سیدنا جابر رضی اللہ عنہ بیان کرتے ہیں کہ دو آدمی ایک اونٹنی کے بارے میں نبی کریم صلی اللہ علیہ وسلم کے پاس مقدمہ لے کر حاضر ہوئے۔ دونوں میں سے ایک نے کہا: اس اونٹنی نے میرے ہاں بچے کو جنم دیا ہے، ان میں سے ہر ایک نے ثبوت بھی پیش کر دیا تو نبی کریم صلی اللہ علیہ وسلم نے اس شخص کے حق میں فیصلہ دیا اس وقت اونٹنی جس شخص کے قبضے میں تھی۔ [سنن الدارقطني/ كتاب فى الأقضية والأحكام وغير ذلك/حدیث: 4477]

ابوقیس جو سیدنا عمرو بن العاص کے غلام ہیں، وہ بیان کرتے ہیں: نبی کریم صلی اللہ علیہ وسلم نے فرمایا: ”جب کوئی قاضی فیصلہ دیتے ہوئے اجتہاد کرے اور اس بارے میں غلطی کر جائے تو اسے ایک اجر ملتا ہے، اور اگر وہ فیصلہ کرتے ہوئے اجتہاد کرے اور درست فیصلہ دے تو اسے دو اجر ملتے ہیں۔“ [سنن الدارقطني/ كتاب فى الأقضية والأحكام وغير ذلك/حدیث: 4478]

ایک اور روایت سیدنا ابوہریرہ رضی اللہ عنہ کے حوالے سے نبی کریم صلی اللہ علیہ وسلم سے منقول ہے۔ [سنن الدارقطني/ كتاب فى الأقضية والأحكام وغير ذلك/حدیث: 4479]

سیدنا عمرو بن العاص رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”جب کوئی قاضی فیصلہ دیتے ہوئے اجتہاد کرے اور غلط فیصلہ دے تو اسے اس کا ایک اجر ملتا ہے اور اگر وہ فیصلہ دیتے ہوئے صحیح فیصلہ دے تو اس کو دو اجر ملتے ہیں۔“ [سنن الدارقطني/ كتاب فى الأقضية والأحكام وغير ذلك/حدیث: 4480]

یہی روایت ایک اور سند میں منقول ہے۔ [سنن الدارقطني/ كتاب فى الأقضية والأحكام وغير ذلك/حدیث: 4481]

علقمہ بن وائل اپنے والد کے حوالے سے یہ بات نقل کرتے ہیں: (حضر موت) سے تعلق رکھنے والا ایک شخص اور کندہ سے تعلق رکھنے والا ایک شخص نبی کریم صلی اللہ علیہ وسلم کی خدمت میں حاضر ہوئے۔ حضرمی نے عرض کی: یا رسول اللہ! اس شخص نے میری زمین پر قبضہ کر لیا ہے، وہ زمین میرے والد کی تھی۔ اس شخص نے کہا: وہ زمین میری ہے اور میرے پاس موجود ہے، میں اس میں زراعت کرتا ہوں، اس شخص کا اس زمین میں کوئی حق نہیں۔ نبی کریم صلی اللہ علیہ وسلم نے اس حضرمی سے دریافت کیا: ”تمہارے پاس کوئی ثبوت ہے؟“ تو اس نے عرض کی کہ نہیں ہے! نبی کریم صلی اللہ علیہ وسلم نے فرمایا: ”پھر یہ دوسرا فریق قسم اٹھائے گا۔“ اس حضرمی نے دریافت کیا: یا رسول اللہ! یہ اس چیز کی پروا نہیں کرے گا کہ یہ کیا قسم اٹھا رہا ہے؟ کیونکہ یہ گناہوں کا ارتکاب کرنے سے بچتا نہیں ہے۔ نبی کریم صلی اللہ علیہ وسلم نے فرمایا: ”تمہارے لیے یہی صورت ہے۔“ پھر اس شخص نے قسم اٹھائی، جب وہ چلا گیا تو نبی کریم صلی اللہ علیہ وسلم نے فرمایا: ”اگر اس نے دوسرے شخص کے مال کی اس لیے قسم اٹھائی ہے، تاکہ اسے ظلم کے طور پر ہڑپ کرے، تو جب یہ اللہ تعالیٰ کی بارگاہ میں حاضر ہو گا تو اللہ تعالیٰ اس سے منہ پھیر لے گا۔“ [سنن الدارقطني/ كتاب فى الأقضية والأحكام وغير ذلك/حدیث: 4482]

سیدنا ابوہریرہ رضی اللہ عنہ بیان کرتے ہیں کہ دو آدمیوں نے ایک جانور کی ملکیت کا دعویٰ کر دیا، دونوں کے پاس کوئی ثبوت نہیں تھا تو نبی کریم صلی اللہ علیہ وسلم نے ان دونوں کو حکم دیا: ”وہ دونوں قسم اٹھا کر اس میں حصہ لیں۔“ [سنن الدارقطني/ كتاب فى الأقضية والأحكام وغير ذلك/حدیث: 4483]

یہی روایت ایک اور سند کے ہمراہ منقول ہے، تاہم اس میں یہ الفاظ زائد ہیں: ”وہ دونوں راضی ہوں یا مجبوری کی حالت میں ایسا کریں۔“ [سنن الدارقطني/ كتاب فى الأقضية والأحكام وغير ذلك/حدیث: 4484]

امام جعفر صادق رحمہ اللہ اپنے والد (امام باقر رضی اللہ عنہ) کے حوالے سے سیدنا جابر رضی اللہ عنہ کا یہ بیان نقل کرتے ہیں: نبی کریم صلی اللہ علیہ وسلم نے ایک گواہ اور قسم اٹھانے کے ذریعے ایک شخص کے حق میں فیصلہ دے دیا تھا۔ راوی بیان کرتے ہیں: سیدنا علی رضی اللہ عنہ نے بھی کوفہ میں تم لوگوں کے سامنے اسی طرح فیصلہ دیا تھا۔ [سنن الدارقطني/ كتاب فى الأقضية والأحكام وغير ذلك/حدیث: 4485]

امام جعفر بن صادق رحمہ اللہ اپنے والد (امام محمد باقر رحمہ اللہ) کے حوالے سے بیان نقل کرتے ہیں کہ نبی کریم صلی اللہ علیہ وسلم نے حق کے طلب گار شخص سے حلف لے لیا تھا، اس کے پاس ایک گواہ موجود تھا۔ [سنن الدارقطني/ كتاب فى الأقضية والأحكام وغير ذلك/حدیث: 4486]