سیدنا ابن عباس رضی اللہ عنہما فرماتے ہیں: اللہ تعالیٰ نے شب قدر میں پورا قرآن آسمان دنیا پر نازل فرما دیا، پھر اللہ تعالیٰ جب چاہتا اس میں سے کچھ حصہ وحی فرما دیتا یا (شاید یہ فرمایا) اس میں سے کوئی چیز زمین میں پیدا کرنا چاہتا تو پیدا کر دیتا۔ ٭٭ یہ حدیث صحیح الاسناد ہے لیکن امام رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 2913]

سیدنا ابن عباس رضی اللہ عنہما، اللہ تعالیٰ کے اس ارشاد: (اِنَّآ اَنْزَلْنٰہُ فِیْ لَیْلَۃِ الْقَدْرِ) ” بے شک ہم نے اسے شب قدر میں اُتارا “۔ کے متعلق فرماتے ہیں: شب قدر میں پورا قرآن یکبارگی آسمان دنیا پر نازل کیا گیا اور وہ ستاروں کے مقامات پر تھا پھر اللہ تعالیٰ اس میں سے یکے بعد دیگرے (تھوڑا تھوڑا) رسول اللہ صلی اللہ علیہ وسلم پر نازل کرتا رہا۔ (دراصل) لوگ اس طرح کی باتیں کر رہے تھے: لَوْ لَا نُزِّلَ عَلَیْہِ الْقُرْاٰنُ جُمْلَۃً وَّاحِدَۃً کَذٰلِکَ لِنُثَبِّتَ بِہٖ فُؤَادَکَ وَ رَتَّلْنٰہُ تَرْتِیلًا ” قرآن ان پر ایک ساتھ کیوں نہ اتار دیا ہم نے یونہی بتدریج اسے اتارا ہے کہ اس سے تمہارا دل مضبوط کریں اور ہم نے اسے ٹھہر ٹھہر کر پڑھا “۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 2914]

سیدنا ابن عباس رضی اللہ عنہما فرماتے ہیں: اللہ تعالیٰ نے شب قدر میں یکبارگی پورا قرآن آسمان دنیا پر نازل فرمایا پھر اس کے بعد 20 سالوں میں (بتدریج) نازل کیا۔ (وَلَا یَاْتُوْنَکَ بِمَثَلٍ اِلَّا جِئْنٰکَ بِالْحَقِّ وَ اَحْسَنَ تَفْسِیْرً) (الفرقان: 33) ” اور وہ کوئی کہاوت تمہارے پاس نہ لائیں گے مگر ہم حق اور اس سے بہتر بیان لے آئیں گے “۔ (،) (وقرآنًا فرقناہ لتقراہ علی الناس علی مکث ونزّلناہ تنزیلاً) (الاسراء: 106) ” اور قرآن ہم نے جدا جدا کر کے اتارا کہ تم اسے لوگوں پر ٹھہر ٹھہر کر پڑھو اور ہم نے اسے بتدریج رہ رہ کر اتارا “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 2915]

سیدنا ابوہریرہ رضی اللہ عنہ فرماتے ہیں: جب رسول اللہ صلی اللہ علیہ وسلم پر وحی نازل ہوا کرتی تھی تو جب تک وحی نازل ہوتی رہتی، اس وقت تک ہم میں سے کسی میں بھی یہ ہمت نہ ہوتی تھی کہ آپ کے چہرۂ اطہر کی طرف نظر اٹھا کر دیکھ سکیں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 2916]

سیدنا ابن عباس رضی اللہ عنہما فرماتے ہیں: قرآن کی تفصیل ذکر سے کی گئی اور اس کو آسمان دنیا میں عزت کے مقام پر رکھا گیا۔ سیدنا جبریل امین علیہ السلام وہاں سے نبی اکرم صلی اللہ علیہ وسلم پر اتارتے رہتے اور ٹھہر ٹھہر کر پڑھتے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 2917]

سیدنا ابوہریرہ رضی اللہ عنہ روایت کرتے ہیں کہ رسول اللہ صلی اللہ علیہ وسلم نے ارشاد فرمایا: قرآن پاک میں بحث ” کفر “ ہے۔ ٭٭ یہ حدیث ابوسلمہ سے روایت کرنے میں عمر بن ابی سلمہ نے علقمہ کی متابعت کی ہے (جیسا کہ درج ذیل ہے)۔ [المستدرك على الصحيحين/كِتَابُ التَّفْسِيرِ/حدیث: 2918]