حضرت زید بن ارقم رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”یہ بیت الخلاء (شیطانوں کے) حاضر ہونے کی جگہیں ہیں۔ چنانچہ جب تم میں سے کوئی (بیت الخلاء میں) داخل ہو تو اسے یوں کہنا چاہیے: «اللَّهُمَّ إِنِّي أَعُوذُ بِكَ مِنَ الْخُبُثِ وَالْخَبَائِثِ» ”اے اللہ! میں تیری پناہ میں آتا ہوں ناپاک جنوں اور ناپاک جنیوں سے۔“” [سنن ابن ماجه/كتاب الطهارة وسننها/حدیث: 296]

حضرت علی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”بنی آدم (انسانوں) کے پردے کے اعضاء اور جنوں کی نظروں کے درمیان یہ چیز پردہ بن جاتی ہے کہ جب کوئی بیت الخلاء میں داخل ہو تو «بِسْمِ اللّٰهِ» ”اللہ کے نام کے ساتھ“ کہے۔“ [سنن ابن ماجه/كتاب الطهارة وسننها/حدیث: 297]

حضرت انس بن مالک رضی اللہ عنہ سے روایت ہے کہ رسول اللہ صلی اللہ علیہ وسلم جب بیت الخلاء میں داخل ہوتے تو کہتے تھے: «أَعُوذُ بِاللَّهِ مِنَ الْخُبُثِ وَالْخَبَائِثِ» ”میں ناپاک جنوں اور ناپاک جنّیوں سے اللہ کی پناہ میں آتا ہوں۔“ [سنن ابن ماجه/كتاب الطهارة وسننها/حدیث: 298]

حضرت ابو امامہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ” «اللَّهُمَّ إِنِّي أَعُوذُ بِكَ مِنَ الرِّجْسِ النَّجِسِ الْخَبِيثِ الْمُخْبِثِ الشَّيْطَانِ الرَّجِيمِ» کسی کو اس بات سے عاجز نہیں ہونا چاہیے کہ جائے ضرورت میں داخل ہوتے وقت یوں کہہ لے: ”اے اللہ! میں تیری پناہ میں آتا ہوں گندے، پلید، ناپاک، گندے کام سکھانے والے مردود شیطان سے۔““ ابو حاتم نے ابن ابی مریم سے اسی طرح روایت بیان کی لیکن انہوں نے اپنی روایت میں «مِنَ الرِّجْسِ النَّجَسِ» کے الفاظ بیان نہیں کیے بلکہ صرف «مِنَ الْخَبِيثِ الْمُخْبِثِ» کے الفاظ بیان کیے ہیں۔ [سنن ابن ماجه/كتاب الطهارة وسننها/حدیث: 299]