عبداللہ بن دینار بیان کرتے ہیں کہ انہوں نے سیدنا عبداللہ بن عمر رضی اللہ عنہما کو یہ بیان کرتے ہوئے سنا ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”غیب کی کنجیاں پانچ ہیں، ان کا علم صرف اللہ تعالیٰ کو ہے، اللہ تعالیٰ کے علاوہ اور کوئی نہیں جانتا کہ رحم کس چیز کو جنم دے گا؟ اور نہ ہی اللہ تعالیٰ کے علاوہ کوئی اور یہ بات جانتا ہے کہ کل کیا ہو گا؟ اللہ تعالیٰ کے علاوہ اور کوئی یہ بات نہیں جانتا کہ بارش کب آئے گی؟ کوئی شخص یہ نہیں جانتا کہ وہ کون سی جگہ پر فوت ہو گا؟ اور اللہ تعالیٰ کے علاوہ کوئی یہ نہیں جانتا کہ قیامت کب آئے گی؟“ [صحیح ابن حبان/كتاب العلم/حدیث: 71]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”بے شک اللہ تعالیٰ ہر سخت مزاج، متکبر، کنجوس اور بازاروں میں چیخ کر بولنے والے شخص کو ناپسند کرتا ہے، جو رات کو مردار (کی طرح) سوتا ہے اور دن کے وقت گدھے (کی طرح وقت گزارتا ہے)۔ وہ دنیاوی امور کے بارے میں واقفیت رکھتا ہے، لیکن آخرت کے بارے میں جاہل ہوتا ہے۔“ [صحیح ابن حبان/كتاب العلم/حدیث: 72]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے اللہ تعالیٰ کے اس فرمان ﴿هُوَ الَّذِي أَنْزَلَ عَلَيْكَ الْكِتَابَ مِنْهُ آيَاتٌ مُحْكَمَاتٌ﴾ [سورة آل عمران: 7] ”وہی وہ ذات ہے، جس نے تم پر کتاب نازل کی ہے، جس میں سے بعض محکم آیات ہیں“ کی آخر تک تلاوت کی، پھر ارشاد فرمایا: ”جب تم ان لوگوں کو دیکھو، جو اس کی متشابہ آیات کی تلاوت کرتے ہیں، تو تم یہ بات جان لو! یہ وہ لوگ ہیں، جو اللہ تعالیٰ نے مراد لیے ہیں، تو تم ان سے بچو۔“ [صحیح ابن حبان/كتاب العلم/حدیث: 73]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”مجھ پر قرآن سات حروف میں نازل کیا گیا ہے، قرآن کے بارے میں بحث کرنا کفر ہے۔“ (یہ بات آپ نے تین مرتبہ ارشاد فرمائی، پھر فرمایا:) ”تمہیں اس میں سے جو چیز سمجھ آ جائے، تم اس پر عمل کرو اور جس چیز کے بارے میں تمہیں علم حاصل نہ ہو سکے، تم اسے اس کے عالم کی طرف لوٹا دو۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”تمہیں اس میں سے جو چیز سمجھ آ جائے، تم اس پر عمل کرو“ اس میں استطاعت کا ذکر پوشیدہ ہے؛ آپ کی مراد یہ ہے: کتاب کے حوالے سے تم جس حکم کو شناخت کر لو، اس پر اپنی استطاعت کے مطابق عمل کرو۔ روایت کے یہ الفاظ: ”اور جس چیز کے بارے میں تمہیں علم حاصل نہ ہو سکے، تم اسے اس کے عالم کی طرف لوٹا دو“ اس میں اس حکم کی خلاف ورزی کی ممانعت ہے اور وہ حکم یہ ہے: لوگ ایسے شخص سے مسائل دریافت نہ کریں جو علم نہیں رکھتا۔ [صحیح ابن حبان/كتاب العلم/حدیث: 74]

سیدنا عبداللہ بن مسعود رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”قرآن کو سات حروف پر نازل کیا گیا ہے، ہر آیت کا ایک ظاہری مفہوم ہے اور ایک باطنی مفہوم ہے۔“ «ذِكْرُ الزَّجْرِ عَنْ مُجَادَلَةِ النَّاسِ فِي كِتَابِ اللهِ مَعَ الْأَمْرِ بِمُجَانَبَةِ مَنْ يَفْعَلُ ذَلِكَ» ”اس بات کی ممانعت کا تذکرہ کہ لوگ اللہ تعالیٰ کی کتاب کے بارے میں بحث مباحثہ کریں اور جو شخص ایسا کرتا ہے، اس سے لاتعلق رہنے کا حکم ہونا۔“ [صحیح ابن حبان/كتاب العلم/حدیث: 75]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم نے یہ آیت تلاوت کی: ﴿وہی وہ ذات ہے، جس نے تم پر کتاب نازل کی ہے، جس میں بعض محکم آیات ہیں اور دوسری متشابہ ہیں﴾ [سورة آل عمران: 7] (یہ آیت یہاں تک ہے) ﴿سمجھدار لوگ﴾ [سورة آل عمران: 7] ۔ سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم نے ارشاد فرمایا: ”جب تم ان لوگوں کو دیکھو جو اس بارے میں بحث کرتے ہیں، تو یہ وہ لوگ ہیں جو اللہ تعالیٰ نے مراد لیے ہیں، تو تم ان لوگوں سے بچو۔“ مطر نامی راوی کہتے ہیں: مجھے یہ بات یاد ہے، روایت میں یہ الفاظ بھی ہیں: ”تم ان لوگوں کے ساتھ نہ بیٹھنا، کیونکہ یہ وہ لوگ ہیں جو اللہ تعالیٰ نے مراد لیے ہیں، تو تم ان سے بچنا۔“ امام ابن حبان رحمہ اللہ فرماتے ہیں: ایوب نے یہ روایت مطر وراق اور ابن ابوملیکہ دونوں سے سنی ہے۔ [صحیح ابن حبان/كتاب العلم/حدیث: 76]

سیدنا جابر رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”تم علم اس لیے حاصل نہ کرو تاکہ اس کی وجہ سے علماء کے سامنے فخر کا اظہار کرو، اور نہ اس لیے کہ تم لوگ اس کے ذریعے بے وقوفوں کے ساتھ بحث کرو، اور نہ اس کے ذریعے خود کو محفل میں نمایاں کرنے کی کوشش کرو، جو شخص ایسا کرے گا (تو اس کا انجام) جہنم ہے۔“ [صحیح ابن حبان/كتاب العلم/حدیث: 77]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص کوئی ایسا علم حاصل کرتا ہے، جس کی وجہ سے اللہ تعالیٰ کی رضا حاصل کی جا سکتی ہے، لیکن وہ شخص اسے کسی دنیاوی فائدے کے لیے حاصل کرتا ہے، تو وہ شخص قیامت کے دن جنت کی خوشبو کو بھی نہیں پا سکے گا۔“ یہی روایت ایک اور سند کے ہمراہ بھی منقول ہے۔ [صحیح ابن حبان/كتاب العلم/حدیث: 78]

سیدنا ابوہریرہ رضی اللہ عنہ سیدنا عمر بن خطاب رضی اللہ عنہ کا یہ بیان نقل کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”قدریہ فرقے سے تعلق رکھنے والوں کے ساتھ نہ بیٹھو اور انہیں پہلے مخاطب نہ کرو۔“ [صحیح ابن حبان/كتاب العلم/حدیث: 79]

سیدنا عمران بن حصین رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”تم لوگوں کے بارے میں مجھے سب سے زیادہ اندیشہ اس بات کا ہے کہ تم چرب زبان منافق کے ساتھ بحث کرو گے۔“ [صحیح ابن حبان/كتاب العلم/حدیث: 80]