حضرت انس رضی اللہ عنہ فرماتے ہیں کہ رسول اللہ صلی اللہ علیہ وآلہ وسلم نے ارشاد فرمایا: ”یقینا اللہ تعالیٰ نے جہاں بیماری پیدا کی ہے۔ دوائی بھی پیدا کی ہے۔ پس تم دواء استعمال کرو۔“ [مصنف ابن ابي شيبه/ كتاب الطب/حدیث: 24959]

حضرت ابوہریرہ سے روایت ہے۔ فرماتے ہیں کہ رسول اللہ صلی اللہ علیہ وآلہ وسلم نے فرمایا: ”اللہ تعالیٰ نے کوئی بیماری نازل نہیں کی مگر یہ کہ اس کے لئے شفاء بھی پیدا کی ہے۔“ [مصنف ابن ابي شيبه/ كتاب الطب/حدیث: 24960]

حضرت اسامہ بن شریک سے روایت ہے۔ کہتے ہیں کہ کچھ دیہاتیوں نے رسول اللہ صلی اللہ علیہ وآلہ وسلم کی خدمت اقدس میں حاضر ہو کر سوال کیا تو آپ صلی اللہ علیہ وآلہ وسلم نے فرمایا۔ ”اے اللہ کے بندو! دوائی، استعمال کرو، کیونکہ اللہ تعالیٰ نے بڑھاپے کے سوا کوئی بھی بیماری نہیں اتاری مگر یہ کہ اس کے ساتھ شفاء بھی نازل کی ہے۔“ [مصنف ابن ابي شيبه/ كتاب الطب/حدیث: 24961]

حضرت ابو سعید خدری، نبی کریم صلی اللہ علیہ وآلہ وسلم سے روایت کرتے ہیں کہ آپ صلی اللہ علیہ وآلہ وسلم نے ارشاد فرمایا: بیشک اللہ تعالیٰ نے کوئی بیماری نازل نہیں فرمائی یا کوئی بیماری پیدا نہیں کی مگر یہ کہ اس کے لئے دوائی نازل کی ہے یا پیدا کی ہے۔ جس نے اس کو جان لیا سو جان لیا اور جو اس سے جاہل رہا وہ جاہل رہا سوائے سام کے۔“ صحابہ نے پوچھا۔ یا رسول اللہ صلی اللہ علیہ وآلہ وسلم! سام کیا ہے؟ آپ صلی اللہ علیہ وآلہ وسلم نے فرمایا ”موت“۔ [مصنف ابن ابي شيبه/ كتاب الطب/حدیث: 24962]

حضرت ابو عبد الرحمن سے روایت ہے۔ کہتے ہیں کہ حضرت عبد اللہ نے فرمایا۔ اللہ تعالیٰ نے کوئی بیماری نہیں اتاری یا بیماری نہیں پیدا کی مگر یہ کہ اس کے ساتھ شفاء بھی اتاری ہے۔ جو اس سے جاہل رہا وہ جاہل رہا اور جس نے اس کو جان لیا، اس نے جان لیا۔ [مصنف ابن ابي شيبه/ كتاب الطب/حدیث: 24963]

حضرت زید بن اسلم سے روایت ہے کہ ایک آدمی کو زخم لگ گیا پس خون منجمد ہوگیا۔ تو رسول اللہ صلی اللہ علیہ وآلہ وسلم نے اس کے لئے بنو انمار کے دو آدمیوں کو بلایا اور آپ صلی اللہ علیہ وآلہ وسلم نے فرمایا۔ ”تم میں سے کون بڑا طبیب ہے؟“ ایک آدمی نے پوچھا۔ یا رسول اللہ صلی اللہ علیہ وآلہ وسلم! کیا طب میں بھی کوئی خیر ہے؟ آپ صلی اللہ علیہ وآلہ وسلم نے ارشاد فرمایا: ”یقینا جس ذات نے بیماری اتاری ہے اس نے دوائی بھی اتاری ہے۔“ [مصنف ابن ابي شيبه/ كتاب الطب/حدیث: 24964]

حضرت ابو قلابہ سے ”وقیل من راقٍ“ کے بارے میں روایت ہے کہتے ہیں۔ اس سے مراد طبیب ہے۔ [مصنف ابن ابي شيبه/ كتاب الطب/حدیث: 24965]

حضرت کعب سے روایت ہے۔ کہتے ہیں کہ حق جل شانہ ٔ کا فرمان ہے۔ میں ہی وہ ذات ہوں جو صحت دیتا ہوں اور علاج کرتا ہوں۔ [مصنف ابن ابي شيبه/ كتاب الطب/حدیث: 24966]

حضرت ابو رمثہ سے روایت ہے۔ کہتے ہیں کہ میں چھوٹا تھا اور اپنے والد کے ہمراہ نبی کریم صلی اللہ علیہ وآلہ وسلم کی خدمت میں حاضر ہوا۔ ابو رمثہ کہتے ہیں۔ میرے والد نے نبی کریم صلی اللہ علیہ وآلہ وسلم سے کہا۔ میں حکیم آدمی ہوں لہٰذا آپ کی پشت پر جو ابھرا ہوا گوشت ہے۔ وہ آپ مجھے دکھائیں۔ آپ صلی اللہ علیہ وآلہ وسلم نے پوچھا۔ ’ ’ تم اس کو کیا کرو گے؟“ میرے والد نے جواب دیا، میں اس کو کاٹ دوں گا، آپ صلی اللہ علیہ وآلہ وسلم نے فرمایا۔ ”تم طبیب نہیں ہو، ہاں مگر تم دوست ہو۔ اس کا طبیب وہی ہے جس نے اس کو بنایا ہے۔ یا فرمایا۔ جس نے اس کو پیدا کیا ہے۔ [مصنف ابن ابي شيبه/ كتاب الطب/حدیث: 24967]