عبداللہ بن بریدہ اپنے والد کا یہ بیان نقل کرتے ہیں نبی کریم صلی اللہ علیہ وسلم نے یہ بات ارشاد فرمائی ہے: ”مغرب کی نماز کے علاوہ ہر اذان اور اقامت کے درمیان دو رکعت (نفل یا سنت) ادا کی جائیں گی۔“ [سنن الدارقطني/ كِتَابُ الصَّلَاةِ/حدیث: 1040]

حیان بن عبیداللہ عدوی بیان کرتے ہیں: ایک مرتبہ ہم حضرت عبداللہ بن بریدہ رضی اللہ عنہ کے پاس بیٹھے ہوئے تھے موذن نے ظہر کی نماز کے لیے اذان دی جب سیدنا عبداللہ رضی اللہ عنہ نے اذان سنی تو فرمایا: ”اٹھو اور اقامت سے پہلے دو نفل ادا کرو۔“ کیونکہ میرے والد نے یہ بات بیان کی ہے: نبی کریم صلی اللہ علیہ وسلم نے یہ بات ارشاد فرمائی ہے: ”مغرب کی اذان کے علاوہ ہر دو اذانوں (یعنی اذان اور اقامت کے درمیان) اقامت سے پہلے دو رکعت ادا کی جائیں گی۔“ عبداللہ بن بریدہ فرماتے ہیں: میں نے سیدنا عبداللہ بن عمر کو مغرب کے وقت بھی ان دو رکعت کو ادا کرتے ہوئے دیکھا ہے وہ انہیں کسی بھی حالت میں ترک نہیں کرتے تھے۔ راوی بیان کرتے ہیں: ہم اٹھے اور ہم نے اقامت سے پہلے دو رکعت ادا کر لیں پھر ہم انتظار کرنے لگے یہاں تک کہ امام تشریف لائے تو ہم نے ان کی اقتداء میں فرض نماز ادا کی۔ حسین معلم، سعید جریری، کہمس بن حسن، نے ان کے برخلاف روایت نقل کی ہے، یہ تمام راوی ثقہ ہیں، جبکہ حیان بن عبیداللہ نامی راوی زیادہ مستند نہیں ہیں باقی اللہ بہتر جانتا ہے۔ [سنن الدارقطني/ كِتَابُ الصَّلَاةِ/حدیث: 1041]

عبداللہ بن بریدہ، سیدنا عبداللہ مزنی کا یہ بیان نقل کرتے ہیں نبی کریم صلی اللہ علیہ وسلم نے یہ بات ارشاد فرمائی ہے: ”مغرب کے فرائض سے پہلے دو رکعت نوافل ادا کر لو۔“ پھر نبی کریم صلی اللہ علیہ وسلم نے یہ ارشاد فرمایا: ”مغرب کے فرائض سے پہلے دو رکعت ادا کر لو، یہ حکم اس کے لیے جو چاہے۔“ (راوی کہتے ہیں) نبی کریم صلی اللہ علیہ وسلم نے اس اندیشے کے تحت یہ فرمایا کہیں لوگ اسے سنت کے طور پر اختیار نہ کر لیں۔ (امام دارقطنی رحمہ اللہ فرماتے ہیں) یہ روایت پہلے والی روایت کے مقابلے میں زیادہ مستند ہے۔ [سنن الدارقطني/ كِتَابُ الصَّلَاةِ/حدیث: 1042]

سیدنا عبداللہ بن مغفل رضی اللہ عنہ بیان کرتے ہیں: نبی کریم صلی اللہ علیہ وسلم نے ارشاد فرمایا: ”ہر اذان اور اقامت کے درمیان (نفل) نماز ادا کی جائے گی۔“ (یہ جملہ آپ نے دو مرتبہ دہرایا) اور پھر فرمایا: ”یہ حکم اس کے لیے ہے جو اسے ادا کرنا چاہے۔“ [سنن الدارقطني/ كِتَابُ الصَّلَاةِ/حدیث: 1043]

سیدنا عبداللہ بن مغفل رضی اللہ عنہ بیان کرتے ہیں نبی کریم صلی اللہ علیہ وسلم نے یہ بات ارشاد فرمائی ہے: ”جو چاہے وہ اذان اور اقامت کے درمیان (نفل) نماز ادا کرے۔“ [سنن الدارقطني/ كِتَابُ الصَّلَاةِ/حدیث: 1044]

سیدنا عبداللہ بن بریدہ رضی اللہ عنہ اپنے والد کا یہ بیان نقل کرتے ہیں نبی کریم صلی اللہ علیہ وسلم نے یہ بات ارشاد فرمائی ہے: ”ہر اذان اور اقامت کے درمیان (نفل) نماز ادا کی جائے گی، ہر اذان اور اقامت کے درمیان نفل نماز ادا کی جائے ہر اذان اور اقامت کے درمیان جو چاہے نفل ادا کرے۔“ [سنن الدارقطني/ كِتَابُ الصَّلَاةِ/حدیث: 1045]

سیدنا عبداللہ بن زبیر رضی اللہ عنہ بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی ہے: ”ہر فرض نماز سے پہلے دو رکعت (سنت یا نفل) ادا کی جائیں گی۔“ یہ الفاظ ابن داؤد نامی راوی کے ہیں: اسماعیل نامی راوی نے لفظ، مکتوبہ، کی جگہ لفظ، مفروضہ، نقل کیا ہے۔ [سنن الدارقطني/ كِتَابُ الصَّلَاةِ/حدیث: 1046]

سیدنا انس رضی اللہ عنہ بیان کرتے ہیں: بعض اوقات کوئی اجنبی شخص مدینہ منورہ کی مسجد میں داخل ہوتا اور وہاں لوگ مغرب کے وقت نماز ادا کر رہے ہوتے تو یوں محسوس ہوتا کہ شاید لوگ نماز (باجماعت) ادا کر چکے ہیں کیونکہ مغرب کی نماز سے پہلے دو رکعت ادا کرنے والے لوگ اتنے زیادہ ہوتے تھے۔ [سنن الدارقطني/ كِتَابُ الصَّلَاةِ/حدیث: 1047]

عبدالعزیز لبنانی بیان کرتے ہیں: میں نے سیدنا انس بن مالک کو یہ بیان کرتے ہوئے سنا ہے نبی کریم صلی اللہ علیہ وسلم کے اصحاب کا یہ معمول تھا کہ جب موذن مغرب کی اذان دیتا تو وہ تیزی سے ستونوں کی طرف لپکتے تھے تاکہ مغرب سے پہلے دو رکعت ادا کر لیں، اگر کوئی شخص اس وقت وہاں ہوتا تو اتنی تعداد میں ان دو نوافل ادا کرنے والے لوگوں کو دیکھتا تو یہی سمجھتا کہ شاید فرض نماز ادا کی جا چکی ہے۔ [سنن الدارقطني/ كِتَابُ الصَّلَاةِ/حدیث: 1048]

سیدنا انس رضی اللہ عنہ بیان کرتے ہیں: صحابہ کرام جب مغرب کی اذان سنتے تھے تو وہ اٹھ کر نوافل ادا کرنے لگتے تھے یوں جیسے یہ فرض ہیں۔ [سنن الدارقطني/ كِتَابُ الصَّلَاةِ/حدیث: 1049]