سیدنا جابر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”ہر زمین اور باغ میں شفعہ ہو سکتا ہے، اسے اس وقت تک فروخت کرنا درست نہیں ہے جب تک آدمی اپنے ساتھی کو اس بارے میں پیشکش نہ کر دے، اگر وہ چاہے تو اسے حاصل کر لے اور اگر چاہے تو اسے ترک کر دے۔“ [صحیح ابن حبان/كتاب الشفعة/حدیث: 5178]

سیدنا جابر بن عبداللہ رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جس شخص کا کسی زمین یا کھجور کے باغ میں کوئی حصہ دار ہو تو اسے اپنے حصے کو فروخت کرنے کا اس وقت تک اختیار نہیں ہو گا جب تک وہ اپنے شراکت دار کو اطلاع نہ دے دے، اگر وہ (شراکت دار) راضی ہو تو اسے حاصل کر لے اور اگر نہ چاہے تو چھوڑ دے۔“ [صحیح ابن حبان/كتاب الشفعة/حدیث: 5179]

سیدنا ابورافع رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”پڑوسی اپنے پڑوس کے بارے میں زیادہ حق دار ہوتا ہے۔“ [صحیح ابن حبان/كتاب الشفعة/حدیث: 5180]

عمرو بن شرید بیان کرتے ہیں: میں سیدنا سعد بن ابی وقاص اور سیدنا مسور بن مخرمہ رضی اللہ عنہما کے ہمراہ موجود تھا۔ اسی دوران نبی اکرم صلی اللہ علیہ وسلم کے غلام سیدنا ابورافع رضی اللہ عنہ تشریف لے آئے۔ انہوں نے سیدنا سعد بن مالک رضی اللہ عنہ سے کہا: آپ مجھ سے میرے وہ دو گھر خرید لیں جو آپ کے محلے میں ہیں، تو سیدنا سعد بن ابی وقاص رضی اللہ عنہ نے کہا: جی نہیں، میں اس شرط پر خریدوں گا کہ ان کی قیمت چار ہزار (درہم) ہو گی اور وہ بھی قسطوں میں ادا کی جائے گی (یہاں ایک لفظ کے بارے میں راوی کو شک ہے)، تو سیدنا ابورافع رضی اللہ عنہ نے فرمایا: اللہ کی قسم! اگر میں نے نبی اکرم صلی اللہ علیہ وسلم کو یہ بات ارشاد فرماتے ہوئے نہ سنا ہوتا: ”پڑوسی اپنے پڑوس کا زیادہ حق دار ہوتا ہے“ تو میں وہ گھر آپ کو فروخت نہ کرتا کیونکہ مجھے اس کے پانچ سو دینار مل رہے تھے۔ [صحیح ابن حبان/كتاب الشفعة/حدیث: 5181]

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”گھر کا پڑوسی گھر کا زیادہ حق دار ہوتا ہے۔“ [صحیح ابن حبان/كتاب الشفعة/حدیث: 5182]

عمرو بن شرید بیان کرتے ہیں کہ میں سیدنا سعد بن ابی وقاص رضی اللہ عنہ کے پاس کھڑا ہوا تھا، اسی دوران سیدنا مسور بن مخرمہ رضی اللہ عنہ تشریف لے آئے اور انہوں نے اپنا ہاتھ میرے کندھے پر رکھا، اسی دوران نبی اکرم صلی اللہ علیہ وسلم کے غلام سیدنا ابو رافع رضی اللہ عنہ تشریف لے آئے اور انہوں نے فرمایا: اے سیدنا سعد رضی اللہ عنہ! آپ مجھ سے اپنے محلے میں موجود میرے گھر خرید لیجیے، سیدنا سعد رضی اللہ عنہ نے کہا: جی نہیں، اللہ کی قسم! میں ان دونوں گھروں کو نہیں خریدوں گا، سیدنا مسور رضی اللہ عنہ نے کہا: اللہ کی قسم! آپ ان دونوں کو ضرور خریدیں گے، سیدنا سعد رضی اللہ عنہ نے کہا: اللہ کی قسم! میں چار ہزار (درہم) سے زیادہ ادائیگی نہیں کروں گا اور وہ بھی قسطوں میں ہوگی، تو سیدنا ابو رافع رضی اللہ عنہ نے کہا: اللہ کی قسم! مجھے اس کے پانچ سو دینار مل رہے ہیں، اگر میں نے نبی اکرم صلی اللہ علیہ وسلم کو یہ ارشاد فرماتے ہوئے نہ سنا ہوتا: ” «الْجَارُ أَحَقُّ بِسَقَبِهِ» ”آدمی اپنے پڑوس کا زیادہ حق دار ہوتا ہے“”تو میں چار ہزار درہم کے عوض میں یہ دونوں گھر آپ کو نہ دیتا جبکہ مجھے ان کے پانچ سو دینار دیے جا رہے ہیں۔ [صحیح ابن حبان/كتاب الشفعة/حدیث: 5183]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”شفعہ کا حق ہر اس زمین میں دیا ہے جو تقسیم نہ ہوئی ہو، لیکن جب حدود واقع ہو جائیں اور راستے مختلف ہو جائیں تو پھر شفعہ نہیں رہے گا۔“ [صحیح ابن حبان/كتاب الشفعة/حدیث: 5184]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”شفعہ اس چیز میں ہوتا ہے جو تقسیم نہ ہوئی ہو، جب حدود واقع ہو جائیں اور راستے مختلف ہو جائیں تو شفعہ نہیں رہے گا۔“ (امام ابن حبان رحمہ اللہ فرماتے ہیں:) امام مالک کے حوالے سے اس روایت کو چار حضرات نے مرفوع حدیث کے طور پر نقل کیا ہے: ماجشون، ابو عاصم، یحییٰ بن ابو قتیلہ اور الشہب بن عبد العزیز۔ جب کہ امام مالک کے حوالے سے ان کے دیگر تمام شاگردوں نے اس روایت کو مرسل حدیث کے طور پر نقل کیا ہے، امام مالک کی یہ عادت تھی کہ وہ بعض اوقات روایت کو مرفوع حدیث کے طور پر نقل کر دیتے تھے اور بعض اوقات موقوف روایت کے طور پر نقل کر دیتے تھے اور کبھی مرسل کے طور پر نقل کر دیتے تھے اور کبھی مسند کے طور پر نقل کر دیتے تھے۔ یہ ان کی مرضی کے مطابق ہوتا تھا، تو جس روایت کو انہوں نے مرفوع حدیث کے طور پر، مسند کے طور پر نقل کیا ہو اور ان سے نقل کرنے والا راوی ثقہ اور حافظ ہو اور متقن ہو تو اس کی وہی صورت حال ہو گی جو ہم کتاب کے آغاز میں بیان کر چکے ہیں۔ [صحیح ابن حبان/كتاب الشفعة/حدیث: 5185]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے شفعہ کے بارے میں یہ فیصلہ دیا ہے: ”یہ ہر اس چیز میں ہوتا ہے جو تقسیم نہ ہوئی ہو، لیکن جب حدود واقع ہو جائیں اور راستے مختلف ہو جائیں، تو پھر شفعہ نہیں رہے گا۔“ [صحیح ابن حبان/كتاب الشفعة/حدیث: 5186]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے شفعہ کے بارے میں یہ فیصلہ دیا ہے: ”یہ ہر اس زمین میں ہو سکتا ہے جو تقسیم نہ ہوئی ہو، لیکن جب حدود واقع ہو جائیں اور راستے مختلف ہو جائیں، تو پھر شفعہ نہیں رہے گا۔“ [صحیح ابن حبان/كتاب الشفعة/حدیث: 5187]