سیدنا جابر بن عبداللہ رضی اللہ عنہ بیان کرتے ہیں: ایک مرتبہ نبی کریم صلی اللہ علیہ وسلم نے نماز (باجماعت) کے دوران کچھ لوگوں کو غیر موجود پایا، تو دریافت کیا: ”وہ لوگ نماز میں کیوں شریک نہیں ہوئے؟“ تو لوگوں نے بتایا: انہیں کچھ کام تھا، تو آپ نے ارشاد فرمایا: ”مسجد کے پڑوس میں رہنے والے کی نماز صرف مسجد میں ہوتی ہے۔“ روایت کے یہ الفاظ ابن مخلد کے ہیں، جبکہ ابوحامد نے یہ الفاظ نقل کیے ہیں: ”جو شخص اذان سنے اور (مسجد میں) نہ آئے، اس کی نماز نہیں ہوتی، البتہ اگر کوئی علت (یعنی عذر) ہو، تو (حکم مختلف ہے)۔“ [سنن الدارقطني/ كِتَابُ الصَّلَاةِ/حدیث: 1552]

سیدنا ابوہریرہ رضی اللہ عنہ روایت کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”مسجد کے پڑوس میں رہنے والے کی نماز صرف مسجد میں ہوتی ہے۔“ [سنن الدارقطني/ كِتَابُ الصَّلَاةِ/حدیث: 1553]

سیدنا علی رضی اللہ عنہ فرماتے ہیں: ”جو شخص مسجد کے پڑوس میں رہتا ہو اور موذن کو اذان دیتے ہوئے سنے اور کوئی عذر کے بغیر (نماز کی ادائیگی کے لیے مسجد میں) نہ آئے، تو اس کی نماز نہیں ہوتی۔“ [سنن الدارقطني/ كِتَابُ الصَّلَاةِ/حدیث: 1554]

سیدنا عبداللہ بن عباس رضی اللہ عنہما، نبی کریم صلی اللہ علیہ وسلم کا یہ فرمان نقل کرتے ہیں: ”جو شخص اذان سن کر اس کا جواب نہ دے (یعنی باجماعت نماز ادا کرنے کے لیے مسجد میں نہ آئے)، اس کی نماز نہیں ہوتی، البتہ اگر کوئی عذر ہو، تو (حکم مختلف ہے)۔“ [سنن الدارقطني/ كِتَابُ الصَّلَاةِ/حدیث: 1555]

یہی روایت ایک اور سند کے ہمراہ منقول ہے، جبکہ بعض راویوں نے اسے مرفوع حدیث کے طور پر نقل کیا ہے۔ [سنن الدارقطني/ كِتَابُ الصَّلَاةِ/حدیث: 1556]

سیدنا عبداللہ بن عباس رضی اللہ عنہما بیان کرتے ہیں: نبی کریم صلی اللہ علیہ وسلم نے یہ بات ارشاد فرمائی: ”جو شخص اذان دینے والے کو سنے اور کوئی عذر اس کی بات ماننے (یعنی باجماعت نماز کے لیے جانے) میں رکاوٹ نہ ہو،“ لوگوں نے دریافت کیا: عذر سے کیا مراد ہے؟ آپ نے فرمایا: ”خوف یا بیماری،“ (نبی کریم صلی اللہ علیہ وسلم نے فرمایا:) ”تو اس شخص نے (اپنے گھر میں) جو نماز ادا کی ہے، اللہ اس کی وہ نماز قبول نہیں کرے گا۔“ [سنن الدارقطني/ كِتَابُ الصَّلَاةِ/حدیث: 1557]