عاصم بن لقیط بن صبرہ اپنے والد رضی اللہ عنہ کا یہ بیان نقل کرتے ہیں، میں نے عرض کی: یا رسول اللہ صلی اللہ علیہ وسلم ! آپ مجھے وضو کے بارے میں بتائیں، تو نبی اکرم صلی اللہ علیہ وسلم نے ارشاد فرمایا: ”تم اچھی طرح وضو کرو، انگلیوں کے درمیان خلال کرو، ناک میں اچھی طرح پانی ڈالو اگر تم روزے کی (حالت میں ہو، تو حکم مختلف ہے)۔“ [صحیح ابن حبان/كتاب الطهارة/حدیث: 1087]

محمد بن زیاد بیان کرتے ہیں کہ سیدنا ابوہریرہ رضی اللہ عنہ لوگوں کے پاس تشریف لاتے تھے جبکہ وہ لوگ اس وقت وضو خانے میں وضو کر رہے ہوتے تھے۔ سیدنا ابوہریرہ رضی اللہ عنہ ان سے فرمایا کرتے تھے: اللہ تعالیٰ تمہیں برکت دے، تم لوگ اچھی طرح وضو کرو، کیونکہ میں نے سیدنا ابوالقاسم صلی اللہ علیہ وسلم کو یہ بات ارشاد فرماتے ہوئے سنا ہے: ”بعض ایڑیوں کے لیے جہنم کی بربادی ہے۔“ [صحیح ابن حبان/كتاب الطهارة/حدیث: 1088]

عبدالرحمان بن جندب اپنے والد رضی اللہ عنہ کا یہ بیان نقل کرتے ہیں کہ ابوجبیر کندی رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، نبی اکرم صلی اللہ علیہ وسلم نے ان کے لیے وضو کا پانی لانے کے لیے حکم دیا اور ارشاد فرمایا: ”اے ابوجبیر! تم جاؤ اور وضو کرو۔“ انہوں نے اپنے منہ کے ذریعے آغاز کیا تو نبی اکرم صلی اللہ علیہ وسلم نے ان سے فرمایا: ”تم اپنے منہ کے ذریعے آغاز نہ کرو، کیونکہ کافر شخص اپنے منہ کے ذریعے آغاز کرتا ہے۔“ پھر نبی اکرم صلی اللہ علیہ وسلم نے وضو کا پانی منگوایا، آپ صلی اللہ علیہ وسلم نے دونوں ہاتھ دھوئے، انہیں اچھی طرح صاف کیا، پھر آپ صلی اللہ علیہ وسلم نے کلی کی، پھر ناک میں پانی ڈالا، پھر اپنے چہرے کو تین مرتبہ دھویا، پھر دائیں بازو کو کہنیوں تک تین مرتبہ دھویا، پھر بائیں بازو کو کہنیوں تک تین مرتبہ دھویا، پھر آپ صلی اللہ علیہ وسلم نے اپنے سر کا مسح کیا، پھر دونوں پاؤں دھو لیے۔ [صحیح ابن حبان/كتاب الطهارة/حدیث: 1089]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب تم لباس پہنو اور جب تم وضو کرو، تو اپنے دائیں طرف والے حصے سے آغاز کرو۔“ [صحیح ابن حبان/كتاب الطهارة/حدیث: 1090]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم کو، جہاں تک ہو سکے، وضو کرتے ہوئے، جوتا پہنتے ہوئے اور کنگھی کرتے ہوئے دائیں طرف سے آغاز کرنا پسند تھا۔ شعبہ نامی راوی کہتے ہیں: میں نے اشعث نامی راوی کو واسط میں یہ بیان کرتے سنا ہے: ”(نبی اکرم صلی اللہ علیہ وسلم ) دائیں طرف کو پسند کرتے تھے“، پھر انہوں نے تمام معاملات کا ذکر کیا، پھر انہوں نے یہ بات بیان کی کہ میں نے انہیں کوفہ میں یہ کہتے سنا ہے: ”نبی اکرم صلی اللہ علیہ وسلم کو جہاں تک ہو سکے دائیں طرف سے آغاز کرنا پسند تھا۔“ [صحیح ابن حبان/كتاب الطهارة/حدیث: 1091]

مطلب بن حنطب بیان کرتے ہیں: سیدنا عبداللہ بن عمر رضی اللہ عنہما تین مرتبہ وضو کرتے تھے اور اس بات کی نسبت نبی اکرم صلی اللہ علیہ وسلم کی طرف کرتے تھے۔ [صحیح ابن حبان/كتاب الطهارة/حدیث: 1092]

سیدنا عبداللہ بن زید رضی اللہ عنہ بیان کرتے ہیں کہ نبی اکرم صلی اللہ علیہ وسلم ہمارے ہاں گھر میں موجود تھے، آپ صلی اللہ علیہ وسلم نے وضو کا پانی منگوایا، میں پیتل کے بنے برتن میں پانی لے کر حاضر ہوا تو نبی اکرم صلی اللہ علیہ وسلم نے وضو کیا؛ آپ صلی اللہ علیہ وسلم نے اپنے چہرے کو تین مرتبہ دھویا، دونوں بازو دو مرتبہ دھوئے، پھر آپ صلی اللہ علیہ وسلم نے اپنے سر کا مسح کیا، آپ صلی اللہ علیہ وسلم اپنے ہاتھوں کو آگے سے پیچھے کی طرف لے کر گئے اور پیچھے سے آگے لے کر آئے، اور آپ صلی اللہ علیہ وسلم نے اپنے دونوں پاؤں دھوئے۔ [صحیح ابن حبان/كتاب الطهارة/حدیث: 1093]

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم نے ”دو مرتبہ“ وضو کیا۔ [صحیح ابن حبان/كتاب الطهارة/حدیث: 1094]

سیدنا عبداللہ بن عباس رضی اللہ عنہما بیان کرتے ہیں: میں نبی اکرم صلی اللہ علیہ وسلم کے وضو کے بارے میں تم سب سے زیادہ علم رکھتا ہوں، نبی اکرم صلی اللہ علیہ وسلم نے ”ایک مرتبہ“ (بھی) وضو کیا۔ [صحیح ابن حبان/كتاب الطهارة/حدیث: 1095]

سیدنا جابر بن عبداللہ رضی اللہ عنہما بیان کرتے ہیں کہ ہم لوگ نبی اکرم صلی اللہ علیہ وسلم کے ہمراہ غزوہ ذات الرقاع میں روانہ ہوئے، مسلمانوں سے تعلق رکھنے والے ایک شخص نے مشرکین سے تعلق رکھنے والے ایک شخص کی بیوی کو قتل کر دیا (یا اسے نقصان پہنچایا)۔ جب نبی اکرم صلی اللہ علیہ وسلم واپس تشریف لا رہے تھے، تو اسی دوران اس عورت کا شوہر وہاں آ چکا تھا جو پہلے وہاں موجود نہیں تھا۔ جب اسے اس بارے میں بتایا گیا، تو اس نے یہ قسم اٹھائی تھی کہ وہ اس وقت تک باز نہیں آئے گا جب تک سیدنا محمد صلی اللہ علیہ وسلم کے ساتھیوں میں سے کسی کا خون نہیں بہائے گا۔ وہ نبی اکرم صلی اللہ علیہ وسلم کا پیچھا کرتے ہوئے آیا۔ نبی اکرم صلی اللہ علیہ وسلم نے ایک جگہ پڑاؤ کیا اور ارشاد فرمایا: ”آج رات کون یہاں ہماری پہرے داری کرے گا؟“ تو مہاجرین سے تعلق رکھنے والے ایک شخص اور انصار سے تعلق رکھنے والے ایک شخص نے خود کو پیش کیا۔ ان دونوں نے عرض کی: «يَا رَسُولَ اللّٰهِ» ”یا رسول اللہ! ہم ایسا کریں گے۔“ نبی اکرم صلی اللہ علیہ وسلم نے فرمایا: ”تم گھاٹی کے سرے پر رہنا۔“ راوی بیان کرتے ہیں کہ نبی اکرم صلی اللہ علیہ وسلم اور آپ کے اصحاب نے وادی کی گھاٹی میں پڑاؤ کر لیا۔ جب یہ دونوں صاحبان گھاٹی کے سرے کی طرف جانے کے لیے نکلے تو انصاری شخص نے مہاجر سے کہا: آپ کو کیا پسند ہے، میں رات کے کون سے حصے میں آپ کی جگہ کفایت کروں، ابتدائی حصے میں یا آخری حصے میں؟ تو مہاجر نے کہا: اس کے ابتدائی حصے میں کفایت کرو۔ راوی بیان کرتے ہیں: مہاجر شخص لیٹ کر سو گیا۔ انصاری اٹھ کر نماز ادا کرنے لگا، اس دوران اس عورت کا شوہر آیا، جب اس نے ایک شخص کے ہیولے کو دیکھا تو اسے اندازہ ہو گیا کہ یہ لوگوں کا پہرے دار ہے۔ اس نے ایک تیر مارا وہ جا کر اس انصاری کو لگا۔ انصاری نے اس تیر کو نکال کر ایک طرف رکھا اور کھڑا ہو کر نماز ادا کرتا رہا، پھر اس شخص نے انصاری کو دوسرا تیر مارا وہ بھی اسے لگا۔ انصاری نے اسے باہر نکالا اور کھڑا ہو کر نماز ادا کرتا رہا۔ پھر اس نے تیسری مرتبہ تیر مارا وہ بھی اسے لگا۔ انصاری نے اسے باہر نکالا اور اسے ایک طرف رکھ دیا، پھر وہ رکوع میں گیا، پھر اس نے سجدہ کیا، پھر اس نے اپنے ساتھی کو بیدار کیا اور کہا: اٹھو! کہ مجھ پر حملہ ہو گیا ہے۔ تو وہ (مہاجر) فوراً اٹھ گیا۔ جب اس شخص نے ان دو آدمیوں کو دیکھا تو اسے اندازہ ہو گیا کہ اسے مشکل پیش آ جائے گی، تو وہ شخص بھاگ گیا۔ جب مہاجر نے انصاری کا بہتا ہوا خون دیکھا تو بولا: «سُبْحَانَ اللّٰهِ» ”سبحان اللہ! جب اس نے تمہیں پہلی مرتبہ تیر مارا تھا، تو تم نے اس وقت مجھے بیدار کیوں نہیں کیا؟“ تو انصاری نے جواب دیا: میں ایک سورت کی تلاوت کر رہا تھا، تو مجھے یہ اچھا نہیں لگا کہ میں اسے ختم کرنے سے پہلے درمیان میں ہی منقطع کر دوں، لیکن جب اس نے مسلسل مجھے تیر مارے تو میں رکوع میں چلا گیا اور میں نے تمہیں اطلاع دی۔ «وَاللّٰهِ» ”اللہ کی قسم! اگر مجھے اس بات کا اندیشہ نہ ہوتا کہ نبی اکرم صلی اللہ علیہ وسلم نے مجھے جس کام کی حفاظت کا حکم دیا ہے میں اسے ضائع کر دوں گا، تو میری اس سورت کو ختم کرنے سے پہلے میری جان چلی جاتی یا پھر یہ ہے کہ میں اسے مکمل کر لیتا۔“ [صحیح ابن حبان/كتاب الطهارة/حدیث: 1096]