سیدنا جابر بن عبداللہ رضی اللہ عنہما فرماتے ہیں: میں نبی اکرم صلی اللہ علیہ وسلم کے ہمراہ ایک خاتون کے پاس گیا، اس نے ہماری خاطر ایک بکری ذبح کی، رسول اللہ صلی اللہ علیہ وسلم نے فرمایا: (ابھی عنقریب) تمہارے پاس ایک جنتی آدمی آئے گا “ چنانچہ سیدنا ابوبکر رضی اللہ عنہ تشریف لے آئے، پھر آپ صلی اللہ علیہ وسلم نے فرمایا: (ابھی) تمہارے پاس ایک جنتی آدمی آئے گا “ چنانچہ سیدنا عمر رضی اللہ عنہ تشریف لے آئے، آپ صلی اللہ علیہ وسلم نے پھر فرمایا: (ابھی) تمہارے پاس ایک جنتی آدمی آئے گا، اے اللہ! اگر تو چاہے تو اس کو علی بنا دے (سیدنا جابر بن عبداللہ رضی اللہ عنہما) فرماتے ہیں: چنانچہ (اب کی بار) سیدنا علی رضی اللہ عنہ ہی تشریف لائے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4712]

سیدنا سلمان رضی اللہ عنہ فرماتے ہیں: رسول اللہ صلی اللہ علیہ وسلم نے ارشاد فرمایا: تم میں سے حوض کوثر پر سب سے پہلے آنے والا وہ ہو گا جو تم میں سب سے پہلے اسلام قبول کرنے والا ہے، (یعنی) سیدنا علی بن ابی طالب رضی اللہ عنہ ہیں۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4713]

سیدنا زید بن ارقم رضی اللہ عنہ فرماتے ہیں: رسول اللہ صلی اللہ علیہ وسلم پر سب سے پہلے ایمان لانے والے سیدنا علی بن ابی طالب رضی اللہ عنہ تھے۔ ٭٭ یہ حدیث صحیح الاسناد ہے جبکہ اختلاف اس بات میں ہے کہ سیدنا ابوبکر رضی اللہ عنہ بالغ مردوں میں سب سے پہلے اسلام لائے اور نابالغ مردوں میں سیدنا علی رضی اللہ عنہ سب سے پہلے ایمان لائے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4714]

سیدنا ابوسعید خدری رضی اللہ عنہ فرماتے ہیں: نبی اکرم صلی اللہ علیہ وسلم سیدہ فاطمہ رضی اللہ عنہا کے پاس تشریف لائے اور فرمایا: میں، تم اور یہ سویا ہوا یعنی سیدنا علی رضی اللہ عنہ اور وہ دونوں یعنی حسن رضی اللہ عنہ اور حسین رضی اللہ عنہ قیامت کے دن اکٹھے ہوں گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4715]