سیدنا ابوسعید خدری رضی اللہ عنہ سے روایت ہے کہ رسول اللہ صلی اللہ علیہ وسلم : تَلْفَحُ وُجُوْھَھُمُ النَّارُ وَھُمْ فِیْھَا کِٰالحُوْنَ (المؤمنون: 104) ” ان کے منہ پر آگ لپیٹ مارے گی اور وہ اس میں منہ چڑائے ہوں گے “۔ کے متعلق فرماتے ہیں: آگ ان کو بھون ڈالے گی جس کی وجہ سے ان کا اوپر کا ہونٹ اوپر کی جانب سکڑ جائے گا حتیٰ کہ سر کے درمیان تک جا پہنچے گا اور نیچے کا ہونٹ ناف تک لٹک جائے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3532]

سیدنا عبداللہ بن مسعود رضی اللہ عنہ اللہ تعالیٰ کے ارشاد: وَھُمْ فِیْھَا کٰالحُوْنَ (المؤمنون: 104) ” اور وہ اس میں منہ چڑائے ہوں گے “۔ کے متعلق فرماتے ہیں: جیسے آگ پر بھنی ہوئی سری کے ہونٹ سکڑ کر دانت ننگے ہو جاتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اسے نقل نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3533]

سیدنا عبداللہ بن عمرو بن العاص رضی اللہ عنہ فرماتے ہیں: دوزخی لوگ جہنم کے داروغہ ” مالک “ کو چالیس سال تک پکارتے رہیں گے، اس کے بعد وہ ان کو جواب دے گا کہ تم جہنم ہی میں پڑے رہو (سیدنا عبداللہ بن عمرو بن العاص رضی اللہ عنہ) کہتے ہیں: ان کی پکار کو ذلیل کر دیا جائے گا اور داروغہ جہنم کا رب تو اللہ تعالیٰ ہی ہے: قَالُوْا رَبَّنَا غَلَبَت عَلَیْنَا شِقْوَتُنَا وَکُنَّا قَوْمًا ضَآلِّیْنَ (المؤمنون: 106) ” کہیں گے: اے ہمارے رب! ہم پر ہماری بدبختی غالب آ گئی اور ہم گمراہ لوگ تھے “۔ قَالَ اخْسَئُوْا فِیْھَا وَلَا تُکَلِّمُوْنِ (المؤمنون: 108) ” رب فرمائے گا: دھتکارے (خائب و خاسر) پڑے رہو اور مجھ سے بات نہ کرو “۔ [المستدرك على الصحيحين/كِتَابُ التَّفْسِيرِ/حدیث: 3534]