سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”رہن بند نہیں ہوتا، اس کا فائدہ آدمی کو ملے گا اور اس کا ضمان آدمی کے ذمے ہو گا۔“ [صحیح ابن حبان/كتاب الرهن/حدیث: 5934]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”رہن (کے جانور) پر سواری کی جا سکتی ہے جو اس کے خرچ کے عوض میں ہو گی اور جانور کا دودھ پیا جا سکتا ہے جب کہ اسے رہن رکھا گیا ہو اور جو شخص سواری کرتا ہے اور دودھ پیتا ہے اس جانور کا خرچ اس کے ذمے ہو گا۔“ [صحیح ابن حبان/كتاب الرهن/حدیث: 5935]

سیدہ عائشہ صدیقہ رضی اللہ عنہا بیان کرتی ہیں کہ جب نبی اکرم صلی اللہ علیہ وسلم کا وصال ہوا تو آپ صلی اللہ علیہ وسلم کی زرہ ایک یہودی کے پاس جو کے تیس صاع کے عوض میں رہن ہوئی تھی۔ [صحیح ابن حبان/كتاب الرهن/حدیث: 5936]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اپنی زرہ ایک یہودی کے پاس ایک دینار کے عوض میں رہن رکھوائی تھی، اس کے بعد آپ صلی اللہ علیہ وسلم کو اتنی گنجائش نہیں ملی کہ آپ صلی اللہ علیہ وسلم اس ادائیگی کو کر کے اسے چھڑوا لیتے، یہاں تک کہ آپ صلی اللہ علیہ وسلم کا وصال ہو گیا۔ [صحیح ابن حبان/كتاب الرهن/حدیث: 5937]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ایک یہودی سے اناج خریدا تھا کہ اسے ایک سال کے بعد ادائیگی کریں گے اور آپ صلی اللہ علیہ وسلم نے اپنی لوہے کی بنی ہوئی زرہ اس کے پاس رہن رکھوا دی تھی۔ [صحیح ابن حبان/كتاب الرهن/حدیث: 5938]

سیدنا عبداللہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”مسلمان کو برا کہنا فسق ہے اور اسے قتل کرنا کفر ہے۔“ [صحیح ابن حبان/كتاب الرهن/حدیث: 5939]

سیدنا جریر رضی اللہ عنہ بیان کرتے ہیں: حجۃ الوداع کے موقع پر نبی اکرم صلی اللہ علیہ وسلم نے لوگوں کو خاموش کروایا، پھر آپ صلی اللہ علیہ وسلم نے ارشاد فرمایا: ”میرے بعد دوبارہ کافر نہ بن جانا کہ ایک دوسرے کی گردنیں اڑانے لگو۔“ (امام ابن حبان رحمہ اللہ فرماتے ہیں: نبی اکرم صلی اللہ علیہ وسلم کا یہ فرمان: ”میرے بعد دوبارہ کافر نہ بن جانا“، اس کے ذریعے وہ کفر مراد نہیں ہے جس کی وجہ سے آدمی اسلام سے نکل جاتا ہے، بلکہ اس روایت کا مطلب یہ ہے کہ جب کسی چیز کے مختلف حصے ہوں، تو ان میں سے بعض اجزاء پر اس پوری چیز کے نام کا اطلاق کیا جا سکتا ہے، جس طرح اسلام کے مختلف شعبے ہیں، تو ان میں سے کسی ایک شعبے کے مرتکب شخص پر بھی لفظِ اسلام کا اطلاق کیا جا سکتا ہے، یہ لازم نہیں ہے کہ پورے پر ہی اسلام کا اطلاق کیا جائے، اسی طرح کفر کا اطلاق اسلام کے کسی ایک شعبہ کو ترک کرنے والے پر بھی کیا جا سکتا ہے، یہ لازمی نہیں ہے کہ مکمل اسلام کو ترک کرنے والے پر ہی کفر کا اطلاق کیا جائے، تو اسلام اور کفر کے کچھ مقدمات ہیں، اسلام کے اجزاء صرف اسی شخص سے قبول کیے جائیں گے جو ان مقدمات کو بجا لائے گا اور اسلام کے حکم سے وہی شخص خارج ہو گا، جو کفر کے اجزاء میں سے کسی ایک جزء کا مرتکب ہو گا ماسوائے اس شخص کے جو کفر کے مقدمات کو بجا لاتا ہے اور وہ اقرار اور معرفت اور انکار اور نافرمانی ہیں۔) [صحیح ابن حبان/كتاب الرهن/حدیث: 5940]

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ابلیس اس بات سے مایوس ہو گیا ہے کہ نمازی اب اس کی بندگی کریں گے، البتہ وہ تمہارے درمیان اختلافات پیدا کرے گا۔“ [صحیح ابن حبان/كتاب الرهن/حدیث: 5941]

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص ناحق چیز پر اپنی قوم کی مدد کرتا ہے، اس کی مثال ایسے اونٹ کی طرح ہے جو کسی کنویں میں گر جاتا ہے اور پھر اسے اس کی دم سے پکڑ کر باہر نکالا جاتا ہے۔“ [صحیح ابن حبان/كتاب الرهن/حدیث: 5942]

سیدنا جابر رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم کچھ لوگوں کے پاس سے گزرے جنہوں نے ایک دوسرے کے مقابلے میں تلواریں نکالی ہوئی تھیں، تو آپ صلی اللہ علیہ وسلم نے ارشاد فرمایا: ”کیا میں نے تم لوگوں کو اس چیز سے منع نہیں کیا؟ انہیں میان میں ڈال کر اپنے بھائی سے ملو۔“ [صحیح ابن حبان/كتاب الرهن/حدیث: 5943]