سیدنا عبداللہ بن عباس رضی اللہ عنہما بیان کرتے ہیں کہ انصار سے تعلق رکھنے والا ایک شخص مسلمان ہو گیا، پھر وہ مرتد ہو گیا اور مشرکین سے جا ملا، پھر اسے ندامت ہوئی، اس نے اپنی قوم کی طرف پیغام بھیجا کہ تم لوگ نبی اکرم صلی اللہ علیہ وسلم سے دریافت کرو: کیا میرے لیے توبہ کی گنجائش ہے؟ راوی بیان کرتے ہیں کہ تو یہ آیت نازل ہوئی: ﴿اللہ تعالیٰ اس قوم کو کیسے ہدایت نصیب کر سکتا ہے، جو اسلام قبول کرنے کے بعد کافر ہو جائیں جب کہ وہ اس بات کی یہ گواہی دے چکے ہوں کہ رسول سچا ہے اور ان کے پاس دلائل بھی آ چکے ہوں﴾ [سورة آل عمران: 86] ، آیت یہاں تک ہے: ﴿ماسوائے ان لوگوں کے جو اس کے بعد توبہ کر لیں اور وہ ٹھیک ہو جائیں، بے شک اللہ تعالیٰ مغفرت کرنے والا ہے اور رحم کرنے والا ہے﴾ [سورة آل عمران: 89] ، تو اس کی قوم نے اسے پیغام بھجوایا تو اس نے اسلام قبول کر لیا۔ [صحیح ابن حبان/كتاب الحدود/حدیث: 4477]