جناب عکرمہ رحمہ اللہ سے روایت ہے کہ سیدنا علی رضی اللہ عنہ نے بعض لوگوں کو، جو دین اسلام سے مرتد ہو گئے تھے، آگ سے جلوا دیا۔ سیدنا ابن عباس رضی اللہ عنہما کو یہ خبر پہنچی تو انہوں نے کہا: ”میں انہیں آگ سے نہ جلواتا، رسول اللہ صلی اللہ علیہ وسلم نے فرمایا ہے: «لَا تُعَذِّبُوا بِعَذَابِ اللَّهِ» ”اللہ کے عذاب سے عذاب مت دو۔“ میں انہیں رسول اللہ صلی اللہ علیہ وسلم کے فرمان کے مطابق قتل کرتا، بلاشبہ رسول اللہ صلی اللہ علیہ وسلم نے فرمایا ہے: «مَنْ بَدَّلَ دِينَهُ فَاقْتُلُوهُ» ”جو اپنا دین بدل لے اسے قتل کر دو۔““ سیدنا علی رضی اللہ عنہ کو یہ بات پہنچی تو انہوں نے کہا: ”کیا خوب ہیں ابن عباس! (یا ابن عباس کی ماں!)۔“ [سنن ابي داود/كِتَاب الْحُدُودِ/حدیث: 4351]

سیدنا عبداللہ (عبداللہ بن مسعود) رضی اللہ عنہ کا بیان ہے کہ رسول اللہ صلی اللہ علیہ وسلم نے فرمایا: ”جو مسلمان اس بات کی گواہی دیتا ہے کہ اللہ کے سوا کوئی معبود نہیں اور میں اللہ کا رسول ہوں، اس کا خون حلال نہیں ہے، سوائے اس کے کہ تین باتوں میں سے کسی ایک کا مرتکب ہو۔ شادی شدہ ہو کر زنا کرے، جان کے بدلے جان اور جو دین (اسلام) چھوڑ دے اور جماعت (ملت اسلام) سے الگ ہو جائے۔“ [سنن ابي داود/كِتَاب الْحُدُودِ/حدیث: 4352]

ام المؤمنین سیدہ عائشہ رضی اللہ عنہا بیان کرتی ہیں کہ رسول اللہ صلی اللہ علیہ وسلم نے فرمایا: ”جو مسلمان گواہی دیتا ہو کہ اللہ کے سوا اور کوئی معبود نہیں اور محمد صلی اللہ علیہ وسلم اللہ کے رسول ہیں اس کا خون حلال نہیں، سوائے اس کے کہ تین باتوں میں سے کسی ایک کا مرتکب ہو: شادی شدہ ہونے کے بعد زنا کرے تو اسے پتھروں سے رجم کیا جائے گا، کوئی اللہ اور اس کے رسول کے خلاف ہتھیار اٹھا کر نکلے تو اسے قتل کیا جائے گا یا سولی چڑھایا جائے گا یا ملک بدر کر دیا جائے گا، یا کوئی کسی جان کو مار ڈالے تو اسے اس کے بدلے میں قتل کیا جائے گا۔“ [سنن ابي داود/كِتَاب الْحُدُودِ/حدیث: 4353]

سیدنا ابوموسیٰ اشعری رضی اللہ عنہ بیان کرتے ہیں کہ میں نبی کریم صلی اللہ علیہ وسلم کی خدمت میں حاضر ہوا جب کہ میرے ساتھ بنو اشعر کے دو آدمی بھی تھے، ایک میری دائیں جانب تھا اور دوسرا بائیں جانب۔ ان دونوں نے کام (کسی منصب اور ذمہ داری) کا سوال کر دیا اور نبی کریم صلی اللہ علیہ وسلم خاموش رہے۔ پھر آپ صلی اللہ علیہ وسلم نے فرمایا: ”اے ابوموسیٰ!“ یا فرمایا: ”اے عبداللہ بن قیس! تیرا کیا خیال ہے؟“ میں نے عرض کیا: ”قسم اس ذات کی جس نے آپ کو حق کے ساتھ بھیجا ہے! انہوں نے مجھے اپنے دل کی بات نہیں بتائی تھی اور مجھے خیال نہ تھا کہ یہ کسی منصب کے طلب گار ہیں، اور گویا میں رسول اللہ صلی اللہ علیہ وسلم کی مسواک کی طرف دیکھ رہا ہوں جو آپ صلی اللہ علیہ وسلم کے ہونٹ کے نیچے تھی جس سے وہ اوپر کو اٹھ سا گیا تھا۔“ آپ صلی اللہ علیہ وسلم نے فرمایا: ”ہم کسی کو اپنا کام ہرگز نہ سونپیں گے۔“ یا فرمایا: ”ہم ایسے کسی شخص کو اپنا کام نہیں دیتے ہیں جو از خود اس کا طلب گار ہو، لیکن اے ابوموسیٰ!“ یا فرمایا: ”اے عبداللہ بن قیس! تم جاؤ۔“ اور انہیں یمن کی طرف بھیج دیا۔ پھر ان کے پیچھے سیدنا معاذ بن جبل رضی اللہ عنہ کو بھی بھیج دیا۔ جب سیدنا معاذ رضی اللہ عنہ ان کے پاس پہنچے تو سیدنا ابوموسیٰ رضی اللہ عنہ نے کہا: ”تشریف لائیے۔ اتریے۔“ اور انہیں تکیہ پیش کیا۔ لیکن سیدنا معاذ رضی اللہ عنہ نے اچانک دیکھا کہ ان کے ہاں ایک آدمی زنجیروں میں جکڑا ہوا تھا۔ انہوں نے پوچھا: ”اسے کیا ہے؟“ کہا گیا کہ: ”یہ یہودی تھا، پھر مسلمان ہو گیا لیکن دوبارہ اپنے باطل دین کی طرف پھر گیا (مرتد ہو گیا) ہے۔“ سیدنا معاذ رضی اللہ عنہ نے کہا: ”جب تک اسے قتل نہ کر دیا جائے میں نہیں بیٹھوں گا، یہ فیصلہ ہے اللہ اور رسول کا۔“ سیدنا ابوموسیٰ رضی اللہ عنہ نے کہا: ”بیٹھ جائیے، ہاں (فیصلہ یہی ہے)۔“ سیدنا معاذ رضی اللہ عنہ نے کہا: ”جب تک اسے قتل نہ کر دیا جائے میں نہیں بیٹھوں گا۔ یہ فیصلہ اللہ اور اس کے رسول کا ہے۔“ انہوں نے تین بار کہا۔ چنانچہ سیدنا ابوموسیٰ رضی اللہ عنہ نے حکم دیا اور اسے قتل کر دیا گیا۔ پھر وہ دونوں قیام اللیل (رات کی نماز) کے متعلق بات چیت کرتے رہے۔ ان میں سے ایک، یعنی سیدنا معاذ بن جبل رضی اللہ عنہ نے کہا: ”میں سوتا ہوں اور قیام بھی کرتا ہوں۔“ یا کہا کہ: ”قیام کرتا ہوں اور سوتا بھی ہوں اور اپنی نیند میں اسی چیز کا امیدوار ہوتا ہوں جس کی مجھے اپنے قیام میں امید ہوتی ہے۔ (یعنی اجر و ثواب کی)۔“ [سنن ابي داود/كِتَاب الْحُدُودِ/حدیث: 4354]

سیدنا ابوموسیٰ اشعری رضی اللہ عنہ بیان کرتے ہیں کہ ”میں جب یمن میں (عامل) تھا تو سیدنا معاذ رضی اللہ عنہ میرے ہاں تشریف لائے اور ایک آدمی تھا جو یہودی تھا، اس نے اسلام قبول کیا، مگر پھر اسلام سے مرتد ہو گیا۔ جب سیدنا معاذ رضی اللہ عنہ تشریف لائے تو انہوں نے کہا: ”میں اپنی سواری سے اس وقت تک نہیں اتروں گا جب تک کہ اسے قتل نہ کر دیا جائے۔“”دونوں (طلحہ اور بریدہ) میں سے ایک نے کہا: ”اور اس شخص کو اس سے پہلے توبہ کر لینے کو کہا گیا تھا۔“ [سنن ابي داود/كِتَاب الْحُدُودِ/حدیث: 4355]

جناب ابوبردہ رحمہ اللہ نے یہ قصہ بیان کیا، کہتے ہیں کہ: ”سیدنا ابوموسیٰ رضی اللہ عنہ کے ہاں ایک آدمی پیش کیا گیا جو اسلام سے مرتد ہو چکا تھا۔ تو آپ اسے تقریباً! بیس رات دعوت دیتے رہے۔ پھر سیدنا معاذ رضی اللہ عنہ تشریف لے آئے تو انہوں نے بھی اسے دعوت دی مگر اس نے انکار کر دیا، تو اس کی گردن مار دی گئی۔“ امام ابوداؤد رحمہ اللہ فرماتے ہیں کہ: ”اس روایت کو عبدالملک بن عمیر نے ابوبردہ سے روایت کیا ہے، مگر اس میں توبہ کرانے کا بیان نہیں۔ اور ابن فضیل نے بواسطہ شیبانی، سعید بن ابی بردہ سے، انہوں نے اپنے والد ابوموسیٰ رضی اللہ عنہ سے روایت کیا تو اس میں بھی توبہ کرانے کا ذکر نہیں ہے۔“ [سنن ابي داود/كِتَاب الْحُدُودِ/حدیث: 4356]

جناب قاسم (قاسم بن عبدالرحمٰن ہذلی) نے یہ قصہ بیان کیا، اس میں ہے کہ ”سیدنا معاذ رضی اللہ عنہ اپنی سواری سے اس وقت تک نہ اترے جب تک کہ اس کی گردن نہ مار دی گئی اور اس شخص سے توبہ نہ کروائی۔“ [سنن ابي داود/كِتَاب الْحُدُودِ/حدیث: 4357]

سیدنا ابن عباس رضی اللہ عنہما سے روایت ہے کہ ”عبداللہ بن سعد بن ابی سرح رسول اللہ صلی اللہ علیہ وسلم کا کاتب تھا، تو شیطان نے اسے بہکا لیا اور وہ کفار سے جا ملا۔ پھر رسول اللہ صلی اللہ علیہ وسلم نے فتح مکہ کے دن اس کے متعلق حکم دیا کہ اسے قتل کر دیا جائے، تو سیدنا عثمان بن عفان رضی اللہ عنہ نے اس کے لیے امان طلب کر لی، تو رسول اللہ صلی اللہ علیہ وسلم نے اسے امان دے دی۔“ [سنن ابي داود/كِتَاب الْحُدُودِ/حدیث: 4358]

سیدنا سعد (سعد بن ابی وقاص رضی اللہ عنہ) سے روایت ہے کہ جب فتح مکہ کا دن آیا تو عبداللہ بن سعد بن ابو سرح سیدنا عثمان بن عفان رضی اللہ عنہ کے ہاں چھپ گیا، پھر سیدنا عثمان رضی اللہ عنہ اسے لے آئے حتیٰ کہ نبی کریم صلی اللہ علیہ وسلم کے سامنے لا کھڑا کیا اور درخواست کی: ”اے اللہ کے رسول! عبداللہ سے بیعت لے لیجیے۔“ آپ صلی اللہ علیہ وسلم نے اپنا سر اٹھایا اور اس کی طرف دیکھا، تین بار ایسے ہوا، آپ صلی اللہ علیہ وسلم ہر بار انکار فرماتے رہے، تیسری بار کے بعد آپ صلی اللہ علیہ وسلم نے اس سے بیعت لے لی۔ پھر اپنے صحابہ کی طرف متوجہ ہوئے اور فرمایا: ”کیا تم میں کوئی سمجھدار آدمی نہیں تھا کہ جب میں نے اس کی بیعت لینے سے اپنا ہاتھ روک رکھا تھا تو وہ اس کی طرف اٹھتا اور اسے قتل کر ڈالتا؟“ صحابہ نے کہا: ”اے اللہ کے رسول! ہم نہیں جانتے تھے کہ آپ کے جی میں کیا ہے؟ آپ ہمیں اپنی آنکھ سے اشارہ فرما دیتے۔“ آپ صلی اللہ علیہ وسلم نے فرمایا: ”کسی نبی کو لائق نہیں کہ اس کی آنکھ خیانت والی ہو۔“ [سنن ابي داود/كِتَاب الْحُدُودِ/حدیث: 4359]

سیدنا جریر (جریر بن عبداللہ بجلی رضی اللہ عنہ) سے روایت ہے، وہ کہتے ہیں کہ میں نے نبی کریم صلی اللہ علیہ وسلم سے سنا، آپ صلی اللہ علیہ وسلم فرماتے تھے: ”جب کوئی غلام شرک کی طرف بھاگ جائے تو اس کا خون حلال ہے۔“ [سنن ابي داود/كِتَاب الْحُدُودِ/حدیث: 4360]