شعیب بن رزیق طائفی بیان کرتے ہیں کہ میں ایک صاحب کے ہاں بیٹھا جنہیں رسول اللہ صلی اللہ علیہ وسلم کی صحبت حاصل تھی، انہیں حکم بن حزن کلفی رضی اللہ عنہ کہا جاتا تھا۔ وہ ہم سے بیان کرنے لگے کہ میں ایک وفد میں رسول اللہ صلی اللہ علیہ وسلم کے ہاں حاضر ہوا، میں سات میں سے ساتواں یا نو میں سے نواں فرد تھا۔ ہم آپ صلی اللہ علیہ وسلم کے پاس آئے تو ہم نے کہا: ”اے اللہ کے رسول! ہم آپ کی زیارت کے لیے آئے ہیں، ہمارے لیے دعائے خیر فرمائیے۔“ آپ نے ہمارے لیے کسی قدر کھجوروں کا حکم دیا، حالت ان دنوں بہت کمزور تھی۔ ہم آپ کے ہاں کئی دن مقیم رہے، ہمیں رسول اللہ صلی اللہ علیہ وسلم کے ساتھ جمعہ پڑھنے کا موقع بھی ملا، آپ صلی اللہ علیہ وسلم ایک لاٹھی یا کمان کا سہارا لیے ہوئے کھڑے ہوئے۔ آپ نے اللہ کی حمد و ثنا بیان کی، آپ کے الفاظ مختصر، پاکیزہ اور بابرکت تھے۔ پھر فرمایا: ”لوگو! جو احکام تمہیں دیے جاتے ہیں تم ان سب کی طاقت نہیں رکھتے ہو، یا انہیں ہرگز نہیں کر سکتے ہو، لیکن استقامت و اعتدال اختیار کرو اور خوش ہو جاؤ۔“ جناب ابوعلی رحمہ اللہ (لؤلؤی، تلمیذ امام ابوداؤد رحمہ اللہ) کہتے ہیں کہ میں نے امام ابوداؤد رحمہ اللہ سے سنا، وہ کہتے تھے کہ اس حدیث کا کچھ حصہ مجھے میرے ساتھیوں نے یاد کرایا ہے جو کہ میرے کاغذ سے ضائع ہو گیا تھا۔ [سنن ابي داود/تفرح أبواب الجمعة /حدیث: 1096]

سیدنا عبداللہ بن مسعود رضی اللہ عنہ بیان کرتے ہیں کہ رسول اللہ صلی اللہ علیہ وسلم جب (خطبے میں) تشہد پڑھتے، تو کہا کرتے: «الْحَمْدُ لِلَّهِ، نَسْتَعِينُهُ وَنَسْتَغْفِرُهُ، وَنَعُوذُ بِاللَّهِ مِنْ شُرُورِ أَنْفُسِنَا، مَنْ يَهْدِهِ اللَّهُ فَلَا مُضِلَّ لَهُ، وَمَنْ يُضْلِلْ فَلَا هَادِيَ لَهُ، وَأَشْهَدُ أَنْ لَا إِلَهَ إِلَّا اللَّهُ، وَأَشْهَدُ أَنَّ مُحَمَّدًا عَبْدُهُ وَرَسُولُهُ، أَرْسَلَهُ بِالْحَقِّ بَشِيرًا وَنَذِيرًا بَيْنَ يَدَيِ السَّاعَةِ، مَنْ يُطِعِ اللَّهَ وَرَسُولَهُ فَقَدْ رَشَدَ، وَمَنْ يَعْصِهِمَا فَإِنَّهُ لَا يَضُرُّ إِلَّا نَفْسَهُ، وَلَا يَضُرُّ اللَّهَ شَيْئًا» ”تمام طرح کی حمد و ثنا اللہ کے لیے ہے۔ ہم اس سے مدد چاہتے اور معافی مانگتے ہیں۔ اپنے نفسوں کی شرارتوں سے اللہ کی پناہ چاہتے ہیں۔ جسے اللہ ہدایت دے اسے کوئی گمراہ نہیں کر سکتا اور جسے وہ بھٹکا دے اسے کوئی راہ راست پر نہیں لا سکتا۔ میں گواہی دیتا ہوں کہ اللہ کے سوا اور کوئی معبود برحق نہیں ہے۔ میں گواہی دیتا ہوں کہ محمد صلی اللہ علیہ وسلم اس کے بندے اور اس کے رسول ہیں۔ اللہ نے ان کو قیامت سے پہلے حق کے ساتھ خوشخبری دینے والا اور ڈرانے والا بنا کر بھیجا ہے۔ جس نے اللہ اور اس کے رسول کی اطاعت کی وہ ہدایت پا گیا اور جس نے ان دونوں کی نافرمانی کی وہ اپنا ہی نقصان کرتا ہے، اللہ کا کچھ نہیں بگاڑتا۔“ [سنن ابي داود/تفرح أبواب الجمعة /حدیث: 1097]

جناب یونس سے روایت ہے کہ انہوں نے ابن شہاب رحمہ اللہ سے رسول اللہ صلی اللہ علیہ وسلم کے خطبے کے متعلق پوچھا جو آپ صلی اللہ علیہ وسلم جمعہ کے روز پڑھا کرتے تھے۔ تو اسی (مذکورہ حدیث) کی مانند بیان کیا اور کہا: «وَمَنْ يَعْصِهِمَا فَقَدْ غَوٰی» ”جس نے ان دونوں کی نافرمانی کی وہ بہت بڑے شر میں جا پڑا۔ ہم اپنے اللہ سے، جو ہمارا رب ہے، سوال کرتے ہیں کہ ہمیں ان لوگوں میں سے بنائے جو اس کی اطاعت کرتے ہیں اور اس کے رسول کی، اس کی رضا مندی کے تابع ہوتے اور اس کی ناراضی سے بچتے ہیں۔ بلاشبہ ہم اسی کے ساتھ ہیں اور اسی کے لیے ہیں۔“ [سنن ابي داود/تفرح أبواب الجمعة /حدیث: 1098]

سیدنا عدی بن حاتم رضی اللہ عنہ سے روایت ہے کہ نبی کریم صلی اللہ علیہ وسلم کے سامنے ایک خطیب نے خطبہ دیا اور اس نے کہا «مَنْ يُطِعِ اللَّهَ وَرَسُولَهُ فَقَدْ رَشَدَ، وَمَنْ يَعْصِهِمَا» ”جس نے اللہ اور اس کے رسول کی اطاعت کی، اور جس نے ان دونوں کی نافرمانی کی۔“ آپ صلی اللہ علیہ وسلم نے فرمایا: ”کھڑے ہو جاؤ،“ یا فرمایا: ”چلے جاؤ، تم بہت برے خطیب ہو۔“ [سنن ابي داود/تفرح أبواب الجمعة /حدیث: 1099]

حارث بن نعمان کی صاحبزادی رضی اللہ عنہا بیان کرتی ہیں کہ ”میں نے سورۃ ﴿ق﴾ [سورة ق] رسول اللہ صلی اللہ علیہ وسلم کے منہ مبارک سے سن کر ہی یاد کی ہے، آپ صلی اللہ علیہ وسلم اسے ہر خطبہ جمعہ میں پڑھا کرتے تھے“، بیان کرتی ہیں کہ ”رسول اللہ صلی اللہ علیہ وسلم کا اور ہمارا تنور ایک ہی تھا“۔ امام ابوداؤد رحمہ اللہ کہتے ہیں کہ روح بن عبادہ نے شعبہ سے روایت کرتے ہوئے اس خاتون کا نسب یوں ذکر کیا ”بنت حارثہ بن نعمان“ جبکہ ابن اسحاق نے ”ام ہشام بنت حارثہ بن نعمان“ کہا۔ [سنن ابي داود/تفرح أبواب الجمعة /حدیث: 1100]

سیدنا جابر بن سمرہ رضی اللہ عنہ بیان کرتے ہیں کہ ”رسول اللہ صلی اللہ علیہ وسلم کی نماز اور آپ صلی اللہ علیہ وسلم کا خطبہ درمیانہ درمیانہ ہوتے تھے۔ آپ صلی اللہ علیہ وسلم قرآن کریم کی چند آیات تلاوت فرماتے اور لوگوں کو وعظ و نصیحت فرمایا کرتے تھے۔“ [سنن ابي داود/تفرح أبواب الجمعة /حدیث: 1101]

عمرہ اپنی بہن سے روایت کرتی ہیں، ان کا بیان ہے کہ ”میں نے ﴿ق﴾ [سورة ق] ، رسول اللہ صلی اللہ علیہ وسلم کے دہن مبارک ہی سے (سن کر) یاد کی ہے۔ آپ صلی اللہ علیہ وسلم اسے ہر جمعہ (کے خطبہ میں) پڑھا کرتے تھے۔“ امام ابوداؤد رحمہ اللہ کہتے ہیں کہ یحییٰ بن ایوب اور ابن ابی الرجال نے یحییٰ بن سعید سے، انہوں نے عمرہ سے، انہوں نے ام ہشام بنت حارثہ بن نعمان رضی اللہ عنہا سے ایسے ہی روایت کیا ہے۔ [سنن ابي داود/تفرح أبواب الجمعة /حدیث: 1102]

یحییٰ بن سعید رحمہ اللہ، عمرہ رحمہا اللہ سے، وہ عمرہ بنت عبدالرحمٰن رحمہا اللہ کی بہن سے، جو ان سے بڑی تھیں، ”اس کے ہم معنی روایت ہے۔“ [سنن ابي داود/تفرح أبواب الجمعة /حدیث: 1103]