حضرت عبداللہ بن عباس رضی اللہ عنہما سے روایت ہے کہ حضرت عمر بن خطاب رضی اللہ عنہ نے فرمایا: ”مجھے خطرہ ہے کہ لوگوں پر کچھ طویل عرصہ گزرنے پر کوئی شخص یہ بھی کہنے لگے گا: مجھے اللہ کی کتاب (قرآن مجید) میں رجم کا ذکر نہیں ملتا۔ اس طرح وہ لوگ اللہ کا ایک فریضہ ترک کرنے کی وجہ سے گمراہ ہو جائیں گے۔ سنو! رجم حق ہے جب کہ مرد شادی شدہ ہو اور گواہی ثابت ہو جائے، یا حمل یا اعتراف موجود ہو۔ میں نے یہ آیت پڑھی: «الشَّيْخُ وَالشَّيْخَةُ إِذَا زَنَيَا فَارْجُمُوهُمَا الْبَتَّةَ» ”بڑی عمر کا مرد اور بڑی عمر کی عورت جب بدکاری کریں تو انہیں ضرور رجم کر دو۔“ رسول اللہ صلی اللہ علیہ وسلم نے (اس جرم کا ارتکاب کرنے والوں کو) رجم کی سزا دی تھی اور رسول اللہ صلی اللہ علیہ وسلم کے بعد ہم نے بھی رجم کی سزا دی۔“ [سنن ابن ماجه/كتاب الحدود/حدیث: 2553]

حضرت ابوہریرہ رضی اللہ عنہ سے روایت ہے، انہوں نے فرمایا: ماعز بن مالک رضی اللہ عنہ نے نبی صلی اللہ علیہ وسلم کی خدمت میں حاضر ہو کر عرض کیا: ”میں نے زنا کیا ہے۔“ رسول اللہ صلی اللہ علیہ وسلم نے اس سے منہ پھیر لیا۔ اس نے پھر کہا: ”میں نے زنا کیا ہے۔“ رسول اللہ صلی اللہ علیہ وسلم نے منہ دوسری طرف کر لیا۔ اس نے پھر (تیسری بار) کہا: ”میں نے زنا کیا ہے“ تو نبی صلی اللہ علیہ وسلم نے منہ دوسری طرف پھیر لیا۔ اس نے پھر (چوتھی بار) کہا: ”میں نے زنا کیا ہے۔“ رسول اللہ صلی اللہ علیہ وسلم اس سے منہ پھیرتے رہے حتی کہ اس نے چار بار اقرار کر لیا تو رسول اللہ صلی اللہ علیہ وسلم نے اسے رجم کیے جانے کا حکم دے دیا، چنانچہ جب اسے پتھر لگے تو وہ پیٹھ پھیر کر بھاگا۔ اسے ایک آدمی ملا جس کے ہاتھ میں اونٹ کے جبڑے کی ہڈی تھی۔ اس نے وہی مار دی جس سے وہ گر گیا (اور جان دے دی۔) رسول اللہ صلی اللہ علیہ وسلم کی خدمت میں پتھر لگنے پر اس کے بھاگنے کا ذکر کیا گیا تو آپ صلی اللہ علیہ وسلم نے فرمایا: ”تم نے اسے چھوڑ کیوں نہ دیا؟“ [سنن ابن ماجه/كتاب الحدود/حدیث: 2554]

حضرت عمران بن حصین رضی اللہ عنہ سے روایت ہے کہ ”ایک خاتون نے نبی صلی اللہ علیہ وسلم کی خدمت میں حاضر ہو کر زنا کا اقرار کیا، رسول اللہ صلی اللہ علیہ وسلم کے حکم سے اس کے کپڑے اچھی طرح باندھ دیے گئے، پھر آپ صلی اللہ علیہ وسلم نے اسے سنگسار کیا، پھر اس کی نماز جنازہ ادا کی۔“ [سنن ابن ماجه/كتاب الحدود/حدیث: 2555]