحمہ اللہ فرماتے ہیں: ”اس حدیث کو قیس سے عبدالرحیم کے سوا کسی نے روایت نہیں کیا۔“ [المعجم الأوسط/باب الميم/حدیث: 7699]

سیدنا زید بن خالد جہنی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے کسی غازی کو (جہاد کا) سامان مہیا کیا، یا کسی روزہ دار کا روزہ افطار کروایا، یا کسی حاجی کو (حج کا) سامان مہیا کیا، تو اس کو بھی اتنا ہی اجر ملے گا، اور اس (غازی، روزہ دار یا حاجی) کے اجر میں کوئی کمی نہیں ہوگی۔“ [المعجم الأوسط/باب الميم/حدیث: 7700]