سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم کے اصحاب میں سے ایک صاحب نے اپنے غلام کو اپنے بعد آزاد قرار دیا، ان کے پاس اس غلام کے علاوہ اور کوئی مال نہیں تھا، تو نبی اکرم صلی اللہ علیہ وسلم نے اس کو پکڑا اور اسے فروخت کر دیا اور آپ صلی اللہ علیہ وسلم نے ارشاد فرمایا: ”تم اس کی قیمت کے زیادہ ضرورت مند ہو اور اللہ تعالیٰ اس سے زیادہ بے نیاز ہے۔“ [صحیح ابن حبان/كتاب البيوع/حدیث: 4933]

سیدنا جابر رضی اللہ عنہما بیان کرتے ہیں کہ انصار سے تعلق رکھنے والے ایک شخص نے اپنے غلام کو مدبر کے طور پر آزاد کر دیا، اس غلام کا نام یعقوب تھا اور جن صاحب نے اسے آزاد کیا تھا ان کا نام ابومذکور تھا، ان صاحب کے پاس اس غلام کے علاوہ اور کوئی مال نہیں تھا، نبی اکرم صلی اللہ علیہ وسلم نے اس غلام کو بلوایا اور دریافت فرمایا: ”اسے مجھ سے کون خریدے گا؟“ تو سیدنا نعیم بن عبداللہ رضی اللہ عنہما، جن کا تعلق بنو عدی بن کعب سے تھا، انہوں نے آٹھ سو درہم کے عوض میں وہ غلام نبی اکرم صلی اللہ علیہ وسلم سے خرید لیا، پھر نبی اکرم صلی اللہ علیہ وسلم نے ان صاحب کو بلایا اور فرمایا: ”اپنی ذات سے آغاز کرو، اگر تمہارے پاس اضافی مال ہو تو اپنے بیوی بچوں پر خرچ کرو، اگر پھر بھی اضافی ہو تو اپنے رشتہ داروں پر خرچ کرو، اگر پھر بھی اضافی ہو تو پھر ادھر اُدھر (یعنی اللہ کی راہ میں) خرچ کرو۔“ راوی بیان کرتے ہیں کہ سیدنا جابر رضی اللہ عنہما جب یہ حدیث بیان کرتے تھے تو یہ بھی فرمایا کرتے تھے کہ وہ ایک قبطی غلام تھا جو ایک سال کے اندر ہی فوت ہو گیا۔ [صحیح ابن حبان/كتاب البيوع/حدیث: 4934]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم کے زمانہ اقدس میں چیزوں کی قیمتیں بڑھ گئیں، لوگوں نے عرض کی: یا رسول اللہ صلی اللہ علیہ وسلم ! چیزوں کی قیمتیں بڑھ گئی ہیں، اب ہمارے لیے قیمتیں متعین کر دیں۔ نبی اکرم صلی اللہ علیہ وسلم نے ارشاد فرمایا: ”اللہ تعالیٰ پیدا کرنے والا ہے، وہ تنگی (کا شکار) کرنے والا ہے، کشادگی عطا کرنے والا ہے، رزق عطا کرنے والا ہے، مجھے یہ امید ہے جب میں اللہ تعالیٰ کی بارگاہ میں حاضر ہوں گا تو میں نے تم میں سے کسی کے ساتھ بھی (اس کے) اہل خانہ یا مال کے حوالے سے کوئی زیادتی نہیں کی ہو گی۔“ [صحیح ابن حبان/كتاب البيوع/حدیث: 4935]

سیدنا معمر رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”ذخیرہ اندوزی صرف گنہگار کرتا ہے۔“ شیخ کہتے ہیں: معمر بن عبداللہ رضی اللہ عنہما بن نضلہ عدوی ہیں، انہیں صحابی ہونے کا شرف حاصل ہے۔ [صحیح ابن حبان/كتاب البيوع/حدیث: 4936]

سیدنا جابر رضی اللہ عنہ بیان کرتے ہیں: فتح مکہ کے دن میں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”بیشک اللہ اور اس کے رسول نے خنزیر کی خرید و فروخت، مردار کی خرید و فروخت اور بتوں کی خرید و فروخت کو حرام قرار دے دیا ہے۔“ ایک صاحب نے عرض کی: یا رسول اللہ صلی اللہ علیہ وسلم ! مردار کی چربی کے بارے میں آپ کی کیا رائے ہے؟ چونکہ ہم اس کی چربی کو کھالوں پر لگانے کے لیے اور کشتیوں پر لگانے کے لیے استعمال کرتے ہیں اور اس کے ذریعے چراغ بھی جلاتے ہیں، تو نبی اکرم صلی اللہ علیہ وسلم نے ارشاد فرمایا: ” «قَاتَلَ اللّٰهُ الْيَهُودَ» ”اللہ تعالیٰ یہودیوں کو برباد کرے“، اللہ تعالیٰ نے ان پر چربی کو حرام قرار دیا، تو انہوں نے اسے پگھلا کر پھر اسے فروخت کر دیا اور اس کی قیمتیں کھانے لگے۔“ [صحیح ابن حبان/كتاب البيوع/حدیث: 4937]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے آسمان کی طرف دیکھا اور پھر ارشاد فرمایا: «قَاتَلَ اللّٰهُ الْيَهُودَ» ”اللہ تعالیٰ یہودیوں کو برباد کرے، ان پر چربی کو حرام قرار دیا گیا، تو انہوں نے اسے فروخت کر دیا اور اس کی قیمت کھانے لگے۔ بیشک اللہ تعالیٰ کسی چیز کو حرام قرار دے دے تو اس کی قیمت کو بھی حرام قرار دے دیتا ہے۔“ [صحیح ابن حبان/كتاب البيوع/حدیث: 4938]

سیدنا عون بن ابوجحیفہ رحمہ اللہ اپنے والد (سیدنا ابوجحیفہ رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم نے ”خون کی قیمت اور کتے کی قیمت سے منع فرمایا ہے۔“ [صحیح ابن حبان/كتاب البيوع/حدیث: 4939]

ابوزبیر بیان کرتے ہیں کہ میں نے سیدنا جابر رضی اللہ عنہ سے کتے اور بلی کی قیمت (کھانے کے بارے میں) دریافت کیا تو انہوں نے فرمایا: ”اللہ کے رسول صلی اللہ علیہ وسلم نے اس سے منع فرمایا ہے۔“ [صحیح ابن حبان/كتاب البيوع/حدیث: 4940]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بیشک فاحشہ عورت کی کمائی، کتے کی قیمت، بلی کی قیمت اور پچھنے لگانے والے کی کمائی حرام ہے۔“ [صحیح ابن حبان/كتاب البيوع/حدیث: 4941]

ابن وعلہ بیان کرتے ہیں کہ انہوں نے سیدنا عبداللہ بن عباس رضی اللہ عنہما سے اس چیز کے بارے میں دریافت کیا جو انگور میں سے نچوڑا جاتا ہے، تو سیدنا عبداللہ بن عباس رضی اللہ عنہما نے بتایا کہ ایک شخص نے نبی اکرم صلی اللہ علیہ وسلم کو شراب کا مشکیزہ تحفے کے طور پر پیش کیا، تو نبی اکرم صلی اللہ علیہ وسلم نے اس سے فرمایا: ”کیا تم یہ بات نہیں جانتے کہ اللہ تعالیٰ نے اسے پینے کو حرام قرار دے دیا ہے؟“ اس شخص نے اپنے پہلو میں موجود ایک شخص سے سرگوشی میں کوئی بات کی۔ نبی اکرم صلی اللہ علیہ وسلم نے دریافت کیا: ”تم نے اس کے ساتھ سرگوشی میں کیا بات کی ہے؟“ اس نے عرض کی: میں نے اسے ہدایت کی ہے کہ یہ اس کو فروخت کر دے۔ نبی اکرم صلی اللہ علیہ وسلم نے اس سے فرمایا: ”بیشک (اللہ تعالیٰ نے) جس چیز کے پینے کو حرام قرار دیا ہے، اس کو فروخت کرنے کو بھی حرام قرار دیا ہے۔“ تو اس شخص نے اس مشکیزے کا منہ کھول دیا یہاں تک کہ اس میں موجود سب کچھ ختم ہو گیا۔ (یعنی نیچے گر گیا) [صحیح ابن حبان/كتاب البيوع/حدیث: 4942]