نافع رضی اللہ عنہ سے روایت ہے کہ عبداللہ بن عمر رضی اللہ عنہما فرماتے تھے: پھلوں اور کھیتیوں کا صدقہ (زکوٰۃ) جو کھجوروں یا انگوروں یا کھیتیوں یا جَو یا سلت (حجاز میں پیدا ہونے والا جَو جو گیہوں کے مشابہ ہوتا ہے) جو زمین سے تری حاصل کرنے والا ہو، یا نہر سے سیراب کیا گیا ہو، یا چشمہ سے پانی پلایا گیا ہو یا بارش سے سیراب ہوا ہو، اس میں عشر (دسواں حصہ) ہے، ہر دس میں سے ایک حصہ ہوگا، اور جس کو پانی کھینچ کر ڈولوں یا جانوروں سے لا کر سیراب کیا گیا، اس میں نصف العشر (بیسواں حصہ) ہے، ہر بیس میں سے ایک حصہ ہوگا، جو کھیت ڈولوں سے پانی نکال کر کھینچا جائے یا جانور پر پانی لا کر، اس میں سے بیسواں حصہ (پیداوار کا) لیا جائے گا۔ [المستدرك على الصحيحين/كتاب الطلاق/حدیث: 2828]

سعد بن ابی ذباب رضی اللہ عنہ بیان فرماتے ہیں کہ میں رسول اللہ صلی اللہ علیہ وسلم کے پاس آیا اور اسلام لایا، پھر میں نے کہا: یا رسول اللہ! میری قوم کے اسلام لانے کی وجہ سے ان کے مالوں سے کسی کو زکوٰۃ لینے کے لیے مقرر فرما دیں۔ رسول اللہ صلی اللہ علیہ وسلم نے اسی طرح کیا اور مجھے ان پر عامل مقرر فرما دیا۔ پھر ابوبکر رضی اللہ عنہ نے بھی مجھے عامل بنایا، پھر عمر رضی اللہ عنہ نے بھی۔ راوی کہتے ہیں کہ سعد رضی اللہ عنہ معززین میں سے تھے۔ سعد رضی اللہ عنہ کہتے ہیں کہ میں نے اپنی قوم سے شہد کے متعلق بات کی اور ان سے کہا: اس میں زکوٰۃ ہے کیونکہ وہ مال جس سے زکوٰۃ نہ دی جائے اس میں بہتری نہیں ہے۔ انہوں نے کہا: کتنی ہے؟ سعد رضی اللہ عنہ کہتے ہیں میں نے کہا: دسواں حصہ ہے۔ سعد رضی اللہ عنہ کہتے ہیں میں نے ان سے دسواں حصہ لے کر عمر بن خطاب رضی اللہ عنہ کے پاس آیا اور انہیں آگاہ کیا تو عمر رضی اللہ عنہ نے اسے قبول کیا، اسے بیچ کر اس کی قیمت کو مسلمانوں کے صدقات میں جمع کر دیا۔ [المستدرك على الصحيحين/كتاب الطلاق/حدیث: 2829]

عبداللہ بن عمر رضی اللہ عنہما سے روایت ہے کہ عمر بن خطاب رضی اللہ عنہ گندم اور تیل، جسے پانی نکال کر سیراب کیا جاتا، اس سے بیسواں حصہ لیتے تھے؛ وہ اس سے یہ چاہتے تھے کہ کثرت سے اشیاء مدینہ تک پہنچائی جائیں، اور دالوں میں سے دسواں حصہ (عشر) لیا کرتے تھے۔ [المستدرك على الصحيحين/كتاب الطلاق/حدیث: 2830]

سائب بن یزید رضی اللہ عنہ کہتے ہیں میں عمر بن خطاب رضی اللہ عنہ کے زمانے میں مدینہ کے بازار میں عبداللہ بن عتبہ کے ساتھ عامل تھا، عبداللہ بن عتبہ نبطیوں سے عشر لیتے تھے۔ [المستدرك على الصحيحين/كتاب الطلاق/حدیث: 2831]

ابو سعید خدری رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”پانچ وسق سے کم کھجوروں میں زکوٰۃ نہیں ہے۔“ [المستدرك على الصحيحين/كتاب الطلاق/حدیث: 2832]

ابو سعید خدری رضی اللہ عنہ بیان فرماتے ہیں کہ رسول اللہ صلی اللہ علیہ وسلم نے فرمایا: ”پانچ وسق سے کم (غلہ) میں زکاۃ نہیں ہے۔“ [المستدرك على الصحيحين/كتاب الطلاق/حدیث: 2833]

ابوسعید خدری رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”پانچ وسق سے کم (غلہ) میں زکاۃ نہیں ہے۔“ [المستدرك على الصحيحين/كتاب الطلاق/حدیث: 2834]

ابو حمید ساعدی رضی اللہ عنہ سے روایت ہے، بیان کرتے ہیں کہ رسول اللہ صلی اللہ علیہ وسلم نے قبیلہ اسد کے ایک آدمی کو جس کا نام ابن لُتَبِیَّہ تھا، صدقہ وصول کرنے کے لیے عامل بنایا۔ جب وہ واپس آئے تو اس نے کہا: یہ آپ کا مال ہے اور یہ مجھے ہدیہ (تحفہ) میں ملا ہے۔ نبی صلی اللہ علیہ وسلم منبر پر کھڑے ہو گئے اور آپ نے فرمایا: ”کیا ہوا عامل کو کہ ہم اسے اپنے بعض اعمال پر بھیجتے ہیں، اور وہ آ کر کہتا ہے یہ تمہارا (بیت المال) مال ہے اور یہ مجھے تحفہ دیا گیا ہے۔ وہ اپنے والد یا والدہ کے گھر کیوں نہ بیٹھا رہتا، دیکھتا کہ وہاں بھی اسے ہدیہ ملتا ہے یا نہیں۔ اس ذات کی قسم جس کے ہاتھ میں میری جان ہے۔ اس (مالِ زکوٰۃ) میں سے اگر کوئی شخص کچھ بھی (ناجائز) لے گا تو وہ اسے قیامت کے دن اپنی گردن پر اٹھائے حاضر ہوگا۔ اگر اونٹ ہے تو بلبلاتا آئے گا، اگر گائے ہے تو ڈکارتی ہوئی آئے گی اور اگر بکری ہے تو ممیاتی ہوئی آئے گی۔“ پھر آپ صلی اللہ علیہ وسلم نے اپنے ہاتھ مبارک اٹھائے حتیٰ کہ ہم نے آپ کی بغل مبارک کی سفیدی بھی دیکھ لی اور فرمایا: «اللَّهُمَّ هَلْ بَلَّغْتُ، اللَّهُمَّ هَلْ بَلَّغْتُ» ”اے اللہ! میں نے تیرا حکم پہنچا دیا، اے اللہ! میں نے تیرا حکم پہنچا دیا۔“ [المستدرك على الصحيحين/كتاب الطلاق/حدیث: 2835]

ابو حمید ساعدی رضی اللہ عنہ سے روایت ہے کہ میری آنکھوں نے دیکھا اور میرے کانوں نے رسول اللہ صلی اللہ علیہ وسلم سے سنا اور تم زید بن ثابت رضی اللہ عنہ سے دریافت کر لو، یعنی اسی طرح سابقہ حدیث کی مثل۔ [المستدرك على الصحيحين/كتاب الطلاق/حدیث: 2836]

طاؤوس رحمہ اللہ سے روایت ہے، بیان کرتے ہیں کہ رسول اللہ صلی اللہ علیہ وسلم نے عبادہ بن صامت رضی اللہ عنہ کو صدقہ وصول کرنے کے لیے عامل بنایا، اور فرمایا: ”اے ابوالولید! اللہ سے ڈرو! کہیں ایسا نہ ہو کہ تو قیامت کے دن اپنی گردن پر اونٹ لائے اور وہ بلبلا رہا ہو یا گائے لائے جو ڈکار رہی ہو یا بکری جو ممیا رہی ہو۔“ عبادہ بن صامت رضی اللہ عنہ نے کہا: اے اللہ کے رسول! کیا یہ (واقعتاً) ایسے ہی ہے؟ آپ صلی اللہ علیہ وسلم نے فرمایا: ”ہاں، مجھے اس ذات کی قسم جس کے ہاتھ میں میری جان ہے مگر جس پر اللہ نے رحم کیا۔“ عبادہ رضی اللہ عنہ نے کہا: مجھے اس ذات کی قسم جس نے آپ کو حق کے ساتھ مبعوث کیا، میں دو چیزوں پر بھی آئندہ عامل نہیں بنوں گا۔ [المستدرك على الصحيحين/كتاب الطلاق/حدیث: 2837]