حضرت عکرمہ فرماتے ہیں کہ جب حضرت علی رضی اللہ عنہ نے حضرت فاطمہ رضی اللہ عنہا سے شرعی ملاقات کا ارادہ کیا تو حضور صلی اللہ علیہ وسلم نے فرمایا کہ انہیں مہر کا کچھ حصہ ادا کردو۔ [مصنف ابن ابي شيبه/كتاب النكاح/حدیث: 17237]

حضرت ابو حمزہ فرماتے ہیں کہ ایک مرتبہ میں حضرت عبد اللہ بن عباس رضی اللہ عنہما کے پاس موجود تھا، ان سے ایک آدمی نے سوال کیا کہ ایک آدمی نے شادی کی ہے لیکن وہ اس کا مہر ادا کرنے سے عاجز آگیا ہے۔ اس کے لئے کیا حکم ہے؟ حضرت ابن عباس رضی اللہ عنہما نے فرمایا کہ اگر اور کچھ نہ ہو تو اسے اپنی جوتی ہی دے دو پھر اس کے ساتھ شرعی ملاقات کرو۔ [مصنف ابن ابي شيبه/كتاب النكاح/حدیث: 17238]

حضرت سعید بن جبیر فرماتے ہیں کہ اسے شرعی ملاقات سے پہلے کچھ نہ کچھ ضرور دے خواہ ایک دوپٹہ ہی دے دے۔ [مصنف ابن ابي شيبه/كتاب النكاح/حدیث: 17239]

حضرت ابن سیرین فرمایا کرتے تھے کہ اسے خواہ ایک کپڑا ہی دے پھر اس کے ساتھ شرعی ملاقات کرے۔ [مصنف ابن ابي شيبه/كتاب النكاح/حدیث: 17240]

حضرت حسن اور حضرت ابراہیم نے اس بات کو مکروہ قرار دیا ہے کہ آدمی بیوی کو مہر کا کچھ حصہ دیئے بغیر اس سے شرعی ملاقات کرے۔ [مصنف ابن ابي شيبه/كتاب النكاح/حدیث: 17241]

حضرت ابراہیم سے بھی یہی منقول ہے کہ ان دونوں (حسن اور ابراہیم) نے اس بات کو مکروہ قرار دیا کہ آدمی بیوی کو مہر کا کچھ حصہ دیئے بغیر اس سے شرعی ملاقات کرے۔ [مصنف ابن ابي شيبه/كتاب النكاح/حدیث: 17242]

حضرت ضحاک بن عثمان فرماتے ہیں کہ حضرت زہری سے اس شخص کے بارے میں سوال کیا گیا جو شادی کے بعد عورت کا مہر دینے پر قدرت رکھتا ہو کیا وہ بیوی کو کچھ دیئے بغیر اس سے جماع کرسکتا ہے؟ انہوں نے فرمایا کہ سنت یہی رہی ہے کہ جب تک کوئی نہ کوئی چیز ادا نہ کردے شرعی ملاقات نہ کرے۔ [مصنف ابن ابي شيبه/كتاب النكاح/حدیث: 17243]

حضرت قتادہ فرماتے ہیں کہ شرعی ملاقات سے پہلے کوئی چیز اسے ہدیہ میں دے دے۔ [مصنف ابن ابي شيبه/كتاب النكاح/حدیث: 17244]

حضرت ابن عمر رضی اللہ عنہما فرماتے ہیں کہ مسلمان کے لئے حلال نہیں کہ وہ اپنی بیوی کو کوئی تھوڑی یا زیادہ چیز دیئے بغیر اس سے شرعی ملاقات کرے۔ [مصنف ابن ابي شيبه/كتاب النكاح/حدیث: 17245]

حضرت عکرمہ فرماتے ہیں کہ حضور صلی اللہ علیہ وسلم نے حضرت علی رضی اللہ عنہ سے فرمایا کہ اپنی زوجہ کو اپنی حطمی زرہ ہی دے دو۔ [مصنف ابن ابي شيبه/كتاب النكاح/حدیث: 17246]