سیدنا (عبداللہ) بن عباس رضی اللہ عنہما فرمایا کرتے تھے: مجھ سے سورۃ النساء کے بارے میں پوچھ لیا کرو کیونکہ میں نے بچپن میں ہی قرآن پاک پڑھ لیا تھا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3217]

سیدنا (عبداللہ) بن عباس رضی اللہ عنہما (اللہ تعالیٰ کے ارشاد): وَ اتَّقُوا اللّٰہَ الَّذِیْ تَسَآئَلُوْنَ بِہٖ وَ الْاَرْحَامَ (النساء: 1) ” اور اللہ سے ڈرو، جس کے نام پر مانگتے ہو اور رشتوں کا لحاظ رکھو “۔ کے متعلق فرمایا: بے شک رحم (رشتہ داریوں) کو تو اڑا جاتا ہے اور نعمت کی ناشکری کی جاتی ہے اور جب اللہ تعالیٰ دلوں میں قربت ڈال دیتا ہے تو کوئی چیز کبھی بھی ان کو دور نہیں کر سکتی پھر آپ نے یہ آیت پڑھی: لَوْ اَنْفَقْتَ مَا فِی الْاَرْضِ جَمِیْعًا مَّآ اَلَّفْتَ بَیْنَ قُلُوْبِھِمْ (الانفال: 63) ” اگر تم زمین میں جو کچھ ہے سب خرچ کر دیتے ان کے دل نہ ملا سکتے “۔ پھر آپ نے کہا: رسول اللہ صلی اللہ علیہ وسلم نے ارشاد فرمایا:” رحم “ رحمن کی شاخ ہے اور یہ قیامت کے دن فصیح و بلیغ زبان میں باتیں کرتا آئے گا، یہ جس کی طرف اشارہ کر کے کہہ دے گا کہ یہ صلہ رحمی کیا کرتا تھا، اللہ تعالیٰ اس کو (جنت سے) ملا دے گا اور جس کی طرف اشارہ کر کے کہہ دے گا کہ یہ قطع رحمی کرتا تھا، اللہ تعالیٰ اس کو (جنت سے) قطع (یعنی الگ) کر دے گا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اسے اس اسناد کے ہمراہ نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3218]

سیدنا انس بن مالک رضی اللہ عنہ فرماتے ہیں: سیدنا ابوطلحہ رضی اللہ عنہ اور سیدنا ام سلیم رضی اللہ عنہ کے درمیان کچھ ناچاقی تھی، سیدنا ابوطلحہ رضی اللہ عنہ نے سیدنا ام سلیم رضی اللہ عنہ کو طلاق دینے کا ارادہ کر لیا، یہ بات نبی اکرم صلی اللہ علیہ وسلم تک پہنچی تو آپ صلی اللہ علیہ وسلم نے فرمایا: ام سلیم کو طلاق دینا ” حوب “ (گناہ) ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3219]