سالم اپنے والد (سیدنا عبداللہ بن عمر رضی اللہ عنہما) کا یہ بیان نقل کرتے ہیں، ان تک نبی اکرم صلی اللہ علیہ وسلم کا یہ فرمان پہنچا ہے: ”جو شخص پیوندکاری ہو جانے کے بعد کھجور کا درخت فروخت کرتا ہے تو اس کا پھل فروخت کرنے والے کی ملکیت ہو گا، البتہ اگر خریدار نے اس کی شرط عائد کی ہو (تو حکم مختلف ہے) اور جو شخص کوئی غلام فروخت کرے جس کے پاس مال موجود ہو تو اس کا مال فروخت کرنے والے کی ملکیت ہو گا، البتہ اگر خریدار نے شرط عائد کی ہو (تو حکم مختلف ہو گا)۔“ [صحیح ابن حبان/كتاب البيوع/حدیث: 4923]

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص کوئی غلام فروخت کرتا ہے جس کے پاس مال موجود ہو تو اس غلام کا مال اس شخص کو ملے گا اور اگر اس غلام نے کچھ قرض لیا ہو تو اس کی ادائیگی اس شخص پر ہوگی البتہ اگر خریدار نے اس کی شرط عائد کی ہو (تو حکم مختلف ہوگا) اور جو شخص کھجور کے کسی درخت کی پیوندکاری کر دیتا ہے اور پیوندکاری کرنے کے بعد اسے فروخت کرتا ہے تو اس درخت کا پھل اسے ملے گا البتہ اگر خریدار نے شرط عائد کی ہو (تو حکم مختلف ہوگا)۔“ [صحیح ابن حبان/كتاب البيوع/حدیث: 4924]

سیدنا عبداللہ بن عباس رضی اللہ عنہما بیان کرتے ہیں: جب نبی اکرم صلی اللہ علیہ وسلم مدینہ منورہ تشریف لائے تو لوگ بیع سلف کیا کرتے تھے۔ نبی اکرم صلی اللہ علیہ وسلم نے ان سے فرمایا: ”جو شخص بیع سلف کرے وہ اس وقت بیع سلف کرے جب وہ متعین ماپ اور متعین وزن کے بارے میں ہو۔“ (امام ابن حبان رحمہ اللہ فرماتے ہیں:) ابومنہال نامی راوی کا نام عبدالرحمن بن مطعم ہے۔ [صحیح ابن حبان/كتاب البيوع/حدیث: 4925]

محمد بن ابومجالد بیان کرتے ہیں کہ عبداللہ بن شداد اور ابوبردہ رضی اللہ عنہما نے مجھے بھیجا اور ان دونوں نے مجھ سے کہا: تم سیدنا عبداللہ بن ابواوفیٰ رضی اللہ عنہ کے پاس جاؤ اور ان سے کہو کہ عبداللہ بن شداد اور ابوبردہ نے آپ کو سلام بھیجا ہے اور ان دونوں نے یہ دریافت کیا ہے: کیا آپ لوگ گندم، جو اور کشمش میں بیع سلف کر لیا کرتے تھے؟ انہوں نے جواب دیا: جی ہاں، نبی اکرم صلی اللہ علیہ وسلم کے زمانہ اقدس میں ہمیں غلہ حاصل ہوتا تھا، تو ہم گندم، جو، کھجور اور کشمش میں بیع سلف کر لیا کرتے تھے۔ میں نے دریافت کیا: کیا آپ اس شخص کے ساتھ یہ معاملہ کرتے تھے جس کے پاس کھیت ہوتے تھے یا اس کے ساتھ جس کے پاس کھیت نہیں ہوتے تھے؟ تو انہوں نے فرمایا: ہم اس بارے میں تحقیق نہیں کرتے تھے۔ (یعنی دونوں قسم کے لوگوں سے بیع سلف کر لیتے تھے) [صحیح ابن حبان/كتاب البيوع/حدیث: 4926]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا ہے: «الْخَرَاجُ بِالضَّمَانِ» ”خراج، ضمان کے حساب سے ہو گا۔“ [صحیح ابن حبان/كتاب البيوع/حدیث: 4927]

مخلد بن خفاف کہتے ہیں: میرے اور میرے کچھ رشتہ داروں کے درمیان ایک غلام مشترکہ ملکیت تھا (ہم نے اسے فروخت کر دیا)، ایک رشتہ دار وہاں موجود نہیں تھا جب وہ آیا، تو اس نے اس سودے کو برقرار رکھنے سے انکار کر دیا۔ ہم اپنا مقدمہ لے کر ہشام کے پاس گئے تو اس نے یہ فیصلہ دیا کہ وہ غلام واپس آئے گا اور خراج بھی واپس آئے گا۔ خراج کی رقم ایک ہزار (دینار یا درہم) تک پہنچتی تھی، میں عروہ بن زبیر رحمہ اللہ کے پاس آیا۔ میں نے انہیں اس بارے میں بتایا تو انہوں نے بتایا: سیدہ عائشہ رضی اللہ عنہا نے مجھے یہ بات بتائی ہے کہ نبی اکرم صلی اللہ علیہ وسلم نے یہ بات ارشاد فرمائی ہے: «الْخَرَاجُ بِالضَّمَانِ» ”خراج، ضمان کے حساب سے ہو گا۔“ راوی کہتے ہیں: میں ہشام کے پاس آیا، میں نے اسے اس بارے میں بتایا تو اس نے اس غلام کو واپس کر دیا اور خراج واپس نہیں کروایا۔ [صحیح ابن حبان/كتاب البيوع/حدیث: 4928]

سیدنا جابر رضی اللہ عنہ بیان کرتے ہیں: نبی اکرم صلی اللہ علیہ وسلم نے مدبر (غلام) کو فروخت کر دیا تھا۔ [صحیح ابن حبان/كتاب البيوع/حدیث: 4929]

سیدنا جابر بن عبداللہ رضی اللہ عنہما بیان کرتے ہیں کہ انصار سے تعلق رکھنے والے ایک شخص نے اپنے غلام کو آزاد کر دیا، اس کے پاس اس کے علاوہ اور کوئی مال نہیں تھا، اس بات کی اطلاع نبی اکرم صلی اللہ علیہ وسلم کو ملی تو نبی اکرم صلی اللہ علیہ وسلم نے دریافت فرمایا: ”اسے مجھ سے کون خریدے گا؟“ تو سیدنا نعیم بن عبداللہ نحام رضی اللہ عنہ نے آٹھ سو درہم کے عوض میں اسے خرید لیا، نبی اکرم صلی اللہ علیہ وسلم نے یہ رقم ان صاحب کو دے دی، سیدنا جابر رضی اللہ عنہما بیان کرتے ہیں: وہ ایک قبطی غلام تھا جو ایک سال کے اندر ہی فوت ہو گیا۔ [صحیح ابن حبان/كتاب البيوع/حدیث: 4930]

سیدنا جابر رضی اللہ عنہ بیان کرتے ہیں کہ انصار سے تعلق رکھنے والے ایک صاحب جن کا نام ابومذکور تھا، انہوں نے اپنے ایک غلام کو مدبر کر دیا، اس بات کی اطلاع نبی اکرم صلی اللہ علیہ وسلم کو ملی تو نبی اکرم صلی اللہ علیہ وسلم نے دریافت کیا: ”کیا اس کے پاس اس غلام کے علاوہ کوئی اور مال ہے؟“ لوگوں نے جواب دیا: جی نہیں، تو نبی اکرم صلی اللہ علیہ وسلم نے دریافت فرمایا: ”اس غلام کو مجھ سے کون خریدے گا؟“ چنانچہ سیدنا نعیم نحام رضی اللہ عنہ نے اسے آٹھ سو درہم کے عوض میں خرید لیا، پھر نبی اکرم صلی اللہ علیہ وسلم نے ارشاد فرمایا: ”اس رقم کو تم اپنے اوپر خرچ کرو، اگر اضافی ہو تو اپنے رشتہ داروں پر خرچ کرو، اگر اضافی ہو تو ادھر اُدھر (یعنی اللہ کی راہ میں) خرچ کرو۔“ [صحیح ابن حبان/كتاب البيوع/حدیث: 4931]

سیدنا جابر رضی اللہ عنہ بیان کرتے ہیں کہ سیدنا ابومذکور رضی اللہ عنہ نے اپنے غلام کو مدبر کر دیا، وہ خود ضرورت مند تھے، تو نبی اکرم صلی اللہ علیہ وسلم نے اس غلام کو فروخت کر دیا اور ارشاد فرمایا: ”جب کوئی شخص ضرورت مند ہو تو وہ اپنی ذات (پر خرچ کرنے) سے آغاز کرے۔ اگر اس کے پاس اضافی ہو تو اپنے بیوی بچوں پر خرچ کرے اور اگر اضافی ہو تو قریبی رشتہ داروں پر خرچ کرے۔“ [صحیح ابن حبان/كتاب البيوع/حدیث: 4932]