آنحضرت صلی اللہ علیہ وسلم نے بیع میں عُرْبان کو حلال قرار دیا ہے۔ عربان کہتے ہیں کہ ایک شخص کسی چیز کی کچھ قیمت ادا کر دے اور کہہ دے کہ اگر بیع مکمل ہوگئی تو یہ اس کا ثمن میں شمار ہوگا وگرنہ یہ رقم تیری میں آپ سے وصول نہ کروں گا۔ [مصنف ابن ابي شيبه/كتاب البيوع والأقضية/حدیث: 24728]

حضرت سعید بن المسیب رحمہ اللہ فرماتے ہیں کہ چکنائی میں، چارے میں اور کھانے میں عربان درست نہیں ہے، اور عربان ان کے علاوہ میں ہے۔ [مصنف ابن ابي شيبه/كتاب البيوع والأقضية/حدیث: 24729]

حضرت مجاہد عُرْبان میں کوئی حرج نہ سمجھتے تھے۔ [مصنف ابن ابي شيبه/كتاب البيوع والأقضية/حدیث: 24730]

حضرت ابن سیرین رحمہ اللہ اس میں کوئی حرج نہ سمجھتے تھے کہ کوئی شخص ملاح یا کسی اور کو یہ کہہ کر عُرْبان کی رقم دے کہ اگر میں فلاں فلاں وقت تک اس کو لے کر آگیا تو ٹھیک، وگرنہ یہ رقم تیری۔ [مصنف ابن ابي شيبه/كتاب البيوع والأقضية/حدیث: 24731]

حضرت حمزہ بن عبد اللہ بن عمر رحمہ اللہ ارشاد فرماتے ہیں کہ ہم لوگ حضرت ابن عمر رضی اللہ عنہما کے سامنے کپڑوں کی بیع کرتے، جو فدیہ دیتا تو وہ درہم فدیہ دیتا، پس وہ نہ ہمیں حکم کرتے اور نہ ہی ہمیں روکتے۔ [مصنف ابن ابي شيبه/كتاب البيوع والأقضية/حدیث: 24732]

آنحضرت صلی اللہ علیہ وسلم نے بیع میں عُرْبان کو حلال قرار دیا تھا۔ [مصنف ابن ابي شيبه/كتاب البيوع والأقضية/حدیث: 24733]

حضرت عبد الرحمن بن فروخ سے مروی ہے کہ حضرت نافع بن عبد الحارث نے صفوان بن امیہ سے چار ہزار درہم میں جیل خانہ اس شرط پر خریدا کہ اگر حضرت عمر رضی اللہ عنہ راضی ہوئے تو بیع ہے اور اگر حضرت عمر رضی اللہ عنہ راضی نہ ہوئے تو چار سو درہم صفوان کے ہوں گے۔ [مصنف ابن ابي شيبه/كتاب البيوع والأقضية/حدیث: 24734]

حضرت ابن سیرین رحمہ اللہ اس شخص کے متعلق فرماتے تھے کہ جو کرایہ پر گھر یا کشتی لے یہ کہہ کر کہ اگر میں تمہارے پاس فلاں فلاں وقت تک آگیا تو ٹھیک وگرنہ یہ رقم تمہاری ہے، فرمایا: اگر وہ نہ آیا تو رقم اس کی ہوگی۔ [مصنف ابن ابي شيبه/كتاب البيوع والأقضية/حدیث: 24735]

حضرت عطاء اور حضرت طاؤس رحمہ اللہ بیع میں عُرْبان کو ناپسند کرتے تھے۔ [مصنف ابن ابي شيبه/كتاب البيوع والأقضية/حدیث: 24736]

حضرت ابن طاؤس اپنے والد سے روایت کرتے ہیں کہ ان دونوں نے بیع میں عُرْبان کو ناپسند کیا۔ [مصنف ابن ابي شيبه/كتاب البيوع والأقضية/حدیث: 24737]