سیدنا علی رضی اللہ عنہ فرماتے ہیں: جب حسن پیدا ہوئے تو میں نے ان کا نام ” حرب “ رکھا۔ نبی اکرم صلی اللہ علیہ وسلم نے مجھ سے پوچھا: تم نے میرے بیٹے کا نام کیا رکھا ہے؟ میں نے کہا: حرب۔ آپ صلی اللہ علیہ وسلم نے فرمایا: وہ ” حسن “ ہے۔ پھر جب حسین پیدا ہوئے تو میں نے ان کا نام ” حرب “ رکھ دیا۔ نبی اکرم صلی اللہ علیہ وسلم نے پوچھا: تم نے میرے بیٹے کا کیا نام رکھا ہے؟ میں نے کہا: حرب۔ آپ صلی اللہ علیہ وسلم نے فرمایا: نہیں۔ وہ ” حسین “ ہے۔ پھر جب ” محسن “ پیدا ہوئے تو نبی اکرم صلی اللہ علیہ وسلم نے مجھ سے پوچھا: تم نے میرے بیٹے کا کیا نام رکھا ہے؟ میں نے کہا: حرب۔ آپ صلی اللہ علیہ وسلم نے فرمایا: وہ ” محسن “ ہے۔ پھر نبی اکرم صلی اللہ علیہ وسلم نے فرمایا: میں نے اپنے تینوں بیٹوں کے وہی نام رکھے ہیں جو سیدنا ہارون علیہ السلام نے اپنے بیٹوں کے رکھے تھے (ان کے نام یہ تھے) شبر، شبیر، مشبر۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4839]

سیدنا عقبہ بن حارث رضی اللہ عنہ فرماتے ہیں: ایک دفعہ سیدنا ابوبکر رضی اللہ عنہ، سیدنا حسن رضی اللہ عنہ سے ملے تو ان کو سینے سے لگا کر بولے: میرا باپ قربان ہو جائے یہ نبی اکرم صلی اللہ علیہ وسلم کے ساتھ ملتے جلتے ہیں، علی کے ساتھ یہ مشابہت نہیں رکھتے، یہ سن کر سیدنا علی مسکرا دیئے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4840]

سیدنا ابوہریرہ رضی اللہ عنہ سے مروی ہے کہ وہ سیدنا حسن بن علی رضی اللہ عنہما سے ملے تو بولے: میں نے رسول اللہ صلی اللہ علیہ وسلم کو تمہیں بوسہ دیتے ہوئے دیکھا ہے۔ آپ وہ جگہ کھولیں جہاں رسول اللہ صلی اللہ علیہ وسلم نے بوسہ دیا تھا تاکہ اس جگہ کا میں بھی بوسہ لوں، چنانچہ سیدنا حسن نے کپڑا ہٹایا تو سیدنا ابوہریرہ رضی اللہ عنہ نے چوم لیا۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق ہے لیکن انہوں نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4841]

سیدنا وہب ابوجحیفہ رضی اللہ عنہ فرماتے ہیں: میں نے رسول اللہ صلی اللہ علیہ وسلم کی زیارت کی ہوئی ہے، سیدنا حسن بن علی رضی اللہ عنہما ان کے ساتھ بہت زیادہ مشابہت رکھتے ہیں۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ مذکورہ حدیث کی شاہد حدیث [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4842]