حضرت طارق رحمہ اللہ سے روایت ہے کہ میں نے حضرت سعید بن مسیب رحمہ اللہ کو فرماتے سنا کہ کاشتکاری تین قسم ہی کی ہو سکتی ہے: اپنی مملوکہ زمین میں کاشت کی جائے، وقتی عطیے کے طور پر ملی ہوئی زمین میں کاشت کی جائے یا خالی زمین سونے چاندی (یعنی روپے پیسے) کے عوض ٹھیکے پر لے کر کاشت کی جائے۔ امام زہری رحمہ اللہ نے کلامِ اول کو سعید بن مسیب رحمہ اللہ سے روایت کیا اور انہوں نے اسے مرسل بیان کیا ہے۔ [سنن نسائي/كتاب المزارعة/حدیث: 3923]

حضرت سعید بن مسیب رضی اللہ عنہ سے مروی ہے کہ رسول اللہ صلی اللہ علیہ وسلم نے ”محاقلہ اور مزابنہ سے منع فرمایا ہے“۔ محمد بن عبدالرحمن بن لبیبہ نے اسے سعید بن مسیب سے روایت کیا اور انہوں نے کہا کہ یہ سعد بن ابی وقاص رضی اللہ عنہ سے مروی ہے۔ [سنن نسائي/كتاب المزارعة/حدیث: 3924]

حضرت سعد بن ابی وقاص رضی اللہ عنہ سے مروی ہے کہ رسول اللہ صلی اللہ علیہ وسلم کے زمانے میں فالتو زمین رکھنے والے اپنی زمینیں پانی کے نالوں کے قریب اگنے والی فصل کے عوض بٹائی پر دیا کرتے تھے۔ پھر (بسا اوقات) لوگ رسول اللہ صلی اللہ علیہ وسلم کے پاس حاضر ہو کر اس کی بابت آپس میں لڑتے جھگڑتے، چنانچہ رسول اللہ صلی اللہ علیہ وسلم نے ان کو اس طرح بٹائی پر دینے سے منع کر دیا اور فرمایا: ”سونے چاندی (روپے پیسے) کے عوض ٹھیکے پر دیا کرو۔“ سلیمان نے رافع سے یہ حدیث بیان کی تو کہا: «عَنْ رَجُلٍ مِنْ عُمُومَتِهِ» (ان کے چچاؤں میں سے ایک صاحب سے)۔ [سنن نسائي/كتاب المزارعة/حدیث: 3925]

حضرت رافع بن خدیج رضی اللہ عنہ سے مروی ہے کہ ہم رسول اللہ صلی اللہ علیہ وسلم کے زمانے میں اپنی زمینیں پیداوار کی تہائی یا چوتھائی یا مقررہ مقدار میں غلے کے عوض بٹائی پر دیا کرتے تھے۔ ایک دن میرے چچاؤں میں سے کوئی صاحب آئے اور کہنے لگے: رسول اللہ صلی اللہ علیہ وسلم نے مجھے ایسے کام سے روک دیا ہے جو ہمارے لیے بہت مفید تھا، جبکہ اللہ تعالیٰ اور اس کے رسول صلی اللہ علیہ وسلم کی اطاعت ہمارے لیے ہر چیز سے بڑھ کر مفید ہے۔ آپ صلی اللہ علیہ وسلم نے ہمیں زمینیں پیداوار کے تہائی یا چوتھائی حصے یا معین غلے کے عوض بٹائی پر دینے سے منع فرما دیا ہے، اور آپ صلی اللہ علیہ وسلم نے زمین کے مالک کو حکم دیا ہے کہ ”وہ خود کاشت کرے یا کسی (مسلمان بھائی) کو بلا معاوضہ کاشت کے لیے دے دے۔“ آپ صلی اللہ علیہ وسلم نے بٹائی ٹھیکے وغیرہ کو سخت ناپسند فرمایا ہے۔ ایوب نے یعلی بن حکیم سے یہ حدیث نہیں سنی۔ [سنن نسائي/كتاب المزارعة/حدیث: 3926]

ایوب بیان کرتے ہیں کہ یعلی بن حکیم نے مجھے لکھا ہے کہ میں نے سلیمان بن یسار سے سنا، وہ حضرت رافع بن خدیج رضی اللہ عنہ سے حدیث بیان کرتے تھے کہ حضرت رافع بن خدیج رضی اللہ عنہ نے فرمایا: ہم اپنی فالتو زمینیں پیداوار کی تہائی یا چوتھائی یا معین غلے کے عوض بٹائی پر دیا کرتے تھے۔ سعید نے یہ روایت یعلی بن حکیم سے بیان کی ہے۔ [سنن نسائي/كتاب المزارعة/حدیث: 3927]

حضرت رافع بن خدیج رضی اللہ عنہ سے مروی ہے کہ ہم رسول اللہ صلی اللہ علیہ وسلم کے زمانے میں زمین بٹائی پر دیا کرتے تھے، پھر میرے ایک چچا آئے اور کہنے لگے: مجھے رسول اللہ صلی اللہ علیہ وسلم نے اس کام سے روک دیا ہے جو ہمارے لیے مفید تھا، لیکن اللہ اور اس کے رسول کی اطاعت ہمارے لیے ہر چیز سے بڑھ کر مفید ہے، ہم نے پوچھا: وہ کون سا کام ہے؟ انہوں نے کہا: رسول اللہ صلی اللہ علیہ وسلم نے فرمایا ہے: ”جس شخص کے پاس زمین ہو، وہ اسے خود کاشت کرے یا اپنے کسی بھائی کو (بطور تحفہ) کاشت کے لیے دے دے اور اسے پیداوار کے تہائی یا چوتھائی یا معین غلے کے عوض کرایہ پر نہ دے۔“ اس حدیث کو حنظلہ بن قیس نے حضرت رافع رضی اللہ عنہ سے روایت کیا ہے (اور حنظلہ سے ربیعہ نے روایت کیا ہے) تو ربیعہ پر اس حدیث کی روایت میں (اس کے شاگردوں کی طرف سے) اختلاف کیا گیا ہے۔ [سنن نسائي/كتاب المزارعة/حدیث: 3928]

حضرت رافع بن خدیج رضی اللہ عنہ سے روایت ہے، کہتے ہیں کہ مجھے میرے چچا نے بیان فرمایا کہ ہم رسول اللہ صلی اللہ علیہ وسلم کے دور میں نالوں کے قریب اگنے والی کھیتی یا متعین غلہ جسے زمین والا خود مستثنیٰ کرتا تھا، کے عوض زمین کرائے پر دیتے تھے۔ پھر رسول اللہ صلی اللہ علیہ وسلم نے ہمیں اس کام سے منع فرما دیا۔ (راوی کہتا ہے:) میں نے حضرت رافع رضی اللہ عنہ سے پوچھا: دینار اور درہم (روپے پیسے) کے عوض ٹھیکے پر زمین دینا کیسا ہے؟ تو حضرت رافع رضی اللہ عنہ نے فرمایا: سونے چاندی (روپے پیسے) کے عوض ٹھیکے پر دینے میں کوئی حرج نہیں۔ امام اوزاعی رحمہ اللہ نے اس (لیث) کی مخالفت کی ہے۔ [سنن نسائي/كتاب المزارعة/حدیث: 3929]

حضرت حنظلہ بن قیس انصاری رحمہ اللہ سے روایت ہے کہ میں نے حضرت رافع بن خدیج رضی اللہ عنہ سے سونے چاندی (روپے پیسے) کے عوض زمین کرائے پر دینے سے متعلق پوچھا تو انہوں نے فرمایا: اس میں کوئی حرج نہیں۔ اصل بات یہ تھی کہ رسول اللہ صلی اللہ علیہ وسلم کے دور میں لوگ اپنی زمینیں نالوں کے ساتھ ساتھ اور نالوں (موہگوں) کے سامنے اگنے والی فصل کے عوض بٹائی پر دیتے تھے۔ کبھی اس حصے کی فصل محفوظ رہتی اور دوسرے حصے کی ضائع ہو جاتی، کبھی دوسرے حصے کی فصل محفوظ رہتی اور اس حصے کی فصل ضائع ہو جاتی۔ اس وقت زمین کے کرائے کی یہ شکل ہی رائج تھی، اس لیے آپ صلی اللہ علیہ وسلم نے اس سے منع فرما دیا۔ لیکن کوئی اور معلوم اور معین چیز (رقم) مقرر کر لی جائے جس کا کوئی ضامن بھی ہو تو کوئی حرج نہیں۔ مالک بن انس رحمہ اللہ نے اس (اوزاعی) کی سند میں موافقت کی ہے اور اس (اوزاعی) کے الفاظ میں اس کی مخالفت کی ہے۔ [سنن نسائي/كتاب المزارعة/حدیث: 3930]

حضرت حنظلہ بن قیس رضی اللہ عنہ سے روایت ہے، فرماتے ہیں کہ میں نے حضرت رافع بن خدیج رضی اللہ عنہ سے زمین کرائے پر دینے کے بارے میں پوچھا۔ انہوں نے فرمایا: رسول اللہ صلی اللہ علیہ وسلم نے ”زمین کرائے (بٹائی) پر دینے سے منع فرمایا ہے۔“ میں نے کہا: سونے چاندی (دینار، درہم یعنی روپے پیسے) کے ساتھ بھی؟ انہوں نے کہا: نہیں۔ آپ صلی اللہ علیہ وسلم نے تو صرف ”زمین کی پیداوار کے عوض دینے سے منع فرمایا تھا۔“ سونے چاندی کے عوض تو کوئی حرج نہیں۔ سفیان ثوری رحمہ اللہ نے بھی یہ روایت ربیعہ سے بیان کی ہے، لیکن انہوں نے اسے مرفوع بیان نہیں کیا۔ (لیکن اس کا کوئی نقصان نہیں ہے کیونکہ اکثر لوگوں نے اسے مرفوع بیان کیا ہے)۔ [سنن نسائي/كتاب المزارعة/حدیث: 3931]

حضرت حنظلہ بن قیس رحمہ اللہ سے مروی ہے، کہتے ہیں کہ میں نے حضرت رافع بن خدیج رضی اللہ عنہ سے خالی زمین سونے چاندی کے عوض ٹھیکے پر دینے کے بارے میں پوچھا تو انہوں نے کہا: جائز ہے، اس میں کوئی حرج نہیں، منع تو تب ہے جب زمین کی پیداوار کے حصے کے عوض دی جائے۔ یحییٰ بن سعید رحمہ اللہ نے بھی یہ روایت حنظلہ بن قیس رحمہ اللہ سے بیان کی ہے اور انہوں نے اسے مرفوع بیان کیا ہے، جس طرح کہ امام مالک بن انس رحمہ اللہ نے ربیعہ رحمہ اللہ سے مرفوع بیان کیا ہے۔ [سنن نسائي/كتاب المزارعة/حدیث: 3932]