سیدنا حذیفہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: نظر (یعنی بدنگاہی)، شیطان کے زہر آلود تیروں میں سے ایک تیر ہے۔ جس نے اللہ تعالیٰ کی خوف کی وجہ سے اس (بدنگاہی) کو چھوڑ دیا اللہ تعالیٰ اس کے ایمان کو ایسی تازگی دے گا کہ وہ اس کی حلاوت اپنے دل میں محسوس کرے گا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8073]

سیدنا عبداللہ بن عمر رضی اللہ عنہما فرماتے ہیں کہ نبی اکرم صلی اللہ علیہ وسلم نے ارشاد فرمایا: چار چیزیں ایسی ہیں کہ اگر وہ تیری ذات میں موجود ہوں تو ساری دنیا بھی تجھے نہ ملے تب بھی تجھے کوئی نقصان نہیں ہے۔ ٭ امانت کی حفاظت۔ ٭ سچ بولنا۔ ٭ حسن اخلاق۔ ٭ رزق حلال۔ [المستدرك على الصحيحين/كِتَابُ الرِّقَاقِ/حدیث: 8074]

سیدنا ابوسعید خدری رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اگر کوئی آدمی ایسے بند غار میں نیک عمل کرے جس کا نہ کوئی دروازہ ہو، نہ کوئی روشن دان، تب بھی اس کا عمل دنیا والوں تک پہنچ جاتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8075]

سیدنا ابوامامہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اللہ تعالیٰ تمہیں مصیبت کے ساتھ جانچتا ہے، حالانکہ وہ تمہیں اچھی طرح جانتا ہے، جیسا کہ تم سونے کو آگ کے ساتھ جانچتے ہو، کچھ لوگ ایسے ہیں جو اللہ تعالیٰ کی آزمائش سے اس طرح نکل آتے ہیں جیسے خالص سونا۔ یہ وہ لوگ ہیں جن کو اللہ تعالیٰ نے گناہوں سے بچا کر رکھا، اور کچھ لوگ ایسے ہیں جو سونے کی طرح نکلتے ہیں مگر اس سے ذرا کم، یہ وہ لوگ ہیں جو شکوک و شبہات میں مبتلا ہوئے، کچھ لوگ کالے سونے کی طرح نکلتے ہیں، یہ وہ شخص ہے جو فتنے میں مبتلا ہو گیا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8076]

سیدنا ابوہریرہ رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: مومن کے جسم اور مال میں مسلسل آزمائش رہتی ہے، حتیٰ کہ جب وہ اللہ تعالیٰ سے ملتا ہے تو اس کے نامہ اعمال میں کوئی گناہ نہیں ہوتا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8077]

سیدنا عبداللہ رضی اللہ عنہ فرماتے ہیں: تم نے صحابہ کرام رضی اللہ عنہم سے زیادہ نمازیں پڑھی ہیں، اس سے زیادہ روزے رکھے ہیں، لیکن اس کے باوجود وہ لوگ تم سے بہتر ہیں۔ لوگوں نے اس کی وجہ پوچھی تو فرمایا: وہ لوگ تم سے زیادہ دنیا سے بے رغبت تھے اور آخرت میں تم سے زیادہ دلچسپی رکھتے تھے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8078]

سیدنا عمرو بن العاص رضی اللہ عنہ نے منبر پر خطبہ دیتے ہوئے فرمایا: اللہ کی قسم! میں نے ایسی قوم کھبی نہیں دیکھی، جو کہ اس چیز میں اتنی ہی زیادہ دلچسپی رکھتی ہے، جس سے رسول اللہ صلی اللہ علیہ وسلم جتنے زیادہ بے رغبتی رکھتے تھے۔ تم لوگ دنیا کا بہت شوق رکھتے ہو جبکہ رسول اللہ صلی اللہ علیہ وسلم اس کی کوئی پرواہ نہیں کرتے تھے۔ اللہ کی قسم! رسول اللہ صلی اللہ علیہ وسلم پر مسلسل تین دن کبھی بھی ایسے نہیں گزرے، جن میں آپ صلی اللہ علیہ وسلم کے مسائل، آپ کے وسائل سے زیادہ نہ ہوں۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كِتَابُ الرِّقَاقِ/حدیث: 8079]

سیدنا عبداللہ بن عمرو رضی اللہ عنہ فرماتے ہیں کہ نبی اکرم صلی اللہ علیہ وسلم نے ارشاد فرمایا: دنیا، مومن کے لیے قید خانہ ہے، اور قحط ہے، جب وہ دنیا سے نکلتا ہے تو قید سے اور قحط سے نکلتا ہے۔ [المستدرك على الصحيحين/كِتَابُ الرِّقَاقِ/حدیث: 8080]