سیدنا حذیفہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”مجھے تم لوگوں کے بارے میں یہ اندیشہ ہے، ایک شخص قرآن کا علم حاصل کرے گا، یہاں تک کہ جب اس کا قرآن کا عالم ہونا معروف ہو جائے گا اور وہ شخص اسلام (کی تعلیمات) کا محافظ ہو گا، تو وہ جو اللہ کو منظور ہو گا، تو وہ اس میں کوئی تبدیلی کرے گا، وہ اس سے کھسک جائے گا اور اسے اپنی پشت کے پیچھے رکھ دے گا، وہ اپنے پڑوسی کے پیچھے تلوار لے کر دوڑے گا اور اس پر شرک کا الزام عائد کر دے گا۔“ راوی بیان کرتے ہیں: میں نے عرض کی: اے اللہ کے نبی! ان میں سے کون مشرک ہونے کے زیادہ قریب ہو گا، جس پر الزام عائد کیا گیا ہے؟ یا وہ شخص جو الزام عائد کر رہا ہے۔ آپ صلی اللہ علیہ وسلم نے فرمایا: ”جو الزام عائد کر رہا ہے۔“ [صحیح ابن حبان/كتاب العلم/حدیث: 81]

سیدنا جابر بن عبداللہ رضی اللہ عنہما بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: «اللَّهُمَّ إِنِّي أَسْأَلُكَ عِلْمًا نَافِعًا، وَأَعُوذُ بِكَ مِنْ عِلْمٍ لَا يَنْفَعُ» ”اے اللہ! میں تجھ سے نفع دینے والے علم کا سوال کرتا ہوں اور میں ایسے علم سے تیری پناہ مانگتا ہوں، جو نفع نہ دے۔“ [صحیح ابن حبان/كتاب العلم/حدیث: 82]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم یہ دعا مانگا کرتے تھے: «اللَّهُمَّ إِنِّي أَعُوذُ بِكَ مِنْ عِلْمٍ لَا يَنْفَعُ، وَعَمَلٍ لَا يُرْفَعُ، وَقَلْبٍ لَا يَخْشَعُ، وَقَوْلٍ لَا يُسْمَعُ» ”اے اللہ! میں ایسے علم سے تیری پناہ مانگتا ہوں جو نفع نہ دے، اور ایسے عمل سے جو بلند نہ ہو، اور ایسے دل سے جو ڈرے نہیں، اور ایسی بات سے جو سنی نہ جائے۔ (ان سب سے تیری پناہ مانگتا ہوں)۔“ [صحیح ابن حبان/كتاب العلم/حدیث: 83]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جو شخص علم کے حصول کے راستے پر چلتا ہے، اللہ تعالیٰ اس شخص کے لیے جنت کے راستے کو آسان کر دیتا ہے، اور جس شخص کا عمل اسے سست کر دے، اس کا نسب اسے تیز نہیں کر سکتا۔“ [صحیح ابن حبان/كتاب العلم/حدیث: 84]

زر بیان کرتے ہیں: میں سیدنا صفوان بن عسال مرادی رضی اللہ عنہ کی خدمت میں حاضر ہوا، انہوں نے دریافت کیا: تم کیوں آئے؟ تو زر نے جواب دیا: میں علم حاصل کرنے کے لیے آیا ہوں، تو سیدنا صفوان رضی اللہ عنہ نے کہا: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص اپنے گھر سے علم کے حصول کے لیے نکلتا ہے، تو فرشتے اس شخص کے اس عمل سے راضی ہو کر اپنے پر اس کے لیے بچھا دیتے ہیں۔“ [صحیح ابن حبان/كتاب العلم/حدیث: 85]

سیدنا ابوواقد لیثی رضی اللہ عنہ بیان کرتے ہیں: ایک مرتبہ نبی اکرم صلی اللہ علیہ وسلم مسجد میں تشریف فرما تھے اور کچھ لوگ آپ کے ساتھ موجود تھے۔ تین آدمی آئے اور ان میں سے دو آدمی آپ کی طرف آ گئے اور ایک شخص چلا گیا، جب وہ دونوں نبی اکرم صلی اللہ علیہ وسلم کے پاس پہنچے، تو ان دونوں نے سلام کیا۔ ان دونوں میں سے ایک نے حلقے میں گنجائش دیکھی تو وہاں بیٹھ گیا، جبکہ دوسرا شخص لوگوں کے پیچھے بیٹھ گیا۔ جہاں تک تیسرے شخص کا تعلق تھا، تو وہ منہ پھیر کر چلا گیا۔ جب نبی اکرم صلی اللہ علیہ وسلم (اپنی گفتگو) سے فارغ ہوئے، تو آپ صلی اللہ علیہ وسلم نے ارشاد فرمایا: ”کیا میں تمہیں ان تین لوگوں کے بارے میں بتاؤں؟ ان میں سے ایک شخص اللہ تعالیٰ کی پناہ میں آیا، تو اللہ تعالیٰ نے اسے پناہ عطا کی۔ دوسرے شخص نے حیا کی، تو اللہ تعالیٰ نے بھی اس سے حیا کی اور تیسرے شخص نے منہ پھیر لیا، تو اللہ تعالیٰ نے بھی اس سے منہ پھیر لیا۔“ [صحیح ابن حبان/كتاب العلم/حدیث: 86]

سیدنا ابوہریرہ رضی اللہ عنہ بیان کرتے ہیں کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص ہماری اس مسجد میں بھلائی کا علم حاصل کرنے کے لیے، اس کی تعلیم دینے کے لیے آتا ہے، وہ اللہ کی راہ میں جہاد کرنے والے شخص کی مانند ہے اور جو شخص اس میں، اس کی بجائے کسی اور وجہ سے آتا ہے، تو اس کی مثال اس شخص کی مانند ہے، جو اس چیز پر نظر رکھے ہوئے ہو، جو اس کی نہ ہو۔“ [صحیح ابن حبان/كتاب العلم/حدیث: 87]

کثیر بن قیس بیان کرتے ہیں: میں مسجد دمشق میں سیدنا ابودرداء رضی اللہ عنہ کے ساتھ بیٹھا ہوا تھا۔ ایک شخص آیا اور بولا: اے سیدنا ابودرداء! میں نبی اکرم صلی اللہ علیہ وسلم کے شہر سے آپ کے پاس آیا ہوں۔ ایک حدیث کے بارے میں (دریافت کرنے کے لیے) مجھے یہ پتا چلا ہے، آپ نبی اکرم صلی اللہ علیہ وسلم کے حوالے سے وہ حدیث بیان کرتے ہیں۔ سیدنا ابودرداء رضی اللہ عنہ نے دریافت کیا: کیا تم کسی اور کام کے سلسلے میں نہیں آئے؟ کیا تم تجارت کے لیے نہیں آئے؟ کیا تم صرف اس حدیث کے لیے آئے ہو؟ اس نے جواب دیا: جی ہاں، تو سیدنا ابودرداء رضی اللہ عنہ نے فرمایا: میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص علم کے حصول کے راستے پر چلتا ہے، اللہ تعالیٰ اس کی وجہ سے، اس شخص کو جنت کے راستے پر چلاتا ہے، اور طالب علم سے خوش ہو کر، فرشتے اپنے پر اس پر بچھا دیتے ہیں۔ بے شک عالم شخص کے لیے آسمانوں اور زمین میں موجود ہر چیز، یہاں تک کہ پانی میں موجود مچھلیاں، بھی دعائے مغفرت کرتی ہیں اور عالم شخص کو عبادت گزار شخص پر وہی فضیلت حاصل ہے، جو چودھویں رات کے چاند کو تمام ستاروں پر حاصل ہوتی ہے۔ بے شک علماء، انبیاء کے وارث ہیں۔ انبیاء، وراثت میں دینار یا درہم نہیں چھوڑتے ہیں۔ وہ وراثت میں علم چھوڑتے ہیں، جو شخص اسے حاصل کر لیتا ہے، وہ بڑا حصہ حاصل کرتا ہے۔“ (امام ابن حبان رحمہ اللہ فرماتے ہیں:) اس حدیث میں اس بات کا واضح بیان موجود ہے کہ ہم نے جس فضیلت کا ذکر کیا ہے یہ ان علماء کو حاصل ہو گی جو نبی اکرم صلی اللہ علیہ وسلم کے علم کی تعلیم دیتے ہیں، انہیں حاصل نہیں ہو گی جو دوسرے علوم سکھاتے ہیں۔ کیا آپ نے غور نہیں کیا، نبی اکرم صلی اللہ علیہ وسلم نے یہ بات ارشاد فرمائی ہے: ”علماء، انبیاء کے وارث ہیں۔“ تو انبیاء وراثت میں صرف علم چھوڑتے ہیں اور ہمارے نبی کا علم آپ کی سنت ہے۔ جو شخص اس کی معرفت سے بے بہرہ ہو گا وہ انبیاء کا وارث نہیں ہو گا۔ [صحیح ابن حبان/كتاب العلم/حدیث: 88]

سیدنا معاویہ بن ابوسفیان رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اللہ تعالیٰ جس شخص کے بارے میں بھلائی کا ارادہ کر لے، اسے دین کی سمجھ بوجھ عطا کر دیتا ہے۔“ [صحیح ابن حبان/كتاب العلم/حدیث: 89]

سیدنا عبداللہ بن مسعود رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”صرف دو طرح کے لوگوں پر رشک کیا جا سکتا ہے: ایک وہ شخص جسے اللہ تعالیٰ نے مال عطا کیا ہو اور اسے حق کے راستے میں خرچ کرنے کی توفیق دی ہو، اور ایک وہ شخص جسے اللہ تعالیٰ نے حکمت عطا کی ہے اور وہ اس کے مطابق فیصلے کرتا ہو اور اس کی تعلیم دیتا ہو۔“ [صحیح ابن حبان/كتاب العلم/حدیث: 90]