سیدنا ثوبان رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”تم سنت کی پیروی کرو اور میانہ روی اختیار کرو، اور یہ بات جان لو کہ تمہارے اعمال میں سب سے بہتر نماز ہے، اور وضو کی حفاظت صرف مومن کرتا ہے۔“ (امام ابن حبان رحمہ اللہ فرماتے ہیں:) یہ وہ الفاظ ہیں جن کا ہم اپنی کتابوں میں کئی بار ذکر کر چکے ہیں، عرب اپنے محاورے میں کسی چیز کے مختلف اجزا میں سے کسی ایک جز پر مکمل چیز کا نام استعمال کرتے ہیں، وہ اس چیز کے نام کو اس ایک جز کے لیے استعمال کرتے ہیں۔ نبی اکرم صلی اللہ علیہ وسلم کا یہ فرمان: ”وضو کی حفاظت صرف مومن کرے گا۔“ یہاں لفظِ ایمان کا اطلاق وضو کی حفاظت کرنے والے پر کیا گیا ہے، حالانکہ وضو ایمان کے اجزا میں سے ایک جز ہے، اس طرح لفظِ ایمان کا اطلاق ایک ایسی مفرد چیز پر کیا گیا ہے جس پر عمل کیا جاتا ہے، اس کی وجہ یہ ہے کہ یہ ایمان کے اجزا میں سے ایک جز ہے، جیسا کہ ہم پہلے ذکر کر چکے ہیں۔ سالم بن ابوالجعد نے سیدنا ثوبان رضی اللہ عنہ کے حوالے سے جو روایت نقل کی ہے وہ منقطع ہے، اس لیے ہم نے اس سے پہلو تہی کی۔ [صحیح ابن حبان/كتاب الطهارة/حدیث: 1037]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”کیا میں تمہیں اس چیز کے بارے میں نہ بتاؤں جس کے ذریعے اللہ تعالیٰ خطاؤں کو مٹا دیتا ہے اور اس کے ذریعے درجات کو بلند کر دیتا ہے؟ جب طبیعت آمادہ نہ ہو، تو اچھی طرح وضو کرنا، زیادہ قدموں کے ساتھ چل کر مسجد تک جانا اور ایک نماز کے بعد دوسری نماز کا انتظار کرنا؛ یہی تیاری ہے، یہی تیاری ہے، یہی تیاری ہے۔“ (امام ابن حبان رحمہ اللہ فرماتے ہیں:) اس کا مطلب گناہوں سے (بچنے کے لیے) پہرہ ہے، کیونکہ وضو گناہوں کو ختم کر دیتا ہے۔ [صحیح ابن حبان/كتاب الطهارة/حدیث: 1038]

سیدنا جابر بن عبداللہ رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”کیا میں تمہاری رہنمائی اس چیز کی طرف نہ کروں جس کے ذریعے اللہ تعالیٰ خطاؤں کو مٹا دیتا ہے اور اس کے ذریعے گناہوں کو ختم کر دیتا ہے؟“ لوگوں نے عرض کی: جی ہاں، یا رسول اللہ! نبی اکرم صلی اللہ علیہ وسلم نے فرمایا: ”جب طبیعت آمادہ نہ ہو، تو اچھی طرح وضو کرنا، زیادہ قدموں کے ساتھ (چل کر) مسجد کی طرف جانا اور ایک نماز کے بعد دوسری نماز کا انتظار کرنا، یہی تیاری ہے۔“ [صحیح ابن حبان/كتاب الطهارة/حدیث: 1039]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب مسلمان بندہ (راوی کو شک ہے شاید یہ الفاظ ہیں) مومن بندہ وضو کرتے ہوئے اپنے چہرے کو دھوتا ہے، تو پانی کے ساتھ (راوی کو شک ہے شاید یہ الفاظ ہیں) پانی کے آخری قطرے کے ساتھ، یا اس کی مانند کوئی اور الفاظ ہیں، اس کے چہرے سے ہر وہ گناہ نکل جاتا ہے جس کی طرف اس نے اپنی دونوں آنکھوں سے دیکھا تھا، جب وہ اپنے دونوں بازو دھوتا ہے تو اس سے ہر وہ گناہ نکل جاتا ہے جس کو اس نے اپنے ہاتھوں کے ذریعے پکڑا تھا، پانی کے ساتھ (راوی کو شک ہے شاید یہ الفاظ ہیں) پانی کے آخری قطرے کے ساتھ، یہاں تک کہ وہ شخص گناہوں سے پاک ہو جاتا ہے۔“ [صحیح ابن حبان/كتاب الطهارة/حدیث: 1040]

حمران بیان کرتے ہیں کہ سیدنا عثمان غنی رضی اللہ عنہ صحن میں بیٹھے تھے، مؤذن ان کے پاس اطلاع دینے کے لیے آیا۔ انہوں نے پانی منگوایا، وضو کیا، پھر یہ بات ارشاد فرمائی: میں تم لوگوں کو ایک حدیث بیان کرنے لگا ہوں، اگر اللہ تعالیٰ کی کتاب میں ایک آیت موجود نہ ہوتی، تو میں وہ حدیث بیان نہ کرتا۔ میں نے نبی اکرم صلی اللہ علیہ وسلم کو یہ بات ارشاد فرماتے سنا ہے: ”جو بھی شخص اچھی طرح وضو کرتا ہے، پھر نماز ادا کرتا ہے، تو اللہ تعالیٰ اس شخص کے اس نماز اور اس کے بعد والی نماز کے درمیانی گناہوں کی مغفرت کر دیتا ہے، جب تک وہ (اگلی) نماز ادا نہیں کرتا۔“ امام مالک رحمہ اللہ بیان کرتے ہیں: میرا خیال ہے سیدنا عثمان غنی رضی اللہ عنہ کی مراد یہ آیت تھی: ﴿وَأَقِمِ الصَّلَاةَ طَرَفَيِ النَّهَارِ وَزُلَفًا مِنَ اللَّيْلِ ۚ إِنَّ الْحَسَنَاتِ يُذْهِبْنَ السَّيِّئَاتِ ۚ ذَٰلِكَ ذِكْرَىٰ لِلذَّاكِرِينَ﴾ [سورة هود: 114] ”تم دن کے دونوں کناروں اور رات کے کچھ حصہ میں نماز قائم کرو۔ بے شک نیکیاں گناہوں کو ختم کر دیتی ہیں۔ یہ نصیحت حاصل کرنے والوں کے لیے نصیحت ہے۔“ [صحیح ابن حبان/كتاب الطهارة/حدیث: 1041]

عاصم بن سفیان ثقفی بیان کرتے ہیں: لوگوں نے غزوہ سلاسل میں شرکت کی لیکن وہ دشمن پر قابو نہ پا سکے، وہ پہرے داری کرتے رہے، پھر جب سیدنا معاویہ رضی اللہ عنہ کے پاس واپس آئے، تو اس وقت ان کے پاس سیدنا ابوایوب انصاری اور سیدنا عقبہ بن عامر رضی اللہ عنہما بھی موجود تھے۔ عاصم بن سفیان نے کہا: اے سیدنا ابوایوب! اس سال ہم دشمن پر قابو نہیں پا سکے۔ ہمیں یہ بات بتائی گئی ہے، جو شخص چار مساجد میں نماز ادا کر لیتا ہے اس کے گناہوں کی مغفرت ہو جاتی ہے، تو انہوں نے فرمایا: اے میرے بھتیجے! کیا میں تمہاری رہنمائی اس چیز کی طرف نہ کروں جو تمہارے لیے اس سے زیادہ آسان ہے؟ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص اسی طرح وضو کرتا ہے، جس طرح اسے حکم دیا گیا ہے، اور اسی طرح نماز ادا کرتا ہے، جس طرح اسے حکم دیا گیا ہے، تو اس شخص کے گزشتہ گناہوں کی مغفرت ہو جاتی ہے۔“ (پھر انہوں نے سیدنا عقبہ رضی اللہ عنہ سے دریافت کیا) اے عقبہ! کیا اسی طرح ہے؟ انہوں نے جواب دیا: جی ہاں۔ (امام ابن حبان رحمہ اللہ فرماتے ہیں:) وہ چار مساجد یہ ہیں: مسجد حرام، مسجد مدینہ، مسجد اقصی اور مسجد قبا؛ جنگ سلاسل سیدنا معاویہ رضی اللہ عنہ کے عہد خلافت میں ہوئی تھی، اور غزوہ سلاسل نبی اکرم صلی اللہ علیہ وسلم کے عہد مبارک میں ہوا تھا۔ [صحیح ابن حبان/كتاب الطهارة/حدیث: 1042]

جامع بن شداد بیان کرتے ہیں کہ انہوں نے حمران کو ابو بردہ کو یہ بات بتاتے ہوئے سنا کہ سیدنا عثمان غنی رضی اللہ عنہ نے نبی اکرم صلی اللہ علیہ وسلم کا یہ فرمان نقل کیا ہے: ”جو شخص اس طرح مکمل وضو کرے جس طرح اللہ تعالیٰ نے اسے حکم دیا ہے، تو پانچ نمازیں، اپنے درمیان میں (ہونے) والے گناہ کا کفارہ بن جاتی ہیں۔“ [صحیح ابن حبان/كتاب الطهارة/حدیث: 1043]

اسحاق بن سعید اپنے والد کے حوالے سے اپنے دادا کا یہ بیان نقل کرتے ہیں کہ ایک مرتبہ میں سیدنا عثمان رضی اللہ عنہ کے ساتھ تھا، انہوں نے وضو کے لیے پانی منگوایا، پھر یہ بات بتائی کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جس بھی مسلمان کے سامنے فرض نماز کا وقت ہو جاتا ہے اور وہ اچھی طرح وضو کرے، اچھی طرح رکوع، اچھی طرح خشوع (کے ساتھ) نماز ادا کرے، تو یہ نماز اس کے پہلے گناہوں کا کفارہ بن جاتی ہے، جب کہ اس نے گناہِ کبیرہ کا ارتکاب نہ کیا ہو اور یہ (فضیلت) ہمیشہ حاصل ہوتی ہے۔“ [صحیح ابن حبان/كتاب الطهارة/حدیث: 1044]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اہل جنت کے زیور وہاں تک جائیں گے جہاں تک وضو کیا جاتا ہے۔“ [صحیح ابن حبان/كتاب الطهارة/حدیث: 1045]

سیدنا ابوہریرہ رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم قبرستان تشریف لے گئے، تو آپ صلی اللہ علیہ وسلم نے یہ دعا پڑھی: «السَّلَامُ عَلَيْكُمْ دَارَ قَوْمٍ مُؤْمِنِينَ، وَإِنَّا إِنْ شَاءَ اللَّهُ بِكُمْ لَاحِقُونَ» ”تم پر سلام ہو اے اہل ایمان کی بستی کے رہنے والو! بے شک ہم بھی، اگر اللہ نے چاہا، تو تم سے آ ملیں گے۔ میری یہ خواہش ہے کہ میں نے اپنے بھائیوں کو دیکھ لیا ہوتا۔“ لوگوں نے عرض کی: یا رسول اللہ! کیا ہم آپ کے بھائی نہیں ہیں؟ نبی اکرم صلی اللہ علیہ وسلم نے فرمایا: ”تم میرے ساتھی ہو، ہمارے بھائی وہ لوگ ہوں گے جو بعد میں آئیں گے اور میں حوض پر تمہارا پیش رو ہوں گا۔“ لوگوں نے عرض کی: یا رسول اللہ! آپ اپنی امت کے بعد میں آنے والے لوگوں کو کیسے پہچانیں گے؟ نبی اکرم صلی اللہ علیہ وسلم نے فرمایا: ”تمہارا کیا خیال ہے، اگر کسی شخص کا کوئی ایسا سیاہ گھوڑا ہو، جس کے ماتھے اور چاروں پاؤں کے پاس سفید نشان ہوں، تو کیا وہ مکمل سیاہ گھوڑوں کے درمیان اس کو پہچان نہیں لے گا؟“ لوگوں نے عرض کی: جی ہاں، یا رسول اللہ! نبی اکرم صلی اللہ علیہ وسلم نے فرمایا: ”وہ لوگ بھی جب قیامت کے دن آئیں گے تو وضو کی وجہ سے ان کی پیشانیاں چمک رہی ہوں گی اور میں حوض پر ان کا پیش رو ہوں گا، اور میرے حوض سے کچھ لوگوں کو پرے کر دیا جائے گا، جس طرح گم شدہ اونٹ کو پرے کیا جاتا ہے۔ میں انہیں پکار کر کہوں گا: آگے آؤ! آگے آؤ! تو یہ کہا جائے گا کہ ان لوگوں نے آپ کے بعد تبدیلی کر لی تھی، تو میں کہوں گا: پرے ہو جاؤ، پرے ہو جاؤ، پرے ہو جاؤ۔“ (امام ابن حبان رحمہ اللہ فرماتے ہیں:) ماضی کی چیز میں استثنیٰ کرنا ناممکن ہے۔ استثنیٰ صرف ان چیزوں میں ہو سکتا ہے جو مستقبل سے تعلق رکھتی ہوں۔ استثنیٰ کے بارے میں انسان کی حالت دو طرح کی ہو سکتی ہے۔ اس وقت جب وہ اپنے ایمان میں استثنیٰ کرتا ہے، ان میں سے ایک قسم وہ ہے جس کو مطلق طور پر کرنا آدمی کے لیے مباح ہے۔ دوسری قسم وہ ہے کہ اس میں انسان استثنیٰ کرے تو وہ کافر ہو جاتا ہے۔ جہاں تک اس قسم کا تعلق ہے جو جائز نہیں ہے، وہ یہ ہے کہ آدمی سے کہا جائے کہ کیا تم اللہ تعالیٰ، اس کے فرشتوں، اس کی کتابوں، رسولوں، جنت، جہنم، دوبارہ زندہ ہونے، میزان اور ان جیسی دوسری چیزوں پر ایمان رکھتے ہو، تو آدمی پر لازم ہے کہ وہ یہ کہے: میں اللہ تعالیٰ کے برحق ہونے پر اور ان چیزوں کے برحق ہونے پر ایمان رکھتا ہوں۔ جب آدمی ان چیزوں کے بارے میں استثنیٰ کرے گا تو وہ کافر ہو جائے گا، اور دوسری قسم یہ ہے کہ جب آدمی سے یہ سوال کیا جائے کہ کیا تم ان مومنوں میں سے ہو جو نماز قائم کرتے ہیں، زکوٰۃ ادا کرتے ہیں اور وہ ان میں خشوع کرتے ہیں اور وہ لغو چیزوں سے اعراض کرتے ہیں، تو وہ شخص پھر یہ کہے: میں امید کرتا ہوں کہ اگر اللہ نے چاہا تو میں ان میں سے ہوں گا۔ یا اس سے یہ کہا جائے کہ کیا تم جنتی ہو، تو وہ جنتی ہونے میں استثنیٰ کر لے۔ یہ فائدہ روایت سے اس طرح ثابت ہوتا ہے کہ نبی اکرم صلی اللہ علیہ وسلم نے یہ بات ارشاد فرمائی ہے: ”بے شک اگر اللہ نے چاہا تو ہم تم سے آ ملیں گے۔“ یہ اس وقت ہوا تھا جب نبی اکرم صلی اللہ علیہ وسلم چند صحابہ کے ہمراہ جنت البقیع میں تشریف لائے تھے، جس میں مومن اور منافق دونوں لوگ تھے؛ ”بے شک اگر اللہ نے چاہا تو ہم تم سے آ ملیں گے“ (یہاں نبی اکرم صلی اللہ علیہ وسلم نے استثنیٰ کر لیا)، جبکہ منافقین کے بارے میں آپ صلی اللہ علیہ وسلم نے یہ استثنیٰ کیا کہ اگر اللہ نے چاہا تو وہ مسلمان ہو کر تم لوگوں سے آ ملیں گے۔ اس کی بنیاد پر یہ بات سامنے آتی ہے کہ لغت اس بات کو درست قرار دیتی ہے کہ مستقبل سے تعلق رکھنے والی کسی چیز کے بارے میں استثنیٰ کیا جا سکتا ہے، اگرچہ اس کے ہونے کے بارے میں شک نہ ہو۔ اس کی دلیل اللہ تعالیٰ کا یہ فرمان ہے: ﴿لَتَدْخُلُنَّ الْمَسْجِدَ الْحَرَامَ إِنْ شَاءَ اللَّهُ آمِنِينَ﴾ [سورة الفتح: 27] ”اگر اللہ نے چاہا تو تم لوگ ضرور بہ ضرور امن کی حالت میں مسجد حرام میں داخل ہو گے۔“ [صحیح ابن حبان/كتاب الطهارة/حدیث: 1046]