سیدنا عبداللہ بن عباس رضی اللہ عنہما بیان کرتے ہیں کہ دن چڑھنے کے بعد سیدنا ابوبکر رضی اللہ عنہ مسجد تشریف لائے، سیدنا عمر رضی اللہ عنہ نے ان کی آواز سنی تو بولے: ”اے ابوبکر! آپ اس وقت تو نہیں آتے ہیں۔“ سیدنا ابوبکر رضی اللہ عنہ نے بتایا: ”میں شدید بھوک کی وجہ سے اس وقت آیا ہوں“، تو سیدنا عمر رضی اللہ عنہ نے کہا: ”اللہ کی قسم! میں بھی صرف اسی وجہ سے آیا ہوں“، ابھی یہ دونوں حضرات اس حالت میں تھے کہ نبی اکرم صلی اللہ علیہ وسلم ان دونوں کے پاس تشریف لے آئے۔ آپ صلی اللہ علیہ وسلم نے دریافت فرمایا: ”تم دونوں اس وقت کیوں آئے ہو؟“ ان دونوں نے عرض کی: ”اللہ کی قسم! ہم شدید ترین بھوک کی وجہ سے اس وقت باہر نکلے ہیں۔“ نبی اکرم صلی اللہ علیہ وسلم نے فرمایا: ”اس ذات کی قسم جس کے دستِ قدرت میں میری جان ہے! میں بھی صرف اسی وجہ سے باہر آیا ہوں، تم دونوں اٹھو۔“ پھر یہ دونوں حضرات سیدنا ابوایوب انصاری رضی اللہ عنہ کے گھر تشریف لے گئے۔ سیدنا ابوایوب انصاری رضی اللہ عنہ نبی اکرم صلی اللہ علیہ وسلم کے لئے کھانا اور دودھ وغیرہ سنبھال کر رکھتے تھے، اس دن تاخیر ہو گئی تھی وہ اس وقت نہیں آئے تھے۔ انہوں نے اپنے گھر والوں کو کھانا کھلایا اور خود کھجور کے باغ میں چلے گئے تاکہ وہاں کام کرتے رہیں۔ جب یہ حضرات سیدنا ابوایوب انصاری رضی اللہ عنہ کے گھر پہنچے تو سیدنا ابوایوب انصاری رضی اللہ عنہ کی اہلیہ باہر آئیں، انہوں نے عرض کی: ”اللہ کے نبی صلی اللہ علیہ وسلم اور ان کے ساتھیوں کو خوش آمدید!“ نبی کریم صلی اللہ علیہ وسلم نے اس خاتون سے دریافت کیا: ”ابوایوب کہاں ہے؟“ سیدنا ابوایوب رضی اللہ عنہ نے آپ صلی اللہ علیہ وسلم کی آواز سن لی، وہ اس وقت اپنے باغ میں کام کر رہے تھے، وہ جلدی سے چلتے ہوئے آئے اور عرض کی: ”اللہ کے نبی صلی اللہ علیہ وسلم اور ان کے ساتھیوں کو خوش آمدید! اے اللہ کے نبی صلی اللہ علیہ وسلم ! آپ عام طور پر اس وقت تشریف نہیں لاتی ہیں۔“ نبی اکرم صلی اللہ علیہ وسلم نے ان سے فرمایا: ”تم نے ٹھیک کہا ہے۔“ راوی بیان کرتے ہیں: پھر سیدنا ابوایوب انصاری رضی اللہ عنہ گئے اور کھجور کے باغ میں سے ہر قسم کی کھجوریں؛ خشک، تازہ اور تر کھجوریں لے کر آئے۔ نبی اکرم صلی اللہ علیہ وسلم نے فرمایا: ”میں یہ نہیں چاہتا تھا، تم نے ہمارے لئے صرف خشک کھجوریں لانی تھیں۔“ انہوں نے عرض کی: ”اے اللہ کے نبی صلی اللہ علیہ وسلم ! میں یہ چاہتا تھا کہ آپ خشک اور تازہ ہر طرح کی کھجوریں کھائیں، میں اس کے ہمراہ آپ کے لئے جانور بھی ذبح کرتا ہوں۔“ نبی اکرم صلی اللہ علیہ وسلم نے ارشاد فرمایا: ”اگر تم نے ذبح کرنا ہے تو دودھ دینے والا جانور ذبح نہ کرنا۔“ پھر انہوں نے ایک بکری یا بھیڑ کا بچہ ذبح کیا اور اپنی بیوی سے کہا: ”تم روٹی پکاؤ اور ہمارے لئے آٹا گوندھ لو، تمہیں اچھی روٹی پکانی آتی ہے۔“ پھر انہوں نے بھیڑ کا بچہ لے کر اس کو پکایا اور اس کا نصف حصہ بھون لیا، جب کھانا تیار ہوا تو وہ نبی اکرم صلی اللہ علیہ وسلم اور آپ کے ساتھیوں کے سامنے رکھا گیا، تو نبی اکرم صلی اللہ علیہ وسلم نے کچھ گوشت لے کر اس کے ساتھ روٹی رکھی اور فرمایا: ”اے ابوایوب! یہ فاطمہ تک پہنچا دو کیونکہ اس نے بھی کئی دن سے کھانا نہیں کھایا۔“ سیدنا ابوایوب انصاری رضی اللہ عنہ وہ کھانا سیدہ فاطمہ رضی اللہ عنہا تک پہنچانے چلے گئے، جب ان حضرات نے کھانا کھا لیا اور سیر ہو گئے، تو نبی اکرم صلی اللہ علیہ وسلم نے ارشاد فرمایا: ”روٹی اور گوشت، خشک، تازہ اور تر کھجوریں“، پھر آپ صلی اللہ علیہ وسلم کی آنکھوں سے آنسو جاری ہو گئے۔ آپ صلی اللہ علیہ وسلم نے فرمایا: ”اس ذات کی قسم جس کے دستِ قدرت میں میری جان ہے! یہ وہ نعمتیں ہیں جن کے بارے میں تم سے دریافت کیا جائے گا۔“ ارشاد باری تعالیٰ ہے: ﴿ثُمَّ لَتُسْأَلُنَّ يَوْمَئِذٍ عَنِ النَّعِيمِ﴾ [سورة التکاثر: 8] ”پھر تم سے ضرور نعمتوں کے بارے میں دریافت کیا جائے گا۔“ نبی اکرم صلی اللہ علیہ وسلم نے فرمایا: ”تو یہ وہ نعمتیں ہیں جن کے بارے میں قیامت کے دن تم سے حساب لیا جائے گا۔“ یہ بات آپ صلی اللہ علیہ وسلم کے ساتھیوں کو گراں گزری تو آپ صلی اللہ علیہ وسلم نے ارشاد فرمایا: ”جب تمہیں اس طرح کی نعمتیں نصیب ہوں تو تم اپنے ہاتھ آگے بڑھاؤ اور «بِسْمِ اللّٰہِ» ”اللہ کے نام کے ساتھ“ پڑھ لو اور جب تم سیر ہو جاؤ تو یہ پڑھو: «اَلْحَمْدُ لِلّٰہِ الَّذِیْ ھُوَ اَشْبَعَنَا وَاَنْعَمَ عَلَیْنَا فَاَفْضَلَ» ”ہر طرح کی حمد اللہ تعالیٰ کے لئے مخصوص ہے جس نے ہمیں سیر کیا اور اس نے ہم پر نعمتیں کیں اور فضل کیا“، تو یہ ان کے لئے کفایت کر جائے گا۔“ جب یہ حضرات اٹھنے لگے تو نبی اکرم صلی اللہ علیہ وسلم نے سیدنا ابوایوب رضی اللہ عنہ سے فرمایا: ”تم کل ہمارے ہاں آنا۔“ نبی اکرم صلی اللہ علیہ وسلم کے ساتھ جب بھی کوئی اچھائی کی جاتی تھی، تو آپ صلی اللہ علیہ وسلم کو یہ بات پسند تھی کہ آپ صلی اللہ علیہ وسلم اس کا بدلہ دیں۔ راوی بیان کرتے ہیں: سیدنا ابوایوب انصاری رضی اللہ عنہ نے یہ بات نہیں سنی تو سیدنا عمر رضی اللہ عنہ نے فرمایا: ”نبی اکرم صلی اللہ علیہ وسلم نے آپ کو یہ ہدایت کی ہے، آپ کل ان کی خدمت میں حاضر ہوں۔“ اگلے دن سیدنا ابوایوب انصاری رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے تو نبی اکرم صلی اللہ علیہ وسلم نے اپنی کنیز انہیں عطا کی، آپ صلی اللہ علیہ وسلم نے ارشاد فرمایا: ”اے ابوایوب! اس کے بارے میں بھلائی کی تلقین کو قبول کرو کیونکہ یہ جب تک ہمارے پاس رہی، ہم نے اس میں صرف بھلائی دیکھی ہے۔“ جب سیدنا ابوایوب انصاری رضی اللہ عنہ اس کنیز کو نبی اکرم صلی اللہ علیہ وسلم کے پاس سے لے آئے تو انہوں نے کہا: نبی اکرم صلی اللہ علیہ وسلم نے اس کے بارے میں جو بھلائی کی تلقین کی ہے، اس کے حوالے سے مجھے اس سے بہتر کوئی چیز نہیں ملتی کہ میں اسے آزاد کر دوں، تو سیدنا ابوایوب انصاری رضی اللہ عنہ نے اس کنیز کو آزاد کر دیا۔ [صحیح ابن حبان/كتاب الأطعمة/حدیث: 5216]

سیدنا ابوامامہ رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو سنا، آپ صلی اللہ علیہ وسلم نے کھانے سے فارغ ہو کر یہ دعا پڑھی: «الْحَمْدُ لِلَّهِ حَمْدًا كَثِيرًا طَيِّبًا مُبَارَكًا فِيهِ، غَيْرَ مَكْفِيٍّ وَلَا مُوَدَّعٍ وَلَا مُسْتَغْنًى عَنْهُ رَبَّنَا» ”ہر طرح کی حمد اللہ تعالیٰ کے لیے مخصوص ہے جو بہت زیادہ، پاکیزہ اور بابرکت ہو، وہ ایسی نہ ہو کہ کفایت نہ کرے اور نہ ہی اسے الوداع کیا گیا ہو اور نہ ہی اس سے بے نیازی اختیار کی گئی ہے، اے ہمارے رب!“ [صحیح ابن حبان/كتاب الأطعمة/حدیث: 5217]

خالد بن معدان بیان کرتے ہیں کہ ہم لوگ عبدالاعلیٰ کے گھر کھانے پر مدعو تھے، ہمارے ساتھ سیدنا ابوامامہ رضی اللہ عنہ بھی تھے، کھانے سے فارغ ہونے پر سیدنا ابوامامہ رضی اللہ عنہ نے فرمایا: ”مجھے یہ بات پسند نہیں ہے کہ میں خطبہ دینا شروع کر دوں، لیکن نبی اکرم صلی اللہ علیہ وسلم کھانے سے فارغ ہونے کے بعد یہ دعا پڑھتے تھے: «الْحَمْدُ لِلَّهِ حَمْدًا كَثِيرًا طَيِّبًا مُبَارَكًا فِيهِ، غَيْرَ مَكْفِيٍّ وَلَا مُوَدَّعٍ وَلَا مُسْتَغْنًى عَنْهُ رَبَّنَا» ”ہر طرح کی حمد اللہ تعالیٰ کے لیے مخصوص ہے، ایسی حمد جو زیادہ ہو، پاکیزہ ہو، اس میں برکت موجود ہو، اسے وداع نہ کیا گیا ہو اور اس سے بے نیازی نہ اختیار کی گئی ہو۔“۔“ (امام ابن حبان رحمہ اللہ فرماتے ہیں:) یہ روایت معاویہ بن صالح نے عامر بن جشیب کے حوالے سے اور بحیر بن سعد نے خالد بن معدان کے حوالے سے سنی ہے، تو اس کے دونوں طرق محفوظ ہیں۔ [صحیح ابن حبان/كتاب الأطعمة/حدیث: 5218]

سیدنا ابوہریرہ رضی اللہ عنہ بیان کرتے ہیں کہ ایک انصاری نے نبی اکرم صلی اللہ علیہ وسلم کی دعوت کی، سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کے ساتھ میں بھی چلا گیا، جب نبی اکرم صلی اللہ علیہ وسلم نے کھانا کھا لیا اور اپنے ہاتھ دھو لیے تو آپ صلی اللہ علیہ وسلم نے یہ پڑھا: «الْحَمْدُ لِلَّهِ الَّذِي يُطْعِمُ وَلَا يُطْعَمُ، مَنَّ عَلَيْنَا فَهَدَانَا، وَأَطْعَمَنَا وَسَقَانَا، وَكُلَّ بَلَاءٍ حَسَنٍ أَبْلَانَا، الْحَمْدُ لِلَّهِ الَّذِي أَطْعَمَ مِنَ الطَّعَامِ، وَسَقَى مِنَ الشَّرَابِ، وَكَسَا مِنَ الْعُرْيِ، وَهَدَى مِنَ الضَّلَالَةِ، وَبَصَّرَ مِنَ الْعَمَى، وَفَضَّلَ عَلَى كَثِيرٍ مِمَّنْ خَلَقَ تَفْضِيلًا، الْحَمْدُ لِلَّهِ رَبِّ الْعَالَمِينَ» ”ہر طرح کی حمد اللہ تعالیٰ کے لیے مخصوص ہے جو کھلاتا ہے اور اسے کھلایا نہیں جاتا، اس نے ہم پر احسان کیا اور ہمیں ہدایت نصیب کی، اس نے ہمیں کھانے کے لیے دیا، ہمیں پلایا اور ہمیں اچھی طرح کی صورت حال میں مبتلا کیا۔ ہر طرح کی حمد اللہ تعالیٰ کے لیے مخصوص ہے جس نے کھانے میں سے کھلایا اور مشروب میں سے پلایا اور بے لباس جسم کو پہنایا اور گمراہی سے ہدایت نصیب کی، نابینا کو بصارت عطا کی اور اس نے اپنی مخلوق میں سے بہت سے لوگوں پر ہمیں فضیلت عطا کی، ہر طرح کی حمد اللہ تعالیٰ کے لیے مخصوص ہے، جو تمام جہانوں کا پروردگار ہے۔“ [صحیح ابن حبان/كتاب الأطعمة/حدیث: 5219]

سیدنا ابوایوب انصاری رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں کہ جب آپ صلی اللہ علیہ وسلم کھا کر یا پی کر فارغ ہوتے تھے تو آپ صلی اللہ علیہ وسلم یہ پڑھتے تھے: «الْحَمْدُ لِلّٰهِ الَّذِي أَطْعَمَ وَسَقَى وَسَوَّغَهُ وَجَعَلَ لَهُ مَخْرَجًا» ”ہر طرح کی حمد اللہ تعالیٰ کے لیے مخصوص ہے جس نے کھلایا اور پلایا اور اس نے اسے خوشگوار کیا اور اس نے اس کے لیے نکلنے کا راستہ بنایا۔“ (امام ابن حبان رحمہ اللہ فرماتے ہیں:) ابوعقیل نامی راوی زہری بن معبد ہیں، یہ فلسطین کے سرداروں میں سے ہیں اور ثقہ اور متقن ہیں۔ [صحیح ابن حبان/كتاب الأطعمة/حدیث: 5220]

سیدنا عبداللہ بن عباس رضی اللہ عنہما بیان کرتے ہیں کہ ان کی خالہ نے نبی اکرم صلی اللہ علیہ وسلم کی خدمت میں گھی، پنیر اور گوہ پیش کیے تو نبی اکرم صلی اللہ علیہ وسلم نے گھی اور پنیر کو کھا لیا، لیکن آپ صلی اللہ علیہ وسلم نے گوہ کو نہیں کھایا، آپ صلی اللہ علیہ وسلم نے اسے پسند نہیں کیا۔ سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم کے دسترخوان پر اسے کھایا گیا، اگر یہ حرام ہوتی تو آپ صلی اللہ علیہ وسلم کے دسترخوان پر اسے نہ کھایا جاتا۔ [صحیح ابن حبان/كتاب الأطعمة/حدیث: 5221]

زہدم جرمی بیان کرتے ہیں کہ ہم سیدنا ابوموسیٰ اشعری رضی اللہ عنہ کی خدمت میں حاضر ہوئے، ان کے سامنے مرغی رکھی ہوئی تھی اور وہ اسے کھا رہے تھے۔ ہم نے دریافت کیا: کیا آپ اسے کھا رہے ہیں؟ انہوں نے فرمایا: میں نے نبی اکرم صلی اللہ علیہ وسلم کے دسترخوان پر اسے کھایا ہے۔ [صحیح ابن حبان/كتاب الأطعمة/حدیث: 5222]

سیدنا عبداللہ بن عباس رضی اللہ عنہما بیان کرتے ہیں کہ میری خالہ سیدہ ام حفید بنت حارث رضی اللہ عنہا نے نبی اکرم صلی اللہ علیہ وسلم کی خدمت میں گھی، پنیر اور گوہ پیش کیے۔ نبی اکرم صلی اللہ علیہ وسلم نے انہیں منگوایا تو آپ کے دسترخوان پر انہیں کھایا گیا، لیکن نبی اکرم صلی اللہ علیہ وسلم نے انہیں ناپسند کرتے ہوئے خود نہیں کھایا، اگر یہ حرام ہوتی تو نبی اکرم صلی اللہ علیہ وسلم کے دسترخوان پر نہ کھائی جاتی اور آپ اسے کھانے کا حکم نہ دیتے۔ [صحیح ابن حبان/كتاب الأطعمة/حدیث: 5223]

سیدنا وحشی رضی اللہ عنہ بیان کرتے ہیں کہ لوگوں نے عرض کی: یا رسول اللہ! ہم لوگ کھاتے ہیں اور سیر نہیں ہوتے۔ نبی اکرم صلی اللہ علیہ وسلم نے دریافت کیا: ”تم اکٹھے ہو کر کھانا کھاتے ہو یا الگ الگ طور پر؟“ انہوں نے عرض کی: ہم الگ الگ کھاتے ہیں۔ نبی اکرم صلی اللہ علیہ وسلم نے فرمایا: ”تم مل کر بیٹھ کر کھانا کھایا کرو اور اس پر اللہ کا نام لے لیا کرو، اس میں تمہارے لیے برکت رکھی جائے گی۔“ [صحیح ابن حبان/كتاب الأطعمة/حدیث: 5224]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے اس بات سے منع فرمایا کہ ”کوئی شخص بائیں ہاتھ سے کھائے، یا ایک جوتا پہن کر چلے، یا «اِشْتِمَالُ الصَّمَّاءِ» کے طور پر لباس پہنے، یا ایک کپڑے کو «اِحْتِبَاء» کے طور پر اس طرح لپیٹ لے کہ اس کی شرم گاہ سے پردہ ہٹا رہے۔“ [صحیح ابن حبان/كتاب الأطعمة/حدیث: 5225]