سیدہ عائشہ صدیقہ رضی اللہ عنہا بیان کرتی ہیں کہ سود کے بارے میں سورہ بقرہ کی آخری آیات جب نازل ہوئیں، تو نبی اکرم صلی اللہ علیہ وسلم تشریف لے گئے اور آپ صلی اللہ علیہ وسلم نے شراب کی تجارت کو حرام قرار دیا۔ [صحیح ابن حبان/كتاب البيوع/حدیث: 4943]

سیدنا عبداللہ بن عباس رضی اللہ عنہما بیان کرتے ہیں کہ جس زمانے میں شراب کو حرام قرار نہیں دیا گیا تھا، ایک شخص (اپنے گھر سے) نکلا، اس نے نبی اکرم صلی اللہ علیہ وسلم کو شراب کا ایک مشکیزہ تحفے کے طور پر پیش کرنا تھا، وہ اپنے اونٹ پر سوار ہو کر آیا، اس نے نبی اکرم صلی اللہ علیہ وسلم کو تشریف فرما پایا تو نبی اکرم صلی اللہ علیہ وسلم نے دریافت کیا: ”تمہارے ساتھ کیا ہے؟“ اس نے عرض کی: شراب کا مشکیزہ ہے جو میں نے آپ کو تحفے کے طور پر پیش کرنا ہے۔ نبی اکرم صلی اللہ علیہ وسلم نے دریافت کیا: ”کیا تم یہ بات جانتے ہو کہ اللہ تعالیٰ نے اسے حرام قرار دے دیا ہے؟“ اس نے عرض کی: جی نہیں۔ نبی اکرم صلی اللہ علیہ وسلم نے فرمایا: ”بیشک اللہ تعالیٰ نے اسے حرام قرار دے دیا ہے۔“ تو وہ شخص اونٹ کو لے کر چلنے والے شخص کی طرف متوجہ ہوا اور اس نے پست آواز میں اس کے ساتھ کوئی بات کی تو وہ شخص کھڑا ہو گیا۔ نبی اکرم صلی اللہ علیہ وسلم نے دریافت کیا: ”تم نے اس سے کیا کہا ہے؟“ اس نے عرض کی: میں نے اسے حکم دیا ہے کہ وہ اس کو فروخت کر دے۔ نبی اکرم صلی اللہ علیہ وسلم نے فرمایا: ”بیشک جس چیز کے پینے کو حرام قرار دیا گیا ہے، اس کے فروخت کرنے کو بھی حرام قرار دیا گیا ہے۔“ راوی کہتے ہیں: تو اس شخص نے حکم دیا، اس مشکیزے کا منہ کھول دیا گیا اور اس میں سے شراب نکل کر مٹی میں مل گئی، میں کھلے میدان میں اس کی طرف دیکھ رہا تھا، یہاں تک کہ اس مشکیزے میں کچھ بھی باقی نہیں رہا۔ [صحیح ابن حبان/كتاب البيوع/حدیث: 4944]

سیدنا انس بن مالک رضی اللہ عنہ بیان کرتے ہیں کہ جس دن شراب کو حرام قرار دیا گیا، میں اس دن گیارہ آدمیوں کو شراب پلا رہا تھا۔ سیدنا انس رضی اللہ عنہ بیان کرتے ہیں: (جب اس کی حرمت کا حکم پہنچ گیا) تو ان لوگوں نے مجھے یہ ہدایت کی کہ میں اس شراب کو گرا دوں۔ لوگوں نے اپنے برتنوں میں موجود شراب کو بھی گرا دیا یہاں تک کہ اس شراب کی بو کی وجہ سے گلیوں میں سے گزرنا مشکل ہو گیا۔ سیدنا انس رضی اللہ عنہ بیان کرتے ہیں: اس زمانے میں شراب صرف خشک اور تازہ کھجوروں سے بنائی جاتی تھی۔ ایک شخص نبی اکرم صلی اللہ علیہ وسلم کی خدمت میں حاضر ہوا، اس نے عرض کی: میرے پاس ایک یتیم کا مال ہے، میں نے اس کے ذریعے شراب خریدی ہوئی ہے، آپ کی کیا رائے ہے، میں اسے فروخت کر کے اس یتیم کا مال اسے واپس کر دوں؟ نبی اکرم صلی اللہ علیہ وسلم نے فرمایا: ”اللہ تعالیٰ یہودیوں کو برباد کرے، جب ان پر چربی کو حرام قرار دیا گیا تو انہوں نے اسے فروخت کر دیا اور اس کی قیمت کھا گئے۔“ (راوی کہتے ہیں) تو نبی اکرم صلی اللہ علیہ وسلم نے مجھے شراب کو فروخت کرنے کی اجازت نہیں دی۔ [صحیح ابن حبان/كتاب البيوع/حدیث: 4945]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”حمل کے حمل کو فروخت کرنے سے منع کیا ہے۔“ [صحیح ابن حبان/كتاب البيوع/حدیث: 4946]

سیدنا عبداللہ بن عمر رضی اللہ عنہما بیان کرتے ہیں: ”نبی اکرم صلی اللہ علیہ وسلم نے حمل کے حمل کو فروخت کرنے سے منع کیا ہے۔“ زمانہ جاہلیت کے لوگ یہ سودا کیا کرتے تھے۔ ایک شخص اونٹ کو یوں خریدتا تھا کہ جب اس اونٹنی کے ہاں بچہ ہوگا اور پھر اس کے پیٹ میں موجود بچے کے ہاں بچہ ہوگا، (تو اس وقت ادائیگی کی جائے گی)، (امام ابن حبان رحمہ اللہ فرماتے ہیں:) حمل کے حمل کو فروخت کرنے کی ممانعت سے مراد یہ ہے: ایک شخص کوئی اونٹ خریدتا ہے اس شرط پر کہ وہ اس کی پوری قیمت اس وقت ادا کرے گا جب فلاں اونٹنی کے ہاں بچہ ہو جائے گا اور اس کے ہونے والے بچے کے ہاں بچہ ہو جائے گا تو یہ اس کی طے شدہ مدت ہوتی تھی۔ اس میں دو قسم کے نقصان کا سامنا کرنا پڑتا ہے، اس لیے اس پر عمل کرنا جائز نہیں ہے۔ [صحیح ابن حبان/كتاب البيوع/حدیث: 4947]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”ولاء کو فروخت کرنے اور اسے ہبہ کرنے سے منع کیا ہے۔“ [صحیح ابن حبان/كتاب البيوع/حدیث: 4948]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”ولاء کو فروخت کرنے اور اسے ہبہ کرنے سے منع کیا ہے“۔ زہیر نامی راوی بیان کرتے ہیں کہ یہ روایت عبداللہ بن دینار کے صاحبزادے نے اپنے والد کے حوالے سے اسی کی مانند مجھے سنائی ہے، ان کا نام عبدالرحمن بن عبداللہ بن دینار ہے۔ [صحیح ابن حبان/كتاب البيوع/حدیث: 4949]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”ولاء، نسبی رشتے کی طرح ایک پختہ تعلق ہے، جسے فروخت نہیں کیا جا سکتا اور ہبہ نہیں کیا جا سکتا۔“ [صحیح ابن حبان/كتاب البيوع/حدیث: 4950]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”دھوکے کے سودے سے منع کیا ہے“۔ [صحیح ابن حبان/كتاب البيوع/حدیث: 4951]

سیدنا ایاس بن عبداللہ مزنی رضی اللہ عنہ، جو نبی اکرم صلی اللہ علیہ وسلم کے اصحاب میں سے ہیں، وہ بیان کرتے ہیں کہ نبی اکرم صلی اللہ علیہ وسلم نے ”پانی کو فروخت کرنے“ سے منع کیا ہے۔ عمرو (نامی راوی) کو یہ نہیں معلوم کہ اس سے مراد کون سا پانی ہے؟ [صحیح ابن حبان/كتاب البيوع/حدیث: 4952]