سیدنا علی رضی اللہ عنہ بیان کرتے ہیں کہ نبی کریم صلی اللہ علیہ وسلم نے ایک شخص کی گواہی اور حق دار شخص کے قسم اٹھانے کے ذریعے فیصلہ دے دیا تھا۔ راوی کہتے ہیں کہ سیدنا علی رضی اللہ عنہ نے بھی عراق میں اس طرح کا فیصلہ دیا تھا۔ [سنن الدارقطني/ كتاب فى الأقضية والأحكام وغير ذلك/حدیث: 4487]

عمرو بن شعیب اپنے والد کے حوالے سے اپنے دادا سیدنا عبداللہ بن عمرو رضی اللہ عنہما کا یہ بیان نقل کرتے ہیں کہ نبی کریم صلی اللہ علیہ وسلم نے فرمایا: ”حق کے حوالے میں اللہ تعالیٰ اور اس کے رسول نے دو گواہوں کے حق میں فیصلہ دیا ہے، تو جو شخص دو گواہ لے آئے وہ اپنا حق وصول کر لے گا، اور اگر کوئی شخص ایک گواہ لے کر آتا ہے، تو وہ اپنے اس گواہ کے ساتھ قسم بھی اٹھائے گا۔“ [سنن الدارقطني/ كتاب فى الأقضية والأحكام وغير ذلك/حدیث: 4488]

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے ایک گواہ کے ساتھ قسم لے کر فیصلہ دے دیا تھا۔ [سنن الدارقطني/ كتاب فى الأقضية والأحكام وغير ذلك/حدیث: 4489]

سیدنا عبداللہ بن عمر رضی اللہ عنہما بیان کرتے ہیں کہ نبی کریم صلی اللہ علیہ وسلم نے حق کے طلب گار شخص کی قسم کو لوٹا دیا تھا۔ [سنن الدارقطني/ كتاب فى الأقضية والأحكام وغير ذلك/حدیث: 4490]

سیدنا علی رضی اللہ عنہ فرماتے ہیں: جس شخص کے خلاف دعویٰ کیا گیا ہو، وہ قسم اٹھانے کا زیادہ حق دار ہو گا، لیکن اگر وہ شخص قسم اٹھانے سے انکار کر دیتا ہے، تو دعویٰ کرنے والا شخص قسم اٹھائے گا اور اس حق کو وصول کرے گا۔ [سنن الدارقطني/ كتاب فى الأقضية والأحكام وغير ذلك/حدیث: 4491]

سیدنا حسن بصری رحمہ اللہ بیان کرتے ہیں کہ نبی کریم صلی اللہ علیہ وسلم نے فرمایا: ”جس شخص کو کسی مسلمان (قاضی) کی بارگاہ میں بلایا جائے اور وہ وہاں نہ جائے تو وہ شخص ظالم ہو گا، اس کا کوئی حق نہیں ہو گا۔“ [سنن الدارقطني/ كتاب فى الأقضية والأحكام وغير ذلك/حدیث: 4492]

ربیعہ بن عبدالرحمن، سیدنا سعد بن عبادہ کے صاحب زادے کے حوالے سے یہ بات بیان کرتے ہیں: ہم نے سعد بن عبادہ کی تحریر میں یہ بات پائی ہے، نبی کریم صلی اللہ علیہ وسلم نے ایک گواہ کے ساتھ قسم لے کر فیصلہ دے دیا تھا۔ [سنن الدارقطني/ كتاب فى الأقضية والأحكام وغير ذلك/حدیث: 4493]

سیدنا عبداللہ بن عباس رضی اللہ عنہما بیان کرتے ہیں کہ نبی کریم صلی اللہ علیہ وسلم نے ایک گواہ کے ساتھ قسم لے کر فیصلہ دے دیا تھا۔ بعض راویوں نے اس کو نقل کرنے میں اختلاف کیا ہے۔ [سنن الدارقطني/ كتاب فى الأقضية والأحكام وغير ذلك/حدیث: 4494]

سیدنا علی بن ابوطالب رضی اللہ عنہ بیان کرتے ہیں کہ نبی کریم صلی اللہ علیہ وسلم ، سیدنا ابوبکر، سیدنا عمر، سیدنا عثمان رضی اللہ عنہم یہ سب حضرات دعویٰ کرنے والے شخص سے قسم لے کر فیصلہ دے دیا کرتے تھے۔ جعفر بیان کرتے ہیں: ہمارے زمانے کے قاضی بھی آج کل اسی طرح فیصلہ دے دیتے ہیں۔ [سنن الدارقطني/ كتاب فى الأقضية والأحكام وغير ذلك/حدیث: 4495]

سیدنا عبداللہ بن عامر رضی اللہ عنہ بیان کرتے ہیں کہ مجھے سیدنا ابوبکر رضی اللہ عنہ، سیدنا عمر رضی اللہ عنہ، سیدنا عثمان رضی اللہ عنہ کو دیکھنے کا اتفاق ہوا، یہ لوگ ایک گواہ کے ساتھ قسم لے کر فیصلہ دے دیا کرتے تھے۔ [سنن الدارقطني/ كتاب فى الأقضية والأحكام وغير ذلك/حدیث: 4496]