سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب زمانہ (قیامت کے) قریب آ جائے گا، تو مومن کے بہت کم خواب جھوٹے ہوں گے، اہل ایمان میں سب سے زیادہ سچے خواب اس کے ہوں گے جو بات چیت میں سب سے زیادہ سچا ہو گا، خواب نبوت کا پینتالیسواں حصہ ہیں۔“ سیدنا ابوہریرہ رضی اللہ عنہ فرماتے ہیں: میں خواب میں بیڑی کو پسند کرتا ہوں اور طوق کو ناپسند کرتا ہوں، خواب میں (دیکھنے سے مراد) دین میں ثابت قدمی ہے۔ [صحیح ابن حبان/كتاب الرؤيا/حدیث: 6040]

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”سب سے زیادہ سچے خواب وہ ہوتے ہیں جو سحری کے وقت دیکھے جائیں۔“ [صحیح ابن حبان/كتاب الرؤيا/حدیث: 6041]

سیدنا عوف بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”خواب تین طرح کے ہوتے ہیں؛ ان میں سے کچھ شیطان کی طرف سے پریشان کرنے کے لیے ہوتے ہیں تاکہ وہ انسان کو غمگین کر دیں، ان میں سے کچھ وہ خواب ہوتے ہیں جو آدمی بیداری کے عالم میں سوچتا رہتا ہے تو وہی چیز نیند کے دوران دیکھ لیتا ہے، اور ان میں سے کچھ نبوت کا 46 واں حصہ ہوتے ہیں۔“ راوی کہتے ہیں: میں نے دریافت کیا: کیا آپ نے خود نبی اکرم صلی اللہ علیہ وسلم کی زبانی یہ بات سنی ہے؟ انہوں نے فرمایا: میں نے خود نبی اکرم صلی اللہ علیہ وسلم کی زبانی یہ بات سنی ہے۔ [صحیح ابن حبان/كتاب الرؤيا/حدیث: 6042]

سیدنا انس بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”نیک آدمی کو نظر آنے والے سچے خواب نبوت کا 46 واں حصہ ہے۔“ [صحیح ابن حبان/كتاب الرؤيا/حدیث: 6043]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”خواب نبوت کا 70 واں حصہ ہے۔“ [صحیح ابن حبان/كتاب الرؤيا/حدیث: 6044]

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم کا جس بیماری کے دوران وصال ہوا اس کے دوران آپ صلی اللہ علیہ وسلم نے پردہ ہٹایا، لوگ سیدنا ابوبکر رضی اللہ عنہ کے پیچھے صفیں بنا کر (نماز پڑھ رہے تھے)، نبی اکرم صلی اللہ علیہ وسلم نے ارشاد فرمایا: ”نبوت کے مبشرات میں سے اب صرف سچے خواب باقی رہ گئے ہیں، جنہیں کوئی مومن دیکھتا ہے (راوی کو شک ہے شاید یہ الفاظ ہیں) جو اسے دکھائے جاتے ہیں۔ خبردار! مجھے اس بات سے منع کیا گیا ہے کہ میں رکوع یا سجدے کے عالم میں قرأت کروں، جہاں تک رکوع کا تعلق ہے، تو تم اس میں پروردگار کی عظمت کا اعتراف کرو، جہاں تک سجدے کا تعلق ہے، تم اس میں اہتمام کے ساتھ دعا مانگو، وہ اس لائق ہو گی کہ اسے تمہارے لیے مستجاب کیا جائے۔“ [صحیح ابن حبان/كتاب الرؤيا/حدیث: 6045]

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم نے پردہ ہٹایا، تو آپ صلی اللہ علیہ وسلم نے اپنے سر پر پٹی باندھی ہوئی تھی، یہ اس بیماری کے دوران کی بات ہے جس میں آپ صلی اللہ علیہ وسلم کا وصال ہوا، نبی اکرم صلی اللہ علیہ وسلم نے فرمایا: ”اے اللہ! کیا میں نے تبلیغ کر دی ہے؟“ یہ بات آپ صلی اللہ علیہ وسلم نے تین مرتبہ ارشاد فرمائی (پھر فرمایا) ”نبوت کے مبشرات میں سے اب صرف خواب باقی رہ گئے ہیں، جنہیں کوئی نیک شخص دیکھتا ہے (راوی کو شک ہے شاید یہ الفاظ ہیں) جو اسے دکھائے جاتے ہیں۔“ [صحیح ابن حبان/كتاب الرؤيا/حدیث: 6046]

سیدہ ام کرز کعبیہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”نبوت رخصت ہو گئی اور مبشرات (یعنی سچے خواب) باقی رہ گئے ہیں۔“ [صحیح ابن حبان/كتاب الرؤيا/حدیث: 6047]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم جب صبح کی نماز پڑھ کر فارغ ہوتے، تو آپ صلی اللہ علیہ وسلم دریافت فرماتے: ”کیا تم میں سے کسی نے گزشتہ رات (کوئی نمایاں، یا مختلف) خواب دیکھا ہے؟“ آپ صلی اللہ علیہ وسلم یہ ارشاد فرماتے تھے: ”میرے بعد نبوت میں سے صرف سچے خواب باقی رہ جائیں گے۔“ [صحیح ابن حبان/كتاب الرؤيا/حدیث: 6048]

سیدنا وکیع بن حُدُس رحمہ اللہ بیان کرتے ہیں کہ انہوں نے اپنے چچا رضی اللہ عنہ کو یہ بیان کرتے ہوئے سنا کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”مسلمان کا خواب نبوت کا چالیسواں جزء ہے اور یہ اپنی اسی حالت پر برقرار رہتا ہے جب تک آدمی اسے بیان نہیں کرتا، جب آدمی اسے بیان کر دے تو یہ واقع ہو جاتا ہے۔“ [صحیح ابن حبان/كتاب الرؤيا/حدیث: 6049]