سیدنا مغیرہ بن شعبہ رضی اللہ عنہ بیان کرتے ہیں کہ نبی کریم صلی اللہ علیہ وسلم ”جب خلا (پیشاب، پاخانے) کے لیے جاتے تو (آبادی سے) دور چلے جاتے۔“ [سنن ابي داود/كتاب الطهارة/حدیث: 1]

سیدنا جابر بن عبداللہ رضی اللہ عنہ بیان کرتے ہیں کہ ”نبی کریم صلی اللہ علیہ وسلم کو جب پیشاب، پاخانے کی حاجت ہوتی تو (آبادی سے) دور چلے جاتے حتیٰ کہ آپ صلی اللہ علیہ وسلم کو کوئی نہ دیکھ سکتا۔“ [سنن ابي داود/كتاب الطهارة/حدیث: 2]

ابو تیاح کہتے ہیں کہ مجھے ایک شیخ نے بتایا کہ سیدنا عبداللہ بن عباس رضی اللہ عنہما جب بصرہ میں (بحیثیت گورنر) تشریف لائے تو لوگ انہیں سیدنا ابوموسیٰ اشعری رضی اللہ عنہ سے سنی ہوئی احادیث بیان کرتے تھے۔۔۔۔ (تو اس ضمن میں) سیدنا عبداللہ بن عباس رضی اللہ عنہما نے سیدنا ابوموسیٰ رضی اللہ عنہ کے نام ایک خط لکھا جس میں ان سے کچھ مسائل دریافت کیے، چنانچہ سیدنا ابوموسیٰ رضی اللہ عنہ نے انہیں جواب میں لکھا: ”میں ایک دن رسول اللہ صلی اللہ علیہ وسلم کی معیت میں تھا تو آپ صلی اللہ علیہ وسلم نے پیشاب کرنے کا ارادہ کیا، پس آپ صلی اللہ علیہ وسلم ایک دیوار کی جڑ میں نرم مٹی کے پاس آئے اور پیشاب کیا۔ اس کے بعد آپ صلی اللہ علیہ وسلم نے فرمایا: ”تم میں سے جب کوئی پیشاب کرنا چاہے تو اس کے لیے (مناسب نرم) جگہ تلاش کر لیا کرے۔“” [سنن ابي داود/كتاب الطهارة/حدیث: 3]

سیدنا انس بن مالک رضی اللہ عنہ روایت کرتے ہیں کہ رسول اللہ صلی اللہ علیہ وسلم جب بیت الخلاء میں داخل ہونے کا ارادہ کرتے تو درج ذیل دعا پڑھتے۔ حماد بن زید کے الفاظ ہیں «اللَّهُمَّ إِنِّي أَعُوذُ بِكَ مِنَ الْخُبُثِ وَالْخَبَائِثِ» اور عبدالوارث کے الفاظ ہیں «أَعُوذُ بِاللَّهِ مِنَ الْخُبُثِ وَالْخَبَائِثِ» ”اے اللہ! میں خبیث جنوں اور جنیوں سے تیری پناہ میں آتا ہوں۔“ امام ابوداؤد رحمہ اللہ کہتے ہیں کہ شعبہ، عبدالعزیز سے «اللَّهُمَّ إِنِّي أَعُوذُ بِكَ...» کے الفاظ منقول ہیں جب کہ انہوں نے ایک بار «أَعُوذُ بِاللَّهِ...» کے الفاظ بھی بیان کیے۔ امام ابوداؤد رحمہ اللہ کہتے ہیں کہ وہیب سے «فَلْيَتَعَوَّذْ بِاللَّهِ» ”اسے اللہ کی پناہ لینی چاہیے۔“ کے الفاظ منقول ہیں۔ [سنن ابي داود/كتاب الطهارة/حدیث: 4]

شعبہ، عبدالعزیز یعنی ابن صہیب سے، وہ سیدنا انس رضی اللہ عنہ سے یہی (مذکورہ بالا) حدیث نقل کرتے ہیں، ان کے الفاظ یہ ہیں: ” «اللَّهُمَّ إِنِّي أَعُوذُ بِكَ ....» ‏‏‏‏“ اور شعبہ کہتے ہیں کہ عبدالعزیز نے (سیدنا انس رضی اللہ عنہ سے) ایک بار ” «أَعُوذُ بِاللَّهِ ....» ‏‏‏‏“ کے الفاظ بیان کیے۔ [سنن ابي داود/كتاب الطهارة/حدیث: 5]

سیدنا زید بن ارقم رضی اللہ عنہ رسول اللہ صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”یہ بیت الخلاء جنوں اور شیطانوں کے آنے جانے کی جگہیں ہیں، لہٰذا تم میں سے جب کوئی بیت الخلاء جانا چاہے تو یہ کلمات کہہ لیا کرے: «أَعُوذُ بِاللَّهِ مِنَ الْخُبُثِ وَالْخَبَائِثِ» ”میں خبیث جنوں اور جنیوں (کے شر) سے اللہ کی پناہ میں آتا ہوں“۔“ [سنن ابي داود/كتاب الطهارة/حدیث: 6]

سیدنا سلمان فارسی رضی اللہ عنہ سے مروی ہے، کسی نے ان سے کہا: ”تمہارے نبی صلی اللہ علیہ وسلم نے تو تمہیں سبھی چیزیں سکھائی ہیں حتیٰ کہ پیشاب پاخانے کا طریقہ بھی!“ انہوں نے کہا: ”ہاں! بلاشبہ (اس میں ہمارے لیے کوئی عیب کی بات نہیں) آپ صلی اللہ علیہ وسلم نے ہمیں پیشاب، پاخانے کے وقت قبلہ رخ ہونے اور دائیں ہاتھ سے استنجاء کرنے سے منع فرمایا ہے اور یہ کہ ہم میں سے کوئی تین ڈھیلوں سے کم میں استنجاء نہ کرے اور گوبر اور ہڈی سے بھی استنجاء نہ کرے۔“ [سنن ابي داود/كتاب الطهارة/حدیث: 7]

سیدنا ابوہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”بلاشبہ میں تمہارے لیے والد کی مانند ہوں، تمہیں سکھاتا ہوں۔ جب تم میں سے کوئی پاخانے کے لیے آئے تو قبلہ رخ ہو کر نہ بیٹھے اور نہ قبلے کی طرف پشت کرے اور نہ دائیں ہاتھ سے استنجاء کرے۔“ اور نبی کریم صلی اللہ علیہ وسلم حکم دیا کرتے تھے کہ (کم از کم) تین ڈھیلے استعمال کیا کریں اور گوبر اور ہڈی سے منع فرمایا کرتے تھے۔ [سنن ابي داود/كتاب الطهارة/حدیث: 8]

سیدنا ابوایوب انصاری رضی اللہ عنہ سے مرفوعاً روایت ہے کہ (یعنی رسول اللہ صلی اللہ علیہ وسلم نے فرمایا) ”جب تم بیت الخلا میں آؤ تو پیشاب پاخانے کے وقت قبلے کی طرف منہ نہ کیا کرو بلکہ مشرق یا مغرب کی طرف رخ کیا کرو۔“ (ابوایوب رضی اللہ عنہ کہتے ہیں کہ) جب ہم شام میں آئے تو دیکھا کہ (وہاں کے) بیت الخلا قبلہ رخ پر بنے ہوئے تھے، چنانچہ ہم اس سے منہ پھیر کر بیٹھتے تھے اور استغفار کرتے تھے۔ [سنن ابي داود/كتاب الطهارة/حدیث: 9]

سیدنا معقل بن ابی معقل رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ”پیشاب پاخانے کے وقت قبلتین (بیت الحرام اور بیت المقدس) کی جانب منہ کرنے سے منع فرمایا ہے۔“ امام ابوداؤد رحمہ اللہ کہتے ہیں: ”ابوزید، بنو ثعلبہ قبیلے کے آزاد کردہ غلام تھے۔“ [سنن ابي داود/كتاب الطهارة/حدیث: 10]