سیدنا انس بن مالک فرماتے ہیں: سیدنا اسید بن حضیر اشہلی رضی اللہ عنہ رسول اللہ صلی اللہ علیہ وسلم کی بارگاہ میں حاضر ہوئے، اس وقت تک رسول اللہ صلی اللہ علیہ وسلم سب طعام تقسیم فرما چکے تھے، آپ صلی اللہ علیہ وسلم کو انصار کے قبیلے بنی ظفر کے بارے میں بتایا گیا کہ وہ بہت ضرورت مند ہیں۔ اس گھرانے میں زیادہ عورتیں ہیں، رسول اللہ صلی اللہ علیہ وسلم نے ان سے فرمایا: اے اسید تم نے ہمیں چھوڑ دیا، اور جو کچھ ہمارے ہاتھ میں تھا سب چلا گیا، (آئندہ سے یوں کرنا کہ) جب بھی تمہیں پتہ چلے کہ میرے پاس کوئی چیز آئی ہے تم مجھے اس گھرانے کے بارے میں یاد دلا دیا کرنا۔ راوی کہتے ہیں: اس کے بعد خیبر کے جو اور کھجوریں حضور صلی اللہ علیہ وسلم کے پاس آئیں۔ آپ صلی اللہ علیہ وسلم نے وہ کھجوریں لوگوں میں تقسیم فرما دیں، اس تقسیم میں انصار کو اور اس گھرانے کو کافی زیادہ حصہ عطا فرمایا۔ سیدنا اسید بن حضیر رضی اللہ عنہ نے شکریہ ادا کرتے ہوئے کہا: اے اللہ کے نبی! اللہ تعالیٰ آپ کو ہماری طرف طرف سے بہت اچھی جزاء عطا فرمائے۔ نبی اکرم صلی اللہ علیہ وسلم نے فرمایا: اے گروہ انصار! اللہ تعالیٰ تمہیں بھی جزائے خیر عطا فرمائے، کیونکہ میں نے تمہیں ہمیشہ پاکدامن اور صابر ہی پایا ہے، تم میرے بعد حکومت میں اور تقسیم میں کچھ (نامناسب) معاملات دیکھو گے، تم صبر سے کام لینا، یہاں تک کہ تم مجھے حوض کوثر پر آ ملو گے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7150]

سیدنا انس بن مالک رضی اللہ عنہ فرماتے ہیں: دور دراز سے پانی بھر کر لانا انصار کے لئے بہت دشوار تھا، وہ لوگ نبی اکرم صلی اللہ علیہ وسلم کی بارگاہ میں حاضر ہوئے، تاکہ آپ صلی اللہ علیہ وسلم ان کے لئے دعا فرما دیں یا ان کے لئے نہر کھدوا دیں۔ نبی اکرم صلی اللہ علیہ وسلم کو ان کے بارے میں بتایا گیا تو آپ صلی اللہ علیہ وسلم نے فرمایا: تم آج مجھ سے جو کچھ بھی مانگو گے، میں تمہیں دوں گا۔ جب انہوں نے رسول اللہ صلی اللہ علیہ وسلم کا یہ ارشاد عالی سنا تو کہنے لگے: آپ ہمارے لئے مغفرت کی دعا فرما دیں۔ رسول اللہ صلی اللہ علیہ وسلم نے ان کے لئے یوں دعا مانگی ” اے اللہ انصار کی مغفرت فرما، انصار کی اولادوں کی مغفرت فرما، ان کی اولادوں کی اولادوں کی مغفرت فرما “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7151]

سیدنا انس بن مالک رضی اللہ عنہ فرماتے ہیں کہ رسول اللہ صلی اللہ علیہ وسلم انصار کے کچھ بچوں، غلاموں اور لونڈیوں کی جانب متوجہ ہوئے اور فرمایا: اللہ کی قسم! میں تم سے محبت کرتا ہوں۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7152]

سیدنا انس بن مالک رضی اللہ عنہ فرماتے ہیں: انصار کے دو قبیلوں ” اوس “ اور ” خزرج “ نے فخر کیا۔ اوس نے کہا: * ہم میں وہ شخصیت ہے جس کی موت پر اللہ تعالیٰ کا عرش بھی ہل گیا تھا، وہ ہیں ” سعد بن معاذ رضی اللہ عنہ۔ * اور ہم میں وہ شخصیت بھی ہے جس کا دفاع بھڑوں نے کیا۔ اور وہ ہے سیدنا عاصم بن ثابت بن افلح رضی اللہ عنہ۔ * اور ہم میں وہ شخصیت بھی ہے جس کو فرشتوں نے غسل دیا تھا، وہ سیدنا حنظلہ بن راہب رضی اللہ عنہ ہیں۔ * ہم میں وہ شخصیت بھی ہے جس کی اکیلے کی گواہی دو کے برابر قرار دی گئی ہے، وہ ہیں ” سیدنا خزیمہ بن ثابت۔“ خزرجی لوگ کہنے لگے: * وہ چاروں صحابی ہم میں سے ہیں جنہوں نے قرآن کریم جمع کیا ہے، ان کے علاوہ اور کوئی شخص اس کام میں شامل نہیں تھا۔ وہ چاروں صحابہ کرام یہ تھے ” سیدنا ابی بن کعب، سیدنا معاذ بن جبل، سیدنا زید بن ثابت اور سیدنا ابوزید رضی اللہ عنہم۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن ان دونوں نے ہی اس کو نقل نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7153]