سیدنا ابودرداء رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”ہر گناہ (کے بارے میں یہ امید کی جا سکتی ہے) کہ اللہ تعالیٰ اس کی مغفرت کر دے گا، ماسوائے اس شخص کے، جو مشرک ہونے کے عالم میں مر جائے، یا جو شخص کسی مومن کو جان بوجھ کر قتل کرے۔“ [صحیح ابن حبان/كتاب الجنايات/حدیث: 5981]

سیدنا عمرو بن حمق رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”جو شخص کسی دوسرے شخص کو اس کی جان کے حوالے سے امان دے اور پھر اسے قتل کر دے، تو میں قتل کرنے والے شخص سے بری ہوں خواہ مقتول شخص کافر ہو۔“ شیخ ابوحاتم بیان کرتے ہیں: فقتیان، بجیلہ قبیلے کی ایک شاخ ہے اور قتبان (قبیلے کے لوگ) مصر میں رہتے ہیں۔ [صحیح ابن حبان/كتاب الجنايات/حدیث: 5982]

سیدنا عبداللہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جس بھی شخص کو ظلم کے طور پر قتل کیا جائے، تو اس کے خون میں سیدنا آدم علیہ السلام کے بیٹے کا بھی حصہ ہوتا ہے کیونکہ اس نے قتل کے طریقے کا آغاز کیا تھا۔“ [صحیح ابن حبان/كتاب الجنايات/حدیث: 5983]

سیدہ اسماء بنت یزید رضی اللہ عنہا بیان کرتی ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”اپنی اولاد کو پوشیدہ طور پر قتل نہ کرو کیونکہ غیل کا اثر شہسوار تک پہنچتا ہے اور اسے اس کے گھوڑے سے گرا دیتا ہے۔“ [صحیح ابن حبان/كتاب الجنايات/حدیث: 5984]

سیدنا صنابح رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میں حوض (کوثر) پر تمہارا پیش رو ہوں گا اور میں دوسری امتوں کے سامنے تمہاری کثرت پر فخر کروں گا، تو تم لوگ میرے بعد ایک دوسرے کو قتل نہ کرنا (یا آپس میں جھگڑا نہ کرنا)۔“ (امام ابن حبان رحمہ اللہ فرماتے ہیں:) سیدنا صنابح رضی اللہ عنہ صحابہ کرام رضی اللہ عنہم میں سے ہیں اور صنابحی تابعین میں سے ہیں۔ [صحیح ابن حبان/كتاب الجنايات/حدیث: 5985]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص لوہے کے ذریعے (یعنی دھار دار چیز کے ذریعے) خودکشی کر لے گا، تو اس کی وہ دھار دار چیز اس کے ہاتھ میں ہو گی، جسے وہ اپنے پیٹ میں گھونپتا رہے گا اور وہ ہمیشہ جہنم میں گرتا رہے گا، جو شخص زہر کے ذریعے خودکشی کر لے گا اس کا زہر اس کے ہاتھ میں ہو گا، جسے وہ جہنم کی آگ میں ہمیشہ ہمیشہ چاٹتا رہے گا، جو شخص پہاڑ سے جان بوجھ کر خود کو گرائے گا اور خودکشی کر لے گا، وہ جہنم میں ہمیشہ گرتا رہے گا۔“ [صحیح ابن حبان/كتاب الجنايات/حدیث: 5986]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص دنیا میں اپنا گلا گھونٹ کر خودکشی کرے گا وہ جہنم میں بھی اپنا گلا گھونٹتا رہے گا، جو شخص اپنے آپ کو نیزہ مارے گا وہ جہنم میں بھی اپنے آپ کو نیزہ مارتا رہے گا، جو شخص آگ میں کود کر خودکشی کرے گا وہ جہنم میں بھی آگ میں کودتا رہے گا۔“ [صحیح ابن حبان/كتاب الجنايات/حدیث: 5987]

حسن بصری بیان کرتے ہیں: سیدنا جندب بن عبداللہ رضی اللہ عنہ نے اس مسجد میں حدیث بیان کی، ہمیں اس حدیث کا کوئی حصہ بھولا نہیں ہے، انہوں نے ہمیں حدیث بیان کی اور ہمیں یہ اندیشہ نہیں ہے کہ انہوں نے نبی اکرم صلی اللہ علیہ وسلم کے حوالے سے غلط بات بیان کی ہو گی، انہوں نے بتایا کہ نبی اکرم صلی اللہ علیہ وسلم نے ارشاد فرمایا ہے: ”تم سے پہلے کے زمانے میں کسی شخص کو پھوڑا نکل آیا، اس نے (تکلیف کی شدت کی وجہ سے) چھری لی اور اسے کاٹ دیا، اس کا خون نہیں رکا، یہاں تک کہ وہ شخص مر گیا، اللہ تعالیٰ نے فرمایا: میرے بندے نے اپنی ذات کے بارے میں مجھ سے آگے نکلنے کی کوشش کی، تو میں اس کے لیے جنت کو حرام قرار دیتا ہوں۔“ [صحیح ابن حبان/كتاب الجنايات/حدیث: 5988]

حسن بصری رحمہ اللہ بیان کرتے ہیں کہ نبی اکرم صلی اللہ علیہ وسلم نے فرمایا: ”پہلے زمانے میں ایک شخص کو پھوڑا نکل آیا، جب اس کی تکلیف بڑھ گئی تو اس شخص نے اپنے ترکش میں سے ایک تیر لیا اور اسے چیر دیا، اس کا خون نہیں رکا، یہاں تک کہ وہ شخص مر گیا، تو تمہارے پروردگار نے فرمایا: میں اس کے لیے جنت کو حرام قرار دیتا ہوں۔“ اس کے بعد حسن بصری رحمہ اللہ نے اپنا ہاتھ مسجد کی طرف پھیلاتے ہوئے کہا: اللہ کی قسم! یہ حدیث سیدنا جندب بن عبداللہ بجلی رضی اللہ عنہ نے نبی اکرم صلی اللہ علیہ وسلم کے حوالے سے اس مسجد میں بیان کی تھی۔ [صحیح ابن حبان/كتاب الجنايات/حدیث: 5989]

سیدنا جابر بن عبداللہ رضی اللہ عنہما بیان کرتے ہیں: مہاجرین سے تعلق رکھنے والے ایک شخص نے انصار سے تعلق رکھنے والے ایک شخص کو مارا، تو انصاری نے کہا: اے انصار! (میری مدد کے لیے آ جاؤ) مہاجر نے کہا: اے مہاجرین! (میری مدد کے لیے آ جاؤ)۔ راوی بیان کرتے ہیں: نبی اکرم صلی اللہ علیہ وسلم نے یہ آواز سنی تو فرمایا: ”یہ کیا زمانہ جاہلیت کے بلانے کا طریقہ ہے؟“ لوگوں نے عرض کی: یا رسول اللہ صلی اللہ علیہ وسلم ! مہاجرین سے تعلق رکھنے والے ایک شخص نے انصار سے تعلق رکھنے والے ایک شخص کو مارا ہے۔ نبی اکرم صلی اللہ علیہ وسلم نے فرمایا: ”اسے چھوڑ دو، یہ بدبودار چیز ہے۔“ اس پر (منافقین کے سردار) عبداللہ بن ابی نے کہا: ان لوگوں نے ایسا کیا ہے، ﴿لَيُخْرِجَنَّ الْأَعَزُّ مِنْهَا الْأَذَلَّ﴾ [سورة المنافقون: 8] جب ہم مدینہ جائیں گے، تو وہاں سے عزت دار لوگ ذلیل لوگوں کو باہر نکال دیں گے۔ سیدنا عمر رضی اللہ عنہ نے عرض کی: یا رسول اللہ صلی اللہ علیہ وسلم ! مجھے اجازت دیجیے کہ میں اس منافق کی گردن اڑا دوں۔ نبی اکرم صلی اللہ علیہ وسلم نے فرمایا: ”اسے چھوڑ دو! ورنہ لوگ یہ کہیں گے محمد صلی اللہ علیہ وسلم اپنے ساتھیوں کو قتل کروا دیتے ہیں۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا فرمان ”یہ بدبودار چیز ہے“ اس کے ذریعے آپ صلی اللہ علیہ وسلم کی مراد یہ ہے کہ اس طرح کی صورت حال میں قصاص نہیں ہوتا، اسی طرح ان لوگوں کا یہ کہنا ہے: یہ قابلِ مذمت چیز ہے، اس طرح کے دیگر الفاظ (کا یہی مفہوم ہوگا)۔ [صحیح ابن حبان/كتاب الجنايات/حدیث: 5990]