سیدنا ابورزین رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”مومن کا خواب نبوت کا چھیالیسواں حصہ ہے اور خواب اپنی حالت پر برقرار رہتا ہے جب تک اس کی تعبیر بیان نہ کی جائے، جب تعبیر بیان کر دی جائے (تو وہ اس تعبیر کے مطابق) واقع ہو جاتا ہے۔“ (راوی کہتے ہیں:) میرا خیال ہے روایت میں یہ الفاظ بھی ہیں: ”آدمی کو وہ خواب صرف کسی ایسے شخص کو بیان کرنا چاہیے جو اس کا پسندیدہ ہو یا سمجھ دار (صاحب علم) ہو۔“ (امام ابن حبان رحمہ اللہ فرماتے ہیں:) صحیح یہ ہے کہ یہ لفظ «ح» کے ساتھ ہے، جیسا کہ حسین نے یہ بات بیان کی ہے، شعبہ نے لفظ «عدس» نقل کرنے میں وہم کیا اور لوگوں نے اس بارے میں ان کی پیروی کر لی۔ [صحیح ابن حبان/كتاب الرؤيا/حدیث: 6050]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جس نے مجھے خواب میں دیکھا اس نے حق دیکھا (یعنی مجھے ہی دیکھا)۔“ [صحیح ابن حبان/كتاب الرؤيا/حدیث: 6051]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جس نے مجھے خواب میں دیکھا اس نے حق دیکھا (یعنی مجھے ہی خواب میں دیکھا) کیونکہ شیطان میری شکل اختیار نہیں کر سکتا۔“ [صحیح ابن حبان/كتاب الرؤيا/حدیث: 6052]

عون بن ابوجحیفہ اپنے والد (سیدنا ابوجحیفہ رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جس نے مجھے خواب میں دیکھا اس نے گویا مجھے بیداری کے عالم میں دیکھا کیونکہ شیطان میری شکل اختیار نہیں کر سکتا۔“ [صحیح ابن حبان/كتاب الرؤيا/حدیث: 6053]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم کو خواب پسند تھے، بعض اوقات کوئی شخص کبھی خواب دیکھتا، تو اگر اس کی سمجھ نہیں آتی، تو وہ نبی اکرم صلی اللہ علیہ وسلم سے اس بارے میں دریافت کرتا تھا اور جب اس کی اس حوالے سے تعریف کی جاتی، تو اسے اپنا وہ خواب پسند آتا تھا۔ ایک مرتبہ ایک خاتون نبی اکرم صلی اللہ علیہ وسلم کی خدمت میں حاضر ہوئی اس نے عرض کی: یا رسول اللہ صلی اللہ علیہ وسلم ! میں نے خواب میں دیکھا کہ میں آئی پھر مجھے مدینے سے نکال کر جنت میں داخل کر دیا گیا، میں نے آہٹ سنی میں نے اس بات کا جائزہ لیا، تو وہاں فلاں فلاں اور فلاں صاحب موجود تھے، اس نے بارہ آدمیوں کے نام گنوائے۔ نبی اکرم صلی اللہ علیہ وسلم اس سے پہلے ایک مہم روانہ کر چکے تھے، (اس خاتون نے بتایا) پھر ان لوگوں کو لایا گیا ان لوگوں نے ریشمی کپڑے پہنے ہوئے تھے اور ان کی رگوں سے خون بہہ رہا تھا، تو یہ بات کہی گئی: «اذْهَبُوا بِهِمْ إِلَى نَهْرِ بَيْذَخَ» ”ان لوگوں کو نہر بیذخ کی طرف لے جاؤ“ پھر انہیں اس میں ڈبکی دلائی گئی جب وہ لوگ نکلے، تو ان کے چہرے چودھویں رات کے چاند کی مانند تھے، پھر سونے کا بنا ہوا ایک طشت لایا گیا جس میں کھجوریں تھیں، انہوں نے اس میں سے جتنا چاہا کھایا، وہ اس کا رخ جس طرف بھی موڑتے وہاں سے اپنی پسند کے مطابق پھل کھا لیتے، ان کے ساتھ میں نے بھی اسے کھایا۔ (راوی بیان کرتے ہیں) اسی دوران اس مہم سے سیدنا بشیر رضی اللہ عنہ تشریف لے آئے اور انہوں نے بتایا: ہماری صورت حال یوں ہے کہ فلاں فلاں اور فلاں صاحب شہید ہو گئے ہیں۔ سیدنا بشیر رضی اللہ عنہ نے ان بارہ آدمیوں کے نام گنوائے۔ نبی اکرم صلی اللہ علیہ وسلم نے اس خاتون کو بلوایا اور فرمایا: ”تم اپنا خواب بیان کرو۔“ اس خاتون نے اپنا خواب بیان کرنا شروع کیا، اس نے کہا: فلاں صاحب اور فلاں صاحب آئے، تو یہ وہی نام تھے جو ان صاحب نے بیان کیے تھے (جو شہید ہوئے تھے)۔ [صحیح ابن حبان/كتاب الرؤيا/حدیث: 6054]

سیدنا ابورزین عقیلی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”خواب نبوت کا سترواں جزء ہے اور خواب اس وقت تک معلق رہتا ہے، جب تک اسے دیکھنے والا شخص بیان نہیں کرتا، جب وہ بیان کر دے پھر وہ واقع ہو جاتا ہے؛ تم اسے صرف کسی عالم کے سامنے یا کسی خیرخواہ کے سامنے یا محبوب (یعنی پسندیدہ شخص) کے سامنے بیان کرو۔“ [صحیح ابن حبان/كتاب الرؤيا/حدیث: 6055]

سیدنا جابر رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں کہ ایک دیہاتی آپ صلی اللہ علیہ وسلم کی خدمت میں حاضر ہوا، اس نے عرض کی: میں نے خواب میں دیکھا کہ میرا سر کاٹ دیا گیا اور میں اس کے پیچھے جا رہا ہوں، تو نبی اکرم صلی اللہ علیہ وسلم نے اسے ڈانٹ دیا اور ارشاد فرمایا: ”شیطان نے خواب میں تمہارے ساتھ جو کھیل کھیلا ہے تم اسے بیان نہ کرو۔“ [صحیح ابن حبان/كتاب الرؤيا/حدیث: 6056]

سیدنا عبداللہ بن عباس رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص اپنی آنکھوں کو خواب میں وہ چیز دکھائے جو انہوں نے نہیں دیکھی (یعنی جو شخص جھوٹا خواب بیان کرے) اسے قیامت کے دن اس بات کا پابند کیا جائے گا کہ وہ جو کے دو دانوں کے درمیان گرہ لگائے اور جو شخص کسی کی باتیں چھپ کر سنے جبکہ وہ لوگ اس بات کو ناپسند کرتے ہوں، تو قیامت کے دن اس کے کانوں میں سیسہ ڈالا جائے گا۔“ [صحیح ابن حبان/كتاب الرؤيا/حدیث: 6057]

ابوسلمہ بن عبدالرحمن بیان کرتے ہیں: بعض اوقات میں ایسے خواب دیکھتا تھا جو مجھے بیمار کر دیتے تھے، یہاں تک کہ میں نے سیدنا ابوقتادہ رضی اللہ عنہ کو یہ بیان کرتے ہوئے سنا کہ میں ایسے خواب دیکھا کرتا تھا جو مجھے بیمار کر دیتے تھے، یہاں تک کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”اچھا خواب اللہ تعالیٰ کی طرف سے ہوتا ہے، جب کوئی شخص ایسا خواب دیکھے جسے وہ پسند کرے، تو اسے وہ خواب اس شخص کے سامنے بیان کرنا چاہیے جو اس کا پسندیدہ ہو اور جب کوئی شخص ایسا خواب دیکھے جو اسے پسند نہ آئے، تو اسے اس خواب کے شر سے اللہ تعالیٰ کی پناہ مانگنی چاہیے اور اپنی بائیں طرف تین مرتبہ تھوک دینا چاہیے۔“ [صحیح ابن حبان/كتاب الرؤيا/حدیث: 6058]

سیدنا ابوقتادہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”خواب اللہ تعالیٰ کی طرف سے ہوتے ہیں اور برے خواب شیطان کی طرف سے ہوتے ہیں، تو جب کوئی شخص ایسی چیز دیکھے جو اسے پسند نہ آئے، تو جب وہ بیدار ہو، تو اسے اپنی بائیں طرف تین مرتبہ تھوک دینا چاہیے اور اس خواب کے شر سے اللہ کی پناہ مانگنی چاہیے، اگر اللہ نے چاہا، تو وہ خواب اسے کوئی نقصان نہیں پہنچائے گا۔“ ابوسلمہ رحمہ اللہ بیان کرتے ہیں: میں بعض اوقات ایسے خواب دیکھا کرتا تھا جو میرے لیے پہاڑ سے زیادہ وزنی ہوتے تھے، لیکن جب میں نے یہ حدیث سنی، تو میں ان کی کوئی پرواہ نہیں کرتا۔ [صحیح ابن حبان/كتاب الرؤيا/حدیث: 6059]