عبداللہ بن سائب رحمہ اللہ بیان کرتے ہیں: میں نے عبداللہ بن معقل رحمہ اللہ سے مزارعت کے بارے میں دریافت کیا، تو انہوں نے بتایا سیدنا ثابت بن ضحاک رضی اللہ عنہ نے مجھے یہ بات بتائی ہے نبی اکرم صلی اللہ علیہ وسلم نے ”مزارعت سے منع فرمایا ہے۔“ [صحیح ابن حبان/كتاب المزارعة/حدیث: 5188]

سیدنا جابر بن عبداللہ رضی اللہ عنہما بیان کرتے ہیں کہ پہلے ہم میں سے کچھ لوگوں کے پاس اضافی زمینیں ہوتی تھیں، وہ ایک تہائی یا ایک چوتھائی یا نصف پیداوار کے عوض میں ان زمینوں کو کرائے پر دے دیتے تھے، تو نبی اکرم صلی اللہ علیہ وسلم نے ارشاد فرمایا: ”جس شخص کے پاس اضافی زمین موجود ہو وہ اس میں خود کھیتی باڑی کرے یا اپنے کسی بھائی کو کھیتی باڑی کے لیے دے دے، اگر وہ نہیں مانتا تو وہ زمین اپنے پاس رکھے۔“ (لیکن کرائے پر نہ دے) (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”یا وہ اپنے بھائی کو کھیتی باڑی کروا دے“ اس کے ذریعے آپ صلی اللہ علیہ وسلم کی مراد یہ ہے کہ وہ اپنے بھائی کو بلا معاوضہ طور پر (عارضی استعمال کے لیے) دے دے، اگر اس کے ذریعے مزارعت ہی مراد ہوتی تو نبی اکرم صلی اللہ علیہ وسلم کا یہ فرمان: ”اسے چاہیے کہ وہ اس میں زراعت کرے“ اس کا کوئی مطلب نہ ہوتا کیوں کہ وہ لوگ پہلے ہی ایک تہائی یا ایک چوتھائی یا نصف پیداوار کے عوض میں مزارعت کیا کرتے تھے جیسا کہ روایت میں یہ بات مذکور ہے۔ [صحیح ابن حبان/كتاب المزارعة/حدیث: 5189]

سیدنا جابر بن عبداللہ رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جس شخص کے پاس زمین ہو وہ اس میں کھیتی باڑی کرے، اگر وہ ایسا نہیں کر سکتا تو وہ اپنے بھائی کو (بلا معاوضہ طور پر عارضی استعمال کے لیے) دے دے۔“ [صحیح ابن حبان/كتاب المزارعة/حدیث: 5190]

سیدنا ظہیر بن رافع رضی اللہ عنہ بیان کرتے ہیں: نبی اکرم صلی اللہ علیہ وسلم نے ہمیں ایک ایسی چیز سے منع کر دیا جو ہمیں موافق تھی، تو میں نے سوچا نبی اکرم صلی اللہ علیہ وسلم نے جو بات ارشاد فرمائی ہے وہ حق ہے، انہوں نے بتایا: نبی اکرم صلی اللہ علیہ وسلم نے یہ بات ارشاد فرمائی ہے: ”تم لوگ اپنے کھیت کے بارے میں کیا طریقہ کار اختیار کرتے ہو؟“ ہم نے عرض کی: ہم ایک تہائی یا ایک چوتھائی پیداوار یا گندم یا جو کے مخصوص وسق کے عوض میں اسے کرائے پر دے دیتے ہیں، نبی اکرم صلی اللہ علیہ وسلم نے فرمایا: ”تم ایسا نہ کرو، تم خود اس میں کھیتی باڑی کرو یا دوسرے کو کھیتی باڑی کرنے کے لیے دے دو۔“ (امام ابن حبان رحمہ اللہ فرماتے ہیں:) ابونجاشی نامی راوی کا نام عطا بن صہیب ہے اور یہ سیدنا رافع بن خدیج رضی اللہ عنہ کا غلام ہے۔ [صحیح ابن حبان/كتاب المزارعة/حدیث: 5191]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ” «الْمُحَاقَلَةِ» ”محاقلہ“، «الْمُزَابَنَةِ» ”مزابنہ“ اور «الْمُخَابَرَةِ» ”مخابرہ“ سے منع فرمایا ہے، اور اس چیز سے منع فرمایا ہے کہ کھجور کے پھل کو فروخت کیا جائے جب تک وہ «تُشْقِحَ» ”شقح“ نہیں ہو جاتا“، اور «شقح» سے مراد یہ ہے کہ وہ سرخ یا زرد ہو جائے یا کھانے کے قابل ہو جائے۔ زید نامی راوی کہتے ہیں: میں نے عطاء سے کہا: آپ نے سیدنا جابر بن عبداللہ رضی اللہ عنہما کی زبانی خود یہ بات سنی ہے کہ انہوں نے نبی اکرم صلی اللہ علیہ وسلم کے حوالے سے یہ حدیث ذکر کی ہو؟ انہوں نے جواب دیا: جی ہاں۔ (امام ابن حبان رحمہ اللہ فرماتے ہیں:) ابوولید نامی راوی کا نام سعید بن میناء مکی ہے۔ [صحیح ابن حبان/كتاب المزارعة/حدیث: 5192]

سیدنا جابر بن عبداللہ رضی اللہ عنہما بیان کرتے ہیں: نبی اکرم صلی اللہ علیہ وسلم نے ”زمین کو کرائے پر دینے سے منع کیا ہے۔“ سیدنا عبداللہ بن عمر رضی اللہ عنہما بیان کرتے ہیں: پہلے ہم زمین کرائے پر دیا کرتے تھے، پھر جب ہم نے سیدنا رافع بن خدیج رضی اللہ عنہ کے حوالے سے نبی اکرم صلی اللہ علیہ وسلم کی یہ حدیث سنی تو ہم نے اسے ترک کر دیا۔ [صحیح ابن حبان/كتاب المزارعة/حدیث: 5193]

نافع بیان کرتے ہیں کہ ایک مرتبہ سیدنا عبداللہ بن عمر رضی اللہ عنہما تشریف لے گئے، ان کے ہمراہ ہم بھی روانہ ہو گئے یہاں تک کہ ہم سیدنا رافع بن خدیج رضی اللہ عنہ کے پاس آئے، تو سیدنا عبداللہ بن عمر رضی اللہ عنہما نے ان سے کہا: مجھے یہ بات پتا چلی ہے کہ آپ نبی اکرم صلی اللہ علیہ وسلم کے حوالے سے یہ بات نقل کرتے ہیں کہ ”نبی اکرم صلی اللہ علیہ وسلم نے کھیت کو کرائے پر دینے سے منع کیا ہے۔“ سیدنا رافع رضی اللہ عنہ نے جواب دیا: جی ہاں۔ اس کے بعد سیدنا عبداللہ بن عمر رضی اللہ عنہما سے جب بھی اس بارے میں دریافت کیا جاتا تو وہ یہ کہتے: سیدنا رافع بن خدیج رضی اللہ عنہ نے ہمیں یہ حدیث بیان کی ہے کہ ”نبی اکرم صلی اللہ علیہ وسلم نے کھیت کو کرائے پر دینے سے منع کیا ہے۔“ [صحیح ابن حبان/كتاب المزارعة/حدیث: 5194]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے مزارعت کو حرام قرار نہیں دیا بلکہ آپ صلی اللہ علیہ وسلم نے لوگوں کو یہ حکم دیا ہے: ”وہ ایک دوسرے کے ساتھ اچھائی کریں۔“ [صحیح ابن حبان/كتاب المزارعة/حدیث: 5195]

سیدنا رافع بن خدیج رضی اللہ عنہ بیان کرتے ہیں: پہلے ہم زمین کرائے پر دیا کرتے تھے تو زمین کا مالک کھیت کے کسی مخصوص حصے کو اور پانی کی آمد کے آس پاس کی جگہ کو مستثنیٰ کر لیا کرتا تھا تو بعض اوقات ایک حصے کی پیداوار خراب ہو جاتی تھی اور ایک حصے کی ٹھیک رہتی تھی، تو نبی اکرم صلی اللہ علیہ وسلم نے اس سے منع کر دیا۔ سیدنا رافع رضی اللہ عنہ کہتے ہیں: البتہ اگر کسی متعین چیز کے عوض میں (زمین کو ٹھیکے پر دیا جائے) تو اس میں کوئی حرج نہیں ہے۔ [صحیح ابن حبان/كتاب المزارعة/حدیث: 5196]

سیدنا رافع بن خدیج رضی اللہ عنہما بیان کرتے ہیں: پہلے زمین پیداوار کے عوض میں اور کچھ اناج کے عوض میں بھی جس کا استثنیٰ کر لیا گیا ہو کرائے پر دی جاتی تھی، تو نبی اکرم صلی اللہ علیہ وسلم نے لوگوں کو زمین کو کرائے پر دینے سے منع کر دیا۔ سیدنا رافع رضی اللہ عنہما کہتے ہیں: جہاں تک سونے یا چاندی کے عوض میں (زمین کو کرائے پر دینے کا تعلق ہے) تو اس میں کوئی حرج نہیں ہے۔ [صحیح ابن حبان/كتاب المزارعة/حدیث: 5197]