سیدنا مـحـجـن بن ادرع رضی اللہ عنہ فرماتے ہیں کہ رسول اللہ صلی اللہ علیہ وسلم نے ایک دن لوگوں کو خطبہ دیا، آپ صلی اللہ علیہ وسلم نے فرمایا: خلاص کا دن اور خلاص کا دن کیا ہے؟ آپ صلی اللہ علیہ وسلم نے یہ بات تین مرتبہ کہی، صحابہ کرام رضی اللہ عنہم نے پوچھا: یا رسول اللہ صلی اللہ علیہ وسلم خلاص کے دن سے کیا مراد ہے؟ آپ صلی اللہ علیہ وسلم نے فرمایا: دجال آئے گا اور وہ احد پہاڑ پر چڑھ جائے گا، پھر وہ مدینہ کی جانب جھانک کر دیکھے گا، پھر وہ اپنے ساتھیوں سے کہے گا: کیا تم اس سفید رنگ کے محل کو دیکھ رہے ہو؟ یہ احمد (مجتبی صلی اللہ علیہ وسلم ) کی مسجد ہے، پھر وہ مدینہ میں آئے گا، اور مدینے کے ہر دروازے پر ایک فرشتہ پائے گا جو تلوار سونتے ہوئے ہو گا، پھر وہ پانی بہنے کی دلدلی زمین پر آئے گا، وہاں پر اپنے خیمے نصب کر لے گا، پھر مدینہ میں تین زلزلے آئیں گے۔ اور اس میں کوئی منافق مرد اور کوئی منافق عورت باقی نہیں بچے گی، نہ کوئی فاسق مرد بچے گا، نہ کوئی فاسقہ عورت بچے گی، اس طرح کے سب لوگ مدینہ سے نکل جائیں گے، مدینہ منورہ ایسے لوگوں سے خالی ہو جائے گا، یہ خلاص کا دن ہو گا۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8845]

سیدنا عبداللہ بن عمرو رضی اللہ عنہما فرماتے ہیں کہ اللہ کی قسم! اگر ایک چیز نہ ہوتی تو میں تمہیں کوئی بھی حدیث نہ سناتا، صحابہ کرام نے کہا: تم نے تو کہا ہے کہ فلاں فلاں واقعات رونما ہونے تک قیامت قائم نہیں ہو گی، سیدنا عبداللہ بن عمرو رضی اللہ عنہما فرماتے ہیں: میں نے تو یہ کہا تھا کہ فلاں فلاں واقعات اس وقت تک رونما نہیں ہوں گے جب تک ایک امر عظیم واقع نہیں ہو گا، اور وہ ہو چکا ہے۔ بیت اللہ شریف کو جلا دیا گیا ہے، اور ایسا ہونا ہی تھا، اور رسول اللہ صلی اللہ علیہ وسلم نے ارشاد فرمایا: دجال ظاہر ہو گا، وہ میری امت میں اتنا عرصہ رہے گا جتنا عرصہ اللہ تعالیٰ چاہے گا، وہ چالیس رہے گا، مجھے نہیں معلوم کہ چالیس دن، یا چالیس مہینے یا چالیس سال رہے گا۔ آپ فرماتے ہیں: پھر اللہ تعالیٰ سیدنا عیسیٰ علیہ السلام کو مبعوث فرمائے گا، ان کی شباہت عروہ بن مسعود رضی اللہ عنہ جیسی ہو گی، وہ دجال کو ڈھونڈیں گے اور اس کو قتل کر دیں گے، پھر لوگ ستر سال تک مزید رہیں گے، لوگوں کی آپس میں کسی قسم کی کوئی عداوت نہیں ہو گی۔ پھر اللہ تعالیٰ ملک شام کی جانب سے ٹھنڈی ہوا بھیجے گا، وہ ہوا ہر صاحب ایمان کی روح کو قبض کر لے گی، حتی کہ کوئی مومن شخص کسی پہاڑ کے اندر موجود ہو گا تو یہ ہوا اس تک بھی پہنچے گی، یہ ” کبد جبل “ کے الفاظ میں نے خود رسول اللہ صلی اللہ علیہ وسلم کی زبان مبارک سے سنے ہیں، اس کے بعد روئے زمین پر سب خبیث لوگ رہ جائیں گے، جو پرندوں کی طرح کمزور اور درندہ صفت ہوں گے وہ نہ کسی اچھائی کو اچھا جانیں گے اور نہ برائی کو برا سمجھیں گے، ان کے پاس شیطان کسی شکل میں آئے گا اور کہے گا: تم میری بات کیوں نہیں مانتے ہو؟ لوگ پوچھیں گے کہ تم ہمیں کس چیز کا حکم دیتے ہو؟ وہ ان کو بتوں کی عبادت کرنے کا حکم دے گا، وہ لوگ بتوں کی عبادت کرنے لگ جائیں گے، جو لوگ بتوں کی عبادت میں مبتلا ہوں گے، ان کے رزق میں اضافہ ہو جائے گا اور ان کی بودوباش بہت اچھی ہو جائے گی۔ پھر صور پھونکا جائے گا، اس کی آواز کو جو سنے گا وہ اپنی گردن جھکا کر اٹھائے گا۔ سب سے پہلے اس کو ایک ایسا آدمی سنے گا جو اپنے اونٹ کے حوض کو درست کر رہا ہو گا پھر وہ بے ہوش ہو کر گر جائے گا، پھر دوسرے لوگ بھی بے ہوش ہو جائیں گے، پھر اللہ تعالیٰ ان پر بارشیں نازل فرمائے گا جو کہ شبنم کے قطروں کی مانند ہو گی پھر ان کے جسم تروتازہ ہو جائیں گے۔ پھر دوبارہ صور پھونکا جائے گا، تو یہ لوگ کھڑے ایک دوسرے کو دیکھ رہے ہوں گے، ان کو کہا جائے گا کہ اپنے رب کی بارگاہ میں حاضری دو، وہاں پر ان سے سوال کئے جائیں گے، پھر کہا جائے گا: دوزخ میں جانے والوں کو نکالا جائے، پوچھا جائے گا: کتنے؟ جواب دیا جائے گا: ہزار میں سے 999۔ یہ حدیث امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8846]

سیدنا ابوذر رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میں وہ کچھ دیکھتا ہوں جو تم نہیں دیکھ سکتے، اور میں وہ کچھ سنتا ہوں جو تم نہیں سن سکتے، آسمان چرچراتا ہے، اور جو کچھ اس کے اندر ہے اور (اگر اس کو دیکھا جائے تو) اس کے چرچرانے کا حق ہے، چار انگلیوں کے برابر کوئی ایسی جگہ نہیں ہے جہاں پر فرشتہ اللہ تعالیٰ کی بارگاہ میں سجدہ ریز نہ ہو، اور اللہ کی قسم! جو کچھ میں جانتا ہوں، اگر تم یہ سب جان لو تو تم بہت کم ہنسو اور بہت زیادہ روؤ، اور بستروں پر تم اپنی عورتوں کے ساتھ لذت حاصل کرنا بھول جاؤ، اور تم اللہ کی پناہ لینے کے لئے ٹیلوں، اور پہاڑوں پر چڑھ جاؤ، اور اللہ کی قسم! کاش کہ میں کوئی درخت ہوتا جو کاٹ دیا جاتا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8847]

سیدنا انس رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: میری امت کے کچھ لوگ عیسیٰ ابن مریم علیہ السلام کو پائیں گے اور دجال کے قتل کا مشاہدہ بھی کریں گے۔ [المستدرك على الصحيحين/كِتَابُ الْفِتَنِ وَالْمَلَاحِمِ/حدیث: 8848]