سیدنا عروہ بن مضرس طائی رضی اللہ عنہ بیان کرتے ہیں کہ میں مزدلفہ میں وقوف کے وقت رسول اللہ صلی اللہ علیہ وسلم کی خدمت میں حاضر ہوا اور عرض کیا: ”اے اللہ کے رسول! میں قبیلہ طے کے دو پہاڑوں سے آیا ہوں۔ میں نے اپنی سواری کو ہلکان کیا ہے اور اپنے آپ کو بہت تھکایا ہے۔ قسم اللہ کی! میں نے کوئی ٹیلہ (یا پہاڑ) نہیں چھوڑا مگر اس پر وقوف کیا ہے۔ تو کیا میرا حج ہو گیا؟“ رسول اللہ صلی اللہ علیہ وسلم نے فرمایا: ”جس نے ہمارے ساتھ یہ نماز (فجر) پا لی اور اس سے پہلے وہ رات یا دن میں عرفات میں حاضر ہو چکا ہے تو اس کا حج پورا ہو گیا اور اس نے اپنا میل کچیل دور کر لیا (اس نے مناسک حج پورے کر لیے۔ اب مابعد کے دیگر اعمال حج پورے کر کے اپنا احرام کھول دے)۔“ [سنن ابي داود/كتاب المناسك /حدیث: 1950]

عبدالرحمٰن بن معاذ رضی اللہ عنہ ایک صحابی رضی اللہ عنہ سے بیان کرتے ہیں، انہوں نے کہا: نبی کریم صلی اللہ علیہ وسلم نے منٰی میں لوگوں کو خطبہ دیا اور انہیں اپنے اپنے مقامات پر اترنے کا ارشاد فرمایا، آپ صلی اللہ علیہ وسلم نے فرمایا: ”مہاجرین یہاں پڑاؤ کریں۔“ اور قبلہ کی جانب دائیں طرف اشارہ فرمایا، ”اور انصار یہاں پڑاؤ کریں۔“ اور قبلہ کی بائیں طرف اشارہ فرمایا، ”اور دیگر لوگ ان کے ارد گرد اتریں۔“ [سنن ابي داود/كتاب المناسك /حدیث: 1951]

ابن ابی نجیح اپنے والد سے، وہ بنو بکر کے دو آدمیوں سے روایت کرتے ہیں، انہوں نے بیان کیا: ”ہم نے رسول اللہ صلی اللہ علیہ وسلم کو ایام تشریق کے درمیانی دن میں خطبہ دیتے ہوئے دیکھا۔ ہم آپ صلی اللہ علیہ وسلم کی سواری کے قریب ہی تھے اور یہ رسول اللہ صلی اللہ علیہ وسلم کا وہ خطبہ تھا جو آپ صلی اللہ علیہ وسلم نے منٰی میں ارشاد فرمایا۔“ [سنن ابي داود/كتاب المناسك /حدیث: 1952]

ربیعہ بن عبدالرحمٰن بن حصین اپنی دادی سراء بنت نبہان رضی اللہ عنہا سے بیان کرتے ہیں، یہ خاتون قبل از اسلام ایک گھر کی نگران تھیں (جس میں بت ہوا کرتے تھے)، وہ بیان کرتی ہیں کہ رسول اللہ صلی اللہ علیہ وسلم نے «يَوْمُ الرُّؤُوسِ» ”رؤوس والے دن“ ہمیں خطبہ دیا۔ آپ صلی اللہ علیہ وسلم نے فرمایا: ”یہ کون سا دن ہے؟“ ہم نے کہا: ”اللہ اور اس کے رسول بہتر جانتے ہیں۔“ آپ صلی اللہ علیہ وسلم نے فرمایا: ”کیا یہ «أَيَّامُ التَّشْرِيقِ» ”ایام تشریق“ کا درمیانی دن نہیں ہے؟“ امام ابوداؤد رحمہ اللہ نے کہا: ”ابوحرہ رقاشی کے چچا نے بھی ایسے ہی روایت کیا ہے کہ آپ نے ایام تشریق کے درمیانی دن میں خطبہ دیا۔“ [سنن ابي داود/كتاب المناسك /حدیث: 1953]

سیدنا ہرماس بن زیاد باہلی رضی اللہ عنہ بیان کرتے ہیں کہ ”میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم منیٰ میں قربانی والے دن اپنی عضباء اونٹنی پر لوگوں کو خطبہ دے رہے تھے۔“ [سنن ابي داود/كتاب المناسك /حدیث: 1954]

سیدنا ابوامامہ رضی اللہ عنہ بیان کرتے ہیں کہ ”میں نے منٰی میں قربانی والے دن رسول اللہ صلی اللہ علیہ وسلم کا خطبہ سنا۔“ [سنن ابي داود/كتاب المناسك /حدیث: 1955]

سیدنا رافع بن عمرو مزنی رضی اللہ عنہ بیان کرتے ہیں: ”میں نے رسول اللہ صلی اللہ علیہ وسلم کو دیکھا کہ آپ صلی اللہ علیہ وسلم منیٰ میں اپنے سفید خچر پر لوگوں کو خطبہ دے رہے تھے جبکہ دن اونچا آ چکا تھا اور سیدنا علی رضی اللہ عنہ آپ صلی اللہ علیہ وسلم کی بات آگے پہنچا رہے تھے۔ لوگ کچھ بیٹھے تھے اور کچھ کھڑے تھے۔“ [سنن ابي داود/كتاب المناسك /حدیث: 1956]

سیدنا عبدالرحمٰن بن معاذ تیمی رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ہمیں خطبہ دیا جبکہ ہم منیٰ میں تھے۔ پس (اللہ تبارک و تعالیٰ نے) ہمارے کان کھول دیے، ہم اپنے اپنے پڑاؤ پر تھے اور وہ سب کچھ سن رہے تھے جو آپ صلی اللہ علیہ وسلم فرما رہے تھے۔ آپ ہمیں اعمالِ حج کی تعلیم فرما رہے تھے حتیٰ کہ جمرات تک پہنچ گئے، تو آپ نے اپنی شہادت کی انگلیاں (اپنے کانوں میں) رکھیں اور فرمایا: ”چھوٹی چھوٹی کنکریاں مارو۔“ آپ نے مہاجرین کو حکم دیا تو وہ مسجد (خیف) کے آگے کی طرف اترے اور انصار کو حکم دیا تو وہ مسجد سے پیچھے کی طرف اترے۔ پھر دوسرے لوگ ان کے بعد اترے۔ [سنن ابي داود/كتاب المناسك /حدیث: 1957]

عبدالرحمٰن بن فروخ نے سیدنا ابن عمر رضی اللہ عنہما سے پوچھا کہ ”ہم لوگوں کے ساتھ خرید و فروخت کرتے ہیں، تو ہم میں سے کوئی مکہ بھی آ جاتا ہے اور اپنے مال کے ساتھ رات گزارتا ہے،“ تو انہوں نے جواب دیا کہ ”رسول اللہ صلی اللہ علیہ وسلم نے تو راتیں منیٰ میں گزاری تھیں اور دن بھی۔“ [سنن ابي داود/كتاب المناسك /حدیث: 1958]

سیدنا عبداللہ بن عمر رضی اللہ عنہ بیان کرتے ہیں کہ سیدنا عباس رضی اللہ عنہ نے رسول اللہ صلی اللہ علیہ وسلم سے اجازت طلب کی تھی کہ ”لوگوں کو پانی پلانے کی غرض سے منیٰ کی راتیں مکہ میں گزار لیں“ تو آپ صلی اللہ علیہ وسلم نے ان کو اجازت دے دی تھی۔ [سنن ابي داود/كتاب المناسك /حدیث: 1959]