عمرو بن شعیب بیان کرتے ہیں: جو مسلمان کسی اہل کتاب شخص کو قتل کر دے، نبی کریم صلی اللہ علیہ وسلم نے اس کے لیے چار ہزار درہم (بطور تاوان) ادائیگی کو لازم قرار دیا ہے، نبی کریم صلی اللہ علیہ وسلم نے اہل کتاب یہودی اور عیسائی کی دیت، مسلمان کی دیت کا نصف مقرر کی ہے۔ [سنن الدارقطني/ كتاب الحدود والديات وغيره/حدیث: 3286]

سیدنا ابن عمر رضی اللہ عنہما بیان کرتے ہیں: نبی کریم صلی اللہ علیہ وسلم نے ارشاد فرمایا ہے: ”ذمی کی دیت مسلمان کی دیت جتنی ہو گی۔“ اس روایت کو ابوکرز کے علاوہ اور کسی نے بھی نافع کے حوالے سے نقل نہیں کیا، اور یہ شخص متروک ہے، اس کا نام عبداللہ بن عبدالملک فہری ہے۔ [سنن الدارقطني/ كتاب الحدود والديات وغيره/حدیث: 3287]

سیدنا اسامہ بن زید رضی اللہ عنہ بیان کرتے ہیں: نبی کریم صلی اللہ علیہ وسلم نے معاہد (ذمی) کی دیت مسلمان کی دیت کے برابر قرار دی ہے۔ عثمان نامی راوی وقاصی اور متروک الحدیث ہے۔ [سنن الدارقطني/ كتاب الحدود والديات وغيره/حدیث: 3288]

سیدنا ابن عمر رضی اللہ عنہما بیان کرتے ہیں: ایک مسلمان نے ایک ذمی کو قتل عمد کے طور پر قتل کر دیا، یہ مقدمہ سیدنا عثمان رضی اللہ عنہ کے سامنے پیش کیا گیا، تو انہوں نے اس (قاتل کو قصاص کے طور پر) قتل نہیں کروایا، اور اس (مقتول کی) دیت مغلظہ مقرر کی، جو مسلمان کی دیت جتنی تھی۔ [سنن الدارقطني/ كتاب الحدود والديات وغيره/حدیث: 3289]

سعید بن مسیب بیان کرتے ہیں: سیدنا عمر بن خطاب رضی اللہ عنہ نے یہودی اور عیسائی کی دیت چار ہزار درہم مقرر کی تھی، جب کہ مجوسی کی دیت آٹھ سو درہم مقرر کی تھی۔ شعبہ کہتے ہیں: میں نے اپنے استاد حکم سے دریافت کیا: ”کیا آپ نے خود سعید کی زبانی یہ حدیث سنی ہے؟“ انہوں نے جواب دیا: ”نہیں! ویسے اگر میں چاہتا، تو ان کی زبانی بھی اسے سن سکتا تھا، مجھے یہ حدیث ثابت حداد نے سنائی ہے۔“ شعبہ کہتے ہیں: پھر میں ثابت حداد سے ملا، تو انہوں نے مجھے یہ حدیث سنائی۔ [سنن الدارقطني/ كتاب الحدود والديات وغيره/حدیث: 3290]

سیدنا عمر رضی اللہ عنہ فرماتے ہیں: ”یہودی اور عیسائی کی دیت چار ہزار درہم ہو گی، جب کہ مجوسی کی دیت آٹھ سو درہم ہو گی۔“ [سنن الدارقطني/ كتاب الحدود والديات وغيره/حدیث: 3291]

یہی روایت ایک اور سند کے ہمراہ بھی منقول ہے۔ [سنن الدارقطني/ كتاب الحدود والديات وغيره/حدیث: 3292]

سیدنا ابن عباس رضی اللہ عنہما روایت کرتے ہیں: نبی کریم صلی اللہ علیہ وسلم نے ارشاد فرمایا ہے: ”کسی کو اللہ کا شریک سمجھنا، کسی (شخص) کو محصن نہیں بناتا۔“ اس حدیث کو مرفوع روایت کے طور پر نقل کرنے میں عفیف بن سالم نامی راوی کو وہم ہوا ہے، درست یہ ہے کہ یہ روایت سیدنا عبداللہ بن عمر رضی اللہ عنہما کے اپنے قول کے طور پر منقول ہے۔ [سنن الدارقطني/ كتاب الحدود والديات وغيره/حدیث: 3293]

سیدنا ابن عمر رضی اللہ عنہما فرماتے ہیں: ”جو شخص کسی کو اللہ کا شریک سمجھتا ہو، وہ محصن نہیں ہو گا۔“ [سنن الدارقطني/ كتاب الحدود والديات وغيره/حدیث: 3294]

سیدنا ابن عمر رضی اللہ عنہما نبی کریم صلی اللہ علیہ وسلم کا یہ فرمان نقل کرتے ہیں: ”جو شخص کسی کو اللہ کا شریک سمجھتا ہو، وہ محصن نہیں ہو گا۔“ اس روایت کو مرفوع حدیث کے طور پر صرف اسحاق نامی راوی نے نقل کیا ہے، ایک روایت کے مطابق انہوں نے بعد میں اس سے رجوع کر لیا تھا، درست یہ ہے کہ یہ روایت موقوف ہے۔ [سنن الدارقطني/ كتاب الحدود والديات وغيره/حدیث: 3295]