عمرو بن یحییٰ اپنے والد کا یہ بیان نقل کرتے ہیں کہ میں اس وقت عمرو بن ابوحسن کے پاس موجود تھا، انہوں نے سیدنا عبداللہ بن زید رضی اللہ عنہ سے وضو کے بارے میں دریافت کیا، تو انہوں نے وضو کے پانی کا برتن منگوایا اور اسے اپنے ہاتھوں پر انڈیلا، انہوں نے اپنے ہاتھوں کو تین مرتبہ دھویا، پھر اپنا ہاتھ برتن میں داخل کر کے کلی کی اور ناک میں پانی ڈالا، انہوں نے ایسا تین مرتبہ کیا اور تین مرتبہ چلو میں پانی لے کر کیا، پھر انہوں نے اپنا ہاتھ برتن میں داخل کر کے چہرے کو تین مرتبہ دھویا، پھر اپنا ہاتھ برتن میں داخل کر کے اپنے دونوں بازوؤں کو کہنیوں تک دو مرتبہ دھویا، پھر اپنا ہاتھ برتن میں داخل کر کے اپنے سر کا مسح کیا، وہ (ہاتھوں کو) آگے سے پیچھے لے کر گئے پھر پیچھے سے آگے کی طرف لے کر آئے، پھر انہوں نے اپنا ہاتھ برتن میں داخل کیا اور اپنے دونوں پاؤں ٹخنوں تک دھو لیے۔ [صحیح ابن حبان/كتاب الطهارة/حدیث: 1077]

سیدنا عبداللہ بن عباس رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو دیکھا، آپ نے ایک چلو میں پانی لیا اور کلی کی اور ناک میں پانی ڈالا، پھر آپ نے ایک چلو لیا اور اپنے چہرے کو دھویا، پھر آپ نے ایک چلو لیا اور اپنے دائیں بازو کو دھویا، پھر آپ نے ایک چلو لیا اور بائیں بازو کو دھویا، پھر آپ نے چلو میں پانی لیا اور اپنے سر کا اور اپنے کان کے اندرونی اور بیرونی حصے کا مسح کیا، پھر آپ نے اپنی انگلیاں کانوں میں داخل کیں، پھر آپ نے چلو میں پانی لیا اور اپنے دائیں پاؤں کو دھویا، پھر چلو میں پانی لیا اور بائیں پاؤں کو دھویا۔ [صحیح ابن حبان/كتاب الطهارة/حدیث: 1078]

عبدخیر بیان کرتے ہیں کہ سیدنا علی رضی اللہ عنہ فجر کی نماز ادا کرنے کے بعد میدان میں تشریف لائے، آپ وہاں تشریف فرما ہوئے پھر آپ نے لڑکے سے کہا: میرے پاس وضو کا پانی لے کر آؤ، وہ لڑکا آپ کے پاس پانی کا برتن اور طشت لے کر آیا۔ عبدخیر بیان کرتے ہیں: ہم لوگ بیٹھے ہوئے آپ کی طرف دیکھ رہے تھے۔ راوی بیان کرتے ہیں: سیدنا علی رضی اللہ عنہ نے دائیں ہاتھ کے ذریعے برتن پکڑا اور اس کے ذریعے اپنے بائیں ہاتھ پر پانی انڈیلا پھر انہوں نے اپنے دونوں ہاتھ دھوئے، ہر مرتبہ میں انہوں نے برتن میں ہاتھ داخل نہیں کیا، یہاں تک کہ انہوں نے دونوں ہاتھ تین مرتبہ دھو لیے پھر انہوں نے اپنا دایاں ہاتھ برتن میں داخل کیا، راوی بیان کرتے ہیں: انہوں نے کلی کی، ناک میں پانی ڈالا اور دائیں ہاتھ کے ذریعے ناک صاف کیا۔ انہوں نے یہ عمل تین مرتبہ کیا پھر انہوں نے اپنے چہرے کو تین مرتبہ دھویا پھر دائیں بازو کو کہنی تک تین مرتبہ دھویا پھر بائیں بازو کو کہنی تک تین مرتبہ دھویا پھر انہوں نے اپنا دایاں ہاتھ برتن میں داخل کیا یہاں تک کہ اسے ڈبو دیا، یہاں تک کہ انہوں نے اس میں موجود پانی سمیت نکالا اور اپنے بائیں ہاتھ پر مسح کیا۔ انہوں نے اپنے سر کا مسح دونوں ہاتھوں سے ایک مرتبہ کیا پھر انہوں نے اپنے بائیں ہاتھ کے ذریعے دائیں پاؤں پر پانی ڈالا پھر اسے بائیں ہاتھ کے ذریعے تین مرتبہ دھویا پھر انہوں نے اپنے دائیں ہاتھ کے ذریعے بائیں پاؤں پر تین مرتبہ پانی ڈالا اور اسے اپنے بائیں ہاتھ سے دھویا پھر انہوں نے اپنا ہاتھ برتن میں داخل کیا۔ اس میں سے ایک چلو لیا اور اسے پی لیا پھر یہ بات بیان کی: یہ نبی اکرم صلی اللہ علیہ وسلم کے وضو کا طریقہ ہے، جو شخص اللہ کے نبی کے وضو کے طریقے کو دیکھنا چاہتا ہو، تو یہ آپ کے وضو کا طریقہ ہے۔ [صحیح ابن حبان/كتاب الطهارة/حدیث: 1079]

عبیداللہ خولانی سیدنا عبداللہ بن عباس رضی اللہ عنہما کا یہ بیان نقل کرتے ہیں کہ سیدنا علی رضی اللہ عنہ میرے ہاں تشریف لائے، وہ پیشاب کر چکے تھے۔ انہوں نے وضو کے لیے پانی منگوایا، ہم ایک بڑے برتن میں آپ کے پاس پانی لے کر آئے جس میں ایک مد پانی آ جاتا ہے۔ اسے آپ کے سامنے رکھا گیا، تو سیدنا علی رضی اللہ عنہ نے دریافت کیا: ”کیا میں تمہارے سامنے نبی اکرم صلی اللہ علیہ وسلم کے وضو کی طرح وضو کر کے نہ دکھاؤں؟“ میں نے عرض کی: میرے ماں باپ آپ پر قربان ہوں (ضرور ایسا کریں)۔ راوی بیان کرتے ہیں: پھر سیدنا علی رضی اللہ عنہ نے دونوں ہاتھ دھوئے، انہوں نے کلی کی، ناک میں پانی ڈالا، ناک کو صاف کیا، پھر انہوں نے اپنے دائیں ہاتھ میں پانی لے کر اسے اپنے چہرے پر چھپکا مار کر (دھویا) یہاں تک کہ انہوں نے پورا وضو کیا۔ [صحیح ابن حبان/كتاب الطهارة/حدیث: 1080]

ابووائل بیان کرتے ہیں: میں نے سیدنا عثمان غنی رضی اللہ عنہ کو وضو کرتے ہوئے دیکھا، انہوں نے اپنی داڑھی کا تین مرتبہ خلال کیا، پھر یہ بات بیان کی: ”میں نے نبی اکرم صلی اللہ علیہ وسلم کو اسی طرح کرتے ہوئے دیکھا ہے۔“ [صحیح ابن حبان/كتاب الطهارة/حدیث: 1081]

عباد بن تمیم اپنے چچا (رضی اللہ عنہ) کا یہ بیان نقل کرتے ہیں: میں نے نبی اکرم صلی اللہ علیہ وسلم کو وضو کرتے ہوئے دیکھا ہے، آپ صلی اللہ علیہ وسلم اپنے دونوں بازو مل رہے تھے۔ [صحیح ابن حبان/كتاب الطهارة/حدیث: 1082]

عباد بن تمیم اپنے چچا سیدنا عبداللہ بن زید رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم کی خدمت میں دو تہائی مد پانی لایا گیا، آپ صلی اللہ علیہ وسلم نے وضو کیا اور اپنے دونوں بازوؤں کو ملا۔ [صحیح ابن حبان/كتاب الطهارة/حدیث: 1083]

عمرو بن یحییٰ اپنے والد کا یہ بیان نقل کرتے ہیں کہ انہوں نے سیدنا عبداللہ بن زید رضی اللہ عنہ سے (جو عمرو بن یحییٰ کے دادا ہیں) یہ کہا: کیا آپ یہ کر کے دکھا سکتے ہیں کہ نبی اکرم صلی اللہ علیہ وسلم کس طرح وضو کیا کرتے تھے؟ تو سیدنا عبداللہ بن زید رضی اللہ عنہ نے کہا: جی ہاں، پھر انہوں نے وضو کا پانی منگوایا اور اپنے دائیں ہاتھ پر تین مرتبہ پانی انڈیلا، پھر انہوں نے اپنے چہرے کو تین مرتبہ دھویا، پھر دونوں ہاتھ دو دو مرتبہ کہنیوں تک دھوئے، پھر اپنے سر کا دونوں ہاتھوں کے ذریعے مسح کیا، وہ ہاتھ آگے سے پیچھے کی طرف لے کر گئے، پھر پیچھے سے آگے کی طرف لے کر آئے، انہوں نے سر کے آگے والے حصے سے آغاز کیا تھا، پھر پیچھے گدی تک ہاتھ لے کر گئے، پھر اسے واپس اسی جگہ لے کر آئے جہاں سے آغاز کیا تھا، پھر انہوں نے اپنے دونوں پاؤں دھوئے اور یہ بات بیان کی کہ میں نے نبی اکرم صلی اللہ علیہ وسلم کو اسی طرح وضو کرتے ہوئے دیکھا ہے۔ [صحیح ابن حبان/كتاب الطهارة/حدیث: 1084]

حبان بن واسع اپنے والد کے حوالے سے یہ بات نقل کرتے ہیں کہ انہوں نے سیدنا عبداللہ بن زید بن عاصم مازنی رضی اللہ عنہ کو یہ ذکر کرتے ہوئے سنا کہ نبی اکرم صلی اللہ علیہ وسلم نے وضو کیا، آپ صلی اللہ علیہ وسلم نے کلی کی، ناک میں پانی ڈالا پھر اپنے چہرہ مبارک کو تین مرتبہ دھویا، اپنے دائیں بازو کو تین مرتبہ دھویا اور دوسرے کو بھی اسی کی مانند (تین مرتبہ) دھویا، اپنے سر کا مسح ہاتھ پر موجود پانی کے علاوہ اضافی پانی لیے بغیر کیا اور اپنے دونوں پاؤں دھوئے یہاں تک کہ انہیں اچھی طرح صاف کیا۔ [صحیح ابن حبان/كتاب الطهارة/حدیث: 1085]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے وضو کرتے ہوئے چلو میں پانی لیا، آپ صلی اللہ علیہ وسلم نے اپنے چہرے کو دھویا، پھر چلو میں پانی لیا اور اپنے دائیں بازو کو دھویا، پھر چلو میں پانی لیا اور اپنے بائیں بازو کو دھویا، پھر چلو میں پانی لیا اور اپنے سر اور دونوں کانوں کا مسح کیا، ان کے اندرونی حصے میں شہادت کی انگلیوں کے ذریعے مسح کیا، آپ صلی اللہ علیہ وسلم نے اپنے دونوں ہاتھوں کے انگوٹھوں کو باہر والے حصے پر رکھا، نبی اکرم صلی اللہ علیہ وسلم نے ان کے اندرونی اور بیرونی حصے کا مسح کیا، پھر آپ صلی اللہ علیہ وسلم نے چلو میں پانی لیا اور اپنے دائیں پاؤں کو دھویا، پھر چلو میں پانی لیا اور بائیں پاؤں کو دھویا۔ [صحیح ابن حبان/كتاب الطهارة/حدیث: 1086]