سیدنا ابوقتادہ رضی اللہ عنہ فرماتے ہیں کہ رسول اللہ صلی اللہ علیہ وسلم نے منبر شریف پر انصار کو مخاطب کرتے ہوئے فرمایا: خبردار! بے شک لوگ غیر مشہور ہیں، جبکہ انصاری میری پہچان ہیں۔ اگر تمام لوگ ایک راستے پر چلیں اور انصار ایک راستے میں چلیں تو میں انصار کے راستے پر چلوں گا۔ جس کو ان میں سے کسی کے کسی معاملے کا ذمہ دار بنایا جائے تو وہ ان کے اچھائی کرنے والے کے ساتھ اچھائی کرے اور ان کے خطا کار کو معاف کرے، جس نے ان کو پریشان کیا تو اس نے مجھے پریشان کیا، اگر ہجرت نہ ہوتی تو میں بھی انصاریوں میں سے ہوتا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7148]

سیدنا انس بن مالک رضی اللہ عنہ سیدنا ابوطلحہ رضی اللہ عنہ کے بارے میں بیان کرتے ہیں کہ وہ رسول اللہ صلی اللہ علیہ وسلم کی مرض وفات میں ان کے پاس آئے، رسول اللہ صلی اللہ علیہ وسلم نے ان سے فرمایا: اپنی قوم کو میرا سلام کہنا، کیونکہ وہ لوگ پاک دامن اور صابر ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7149]