سیدنا جابر بن عبداللہ رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ”اللہ تعالیٰ اس بندے پر رحم کرے جو فروخت کرتے ہوئے نرمی سے کام لیتا ہے، خریدتے ہوئے نرمی سے کام لیتا ہے، تقاضا کرتے ہوئے نرمی سے کام لیتا ہے اور ادائیگی کرتے ہوئے نرمی سے کام لیتا ہے۔“ [صحیح ابن حبان/كتاب البيوع/حدیث: 4903]

سیدنا حکیم بن حزام رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”خرید و فروخت کرنے والے دونوں افراد کو (سودا ختم کرنے کا) اس وقت تک اختیار رہتا ہے جب تک وہ ایک دوسرے سے جدا نہ ہو جائیں، اگر وہ دونوں سچ بولیں اور بیان کریں تو ان کے سودے میں ان کے لیے برکت رکھی جاتی ہے اور اگر وہ دونوں جھوٹ بولیں اور (سودے کی خامی کو) چھپائیں تو ان کے سودے سے برکت کو مٹا دیا جاتا ہے۔“ [صحیح ابن حبان/كتاب البيوع/حدیث: 4904]

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم اناج کے ایک ڈھیر کے پاس سے گزرے، آپ نے اپنی انگلیاں اس میں داخل کیں تو اس میں گیلا پن محسوس ہوا۔ آپ صلی اللہ علیہ وسلم نے فرمایا: ”اے اس اناج والے! یہ کیا ہے؟“ اس نے عرض کی: یا رسول اللہ صلی اللہ علیہ وسلم ! اس پر بارش پڑ گئی تھی۔ نبی اکرم صلی اللہ علیہ وسلم نے فرمایا: ”تم نے اس (گیلے حصے کو) اوپر کیوں نہیں رکھا تاکہ لوگ اسے دیکھ لیتے؟ جو شخص ہمیں دھوکہ دے وہ ہم میں سے نہیں۔“ [صحیح ابن حبان/كتاب البيوع/حدیث: 4905]

سیدنا ابوہریرہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جھوٹی قسم سامان کو فروخت کروا دیتی ہے لیکن کمائی میں برکت کو مٹا دیتی ہے۔“ [صحیح ابن حبان/كتاب البيوع/حدیث: 4906]

سیدنا ابوذر غفاری رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”تین لوگ ایسے ہیں جن کے ساتھ اللہ تعالیٰ قیامت کے دن کلام نہیں کرے گا اور ان کی طرف نظرِ رحمت نہیں کرے گا اور ان کا تزکیہ نہیں کرے گا اور ان لوگوں کو دردناک عذاب ہو گا۔“ میں نے عرض کی: یا رسول اللہ صلی اللہ علیہ وسلم ! وہ کون لوگ ہیں؟ وہ تو ہلاک ہو جائیں گے اور خسارے کا شکار ہو جائیں گے۔ نبی اکرم صلی اللہ علیہ وسلم نے پھر یہ بات دہرائی تو میں نے عرض کی: وہ کون لوگ ہیں؟ نبی اکرم صلی اللہ علیہ وسلم نے فرمایا: ”(تکبر کی وجہ سے اپنے تہبند کو) لٹکانے والا شخص، احسان جتانے والا شخص اور جھوٹی قسم اٹھا کر سامان فروخت کرنے والا شخص۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”لٹکانے والا“ اس سے مراد وہ شخص ہے جو تکبر کے طور پر اپنے تہبند کو لٹکاتا ہے اور نبی اکرم صلی اللہ علیہ وسلم کا یہ فرمان: ”احسان جتانے والا“ اس سے مراد یہ ہے کہ جو شخص فرض زکوٰۃ کی ادائیگی کے وقت احسان جتاتا ہے۔ [صحیح ابن حبان/كتاب البيوع/حدیث: 4907]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”تین لوگ ایسے ہیں جن کے ساتھ اللہ تعالیٰ کلام نہیں کرے گا اور ان کی طرف نظرِ رحمت نہیں کرے گا۔ ایک وہ شخص جو عصر کے بعد کسی مسلمان کے مال پر قسم اٹھا کر اسے ہتھیا لے۔ ایک وہ شخص جو یہ قسم اٹھائے کہ اس نے اس سامان کے اتنے پیسے دیے تھے جو اس سے زیادہ ہوں جو اسے دیے جا رہے ہوں۔ ایک وہ شخص جو اضافی پانی کو لینے سے منع کر دے۔ اللہ تعالیٰ فرمائے گا: آج کے دن میں اپنے فضل کو تم سے روک لیتا ہوں، جس طرح تم نے اس اضافی چیز کو روک لیا تھا، جو تمہارے ہاتھوں کی کمائی نہیں تھی۔“ [صحیح ابن حبان/كتاب البيوع/حدیث: 4908]

سیدنا ابوسعید خدری رضی اللہ عنہ بیان کرتے ہیں کہ ایک دیہاتی ایک بکری لے کر گزرا، میں نے کہا: کیا تم تین درہموں کے عوض یہ مجھے فروخت کر دو گے؟ اس نے کہا: جی نہیں، اللہ کی قسم! (نہیں کروں گا) پھر اس نے وہ بکری مجھے فروخت کر دی۔ میں نے بعد میں اس بات کا تذکرہ نبی اکرم صلی اللہ علیہ وسلم سے کیا تو آپ صلی اللہ علیہ وسلم نے فرمایا: ”اس نے اپنی دنیا کے عوض اپنی آخرت کو فروخت کر دیا۔“ [صحیح ابن حبان/كتاب البيوع/حدیث: 4909]

سیدنا رفاعہ بن رافع انصاری رضی اللہ عنہ بیان کرتے ہیں کہ وہ نبی اکرم صلی اللہ علیہ وسلم کے ہمراہ بقیع کی طرف گئے، لوگ خرید و فروخت کر رہے تھے۔ نبی اکرم صلی اللہ علیہ وسلم نے بلند آواز میں فرمایا: ”اے تاجروں کے گروہ!“ لوگوں نے آپ کی طرف توجہ کی اور آپ صلی اللہ علیہ وسلم کی طرف دیکھنے لگے، نبی اکرم صلی اللہ علیہ وسلم نے ارشاد فرمایا: ”بیشک تاجروں کو قیامت کے دن گنہگار لوگوں کے طور پر زندہ کیا جائے گا، ماسوائے اس شخص کے جو پرہیزگاری اختیار کرے، نیکی کرے اور سچ بولے۔“ [صحیح ابن حبان/كتاب البيوع/حدیث: 4910]

سیدنا جابر رضی اللہ عنہ بیان کرتے ہیں کہ ہم لوگ مکہ سے مدینہ کی طرف آ رہے تھے، ہم نے مدینہ سے کچھ پہلے ایک جگہ پر پڑاؤ کیا تو نبی اکرم صلی اللہ علیہ وسلم نے ارشاد فرمایا: ”اپنا یہ اونٹ مجھے فروخت کر دو۔“ میں نے عرض کی: جی نہیں، یہ ویسے ہی آپ کا ہوا۔ نبی اکرم صلی اللہ علیہ وسلم نے فرمایا: ”جی نہیں، تم اسے مجھے فروخت کرو۔“ میں نے عرض کی: جی نہیں، یا رسول اللہ صلی اللہ علیہ وسلم ! یہ ویسے ہی آپ کا ہوا۔ نبی اکرم صلی اللہ علیہ وسلم نے فرمایا: ”جی نہیں، تم اسے مجھے فروخت کرو۔“ میں نے کہا: میں نے ایک شخص کا سونے کا ایک اوقیہ دینا ہے، تو یہ اس کے عوض میں آپ کا ہوا۔ نبی اکرم صلی اللہ علیہ وسلم نے فرمایا: ”یہ میں نے لے لیا، تم اس پر سوار ہو کر مدینہ تک چلے جاؤ۔“ جب میں مدینہ منورہ آیا تو نبی اکرم صلی اللہ علیہ وسلم نے سیدنا بلال رضی اللہ عنہ سے فرمایا: ”اسے سونے کا ایک اوقیہ دو اور زیادہ ادائیگی کرنا۔“ سیدنا جابر رضی اللہ عنہ بیان کرتے ہیں کہ انہوں نے مجھے سونے کا ایک اوقیہ دیا اور ایک قیراط زیادہ دیا۔ سیدنا جابر رضی اللہ عنہ کہتے ہیں کہ میں نے طے کیا کہ نبی اکرم صلی اللہ علیہ وسلم کی دی ہوئی اضافی ادائیگی کبھی مجھ سے جدا نہیں ہو گی، وہ رقم میرے پاس ایک تھیلی میں محفوظ رہی، پھر واقعہ حرہ کے موقع پر اہل شام نے اسے ہتھیا لیا۔ [صحیح ابن حبان/كتاب البيوع/حدیث: 4911]

سیدنا عبداللہ بن عمر رضی اللہ عنہما روایت کرتے ہیں نبی اکرم صلی اللہ علیہ وسلم نے ارشاد فرمایا: ”خرید و فروخت کرنے والے آدمیوں کو (سودا ختم کرنے کا) اس وقت تک اختیار رہتا ہے جب تک وہ ایک دوسرے سے جدا نہیں ہو جاتے۔“ نافع بیان کرتے ہیں: سیدنا عبداللہ بن عمر رضی اللہ عنہما کا یہ معمول تھا کہ جب انہیں کوئی چیز پسند آ جاتی تو وہ اپنے ساتھی سے جدا ہو جاتے تھے تاکہ سودا ان کے حق میں طے ہو جائے۔ [صحیح ابن حبان/كتاب البيوع/حدیث: 4912]